Isaia 4 - ÎVUKU RÎA ÛVORO MWARO

¹ Rîrîa mûthenya ûcio ûgaakinya, aka mûgwanja nîmakaanyita mûndûmûrûme ûmwe mamwîre atîrî, “Tûkaarîcaga irio cietû tue ene na twîkagîre nguo cietû; nwatî twîtîkîrie twîtanague nawe, nîguo ûtûthengutîrie gîcambio gîa kwîthîrwa tûtarî aviku.”

Îtûûra rîa Jerusalemu nîrîgaatumwa rîngî

² Mûthenya ûcio, rûvûa rûrîa Ngai-Mûnene agaatûma rûmere rûkethîrwa rûrî rûthaka na rûrî na riiri. Namo maciaro ma nthî nîmakaaguna na makenagie andû a Isiraeli arîa matigarîte.

³ Arîa onthe magaatigara marî mwoyo îtûûrarî rîa Jerusalemu, arîa magaatigara kûu Zayuni nîmagetwa, “Atheru.” Acio nî arîa onthe marîîtwa mao makethîrwa mandîkîtwe nîguo matûûre kûu Jerusalemu.

⁴ Mwathani nîagaatuîra andû a Zayuni na atherie mevia ma Jerusalemu na nthakame îrîa îtûrûrîtwe kuo.

⁵ Ngai-Mûnene nîagaacoka atûme kûgîe na matu mûthenya îgûrû rîa Kîrîma gîa Zayuni na kûrî andû arîa magomanîte vo, na ndogo vamwe na kîmûrî Kîam mwaki ûtukû. Îgûrû rîa ûguo, riiri wa Ngai nîûgaakunîka na ûgitîre îtûûra rîonthe.

⁶ Riiri wake nîûgaatuîka kîruru Kîam gûkunîkîra îtûûra mûthenya nîûndû wa ûrugarî wa riûa na kûndû gwa kwîthitha rûkûngi rûnene na mbura.