Isaia 38 - ÎVUKU RÎA ÛVORO MWARO

Ûrwaru wa mûthamaki Hezekia

¹ Vîndî îo, Hezekia nîwarwarire mûno nginya agîkuvîvîria gûkua. Nake mûrathi Isaia, mûvîcî wa Amosi nîwathiîre kûrî ke na akîmwîra atîrî, “Ngai-Mûnene arauga ûvange maûndû ma nyomba yaku, nîûndû nîûgûkua tîûvona.”

² Hezekia nîwacokire akîvûgûka akîroria rûthingo na akîvoya Ngai-Mûnene,

³ na akiuga atîrî, “Ûûi Ngai-Mûnene, nakûthaitha ûririkane ûrîa mbîthîrîtwe nîrî mwîvokeku kûrî we na ngoro yonthe, na ngîkaga maûndû marîa wonaga marî maro.” Na Hezekia nîwarîrire arî na ûrûrû mwîngî mûno.

⁴ Naguo mûgambo nîwaumire kûrî Ngai-Mûnene ûkîra Isaia atîrî,

⁵ “Thiî ûkeere Hezekia, Ngai-Mûnene, Ngai wa aguo Daudi arauga atî: ‘Nîmbîguîte îvoya rîaku na nîmonete methori maku; kwoguo nîngûkwongerera mîaka îkûmi na îtano ûtûûrorî waku.

⁶ Nîngaakûvonokia we wana îtûûra rîîrî rîa Jerusalemu kuuma kûrî mûthamaki wa Asîria na nîrîgitîre.’ ”

⁷ Nake Isaia nîwamûcokerie atîrî, “Rûrû nîruo rûûri rûrîa Ngai-Mûnene agaakûva rwa gûkwonia atî nîageka wata ûrîa eranîrîte:

⁸ Nîngaatûma kîruru Kîam ngathî îrîa yatumirwe nî mûthamaki Ahazi gîcoke na vuva makinyo îkûmi.” Nakîo kîruru nîgîacokire na vuva makinyo îkûmi.

⁹ Kwoguo vuva wa Hezekia kûvona, nîwatungire rwîmbo rûrû:

¹⁰ Nînaugire atîrî, “Nwanginya ngue vîndî ya wîthî wakwa, Mvangîrîtwe kûthiî kwa arîa akuû mîaka îo îngî ya ûtûûro wakwa.

¹¹ Naaugire ndikona Ngai-Mûnene vûrûrirî wa arîa matûûraga mwoyo; na ndikona mûndû wanarî ûrîkû gatagatîrî ka arîa matûûraga nthî.

¹² Nîrî mûthengutie kûrîa ndûûraga, ta ûrîa îgema rîa mûrîthi rîtharagua, Ngai akûnjîte ûtûûro wakwa; ta ûrîa mûtumi wa nguo akûnjaga gîtambaa agîtinia kuuma ngorarî, mûthenya na ûtukû we nîûnyamaragia.

¹³ Naarîrire ûtukû mûgima ngîvoya ûtethio; amunangîte mavîndî ta ûrîa mûnyambû unangaga. Mûthenya na ûtukû we nîûnyamaragia.

¹⁴ “Ng'ambaga ta cûcû wa njoka, njaaga ta ndutuura. Metho makwa nîmathiru vinya nî kûroria îgûrû. Ûûi Mwathani, nînîrathînîka tuîka mûgitîri wakwa.

¹⁵ Nwatî nîngiuga atîa? Ke mwene nîwambîrire, na ke mwene nîke wîkîte ûguo. Toro yakwa yonthe nînthiru, nîûndû wa ûrûrû ûrîa ûrî ngororî yakwa.

¹⁶ “Ûûi Mwathani, tue tûtûûragua nî maûndû monthe marîa wekire, na mau monthe nîmo matûmaga ndûûre. Ûûi, njokeria vinya wa mwîrî na ûmvotithie gûtûûra.

¹⁷ Naathînîkire ûguo nîûndû wa wagîrîru wakwa, nwatî nîûvonoketie ûtûûro wakwa, kuuma ûgwatirî wa gîkuû, nîûndû nîûnjoverete mevia makwa monthe.

¹⁸ Nîûndû mûndû arî kwa arîa akuû ndangîgûcokeria ngatho, arîa akuû matingîgûkumia we, arîa mathiîcaga kûu îrimarî, matingîgîa na kîîrîgîrîro Kîam wîvokeku waku.

¹⁹ Arîa marî mwoyo nîo magûcokagîria ngatho, ta ûrîa nie nîragûcokeria ngatho rîu, îthe wa ciana nîke ûimenyithagia ûvoro wa wîvokeku waku.

²⁰ “Ngai-Mûnene nîakaamvonokia, natue nîtûkaamwinîra tûkîvûraga kînanda Kîam ngunju nyîngî mîthenya yonthe ya ûtûûro wetû, tûrî nyombarî ya Ngai-Mûnene.”

²¹ Kwoguo Isaia nîwamerire moce maguta ma ngûû, na mavake îvûvarî nîguo avore.

²² Mûthamaki Hezekia nîwacokire akîûria atîrî, “Nî rûûri rûrîkû rûkaamonia atî nîngaathiî nyombarî ya Ngai-Mûnene?”