Isaia 37 - ÎVUKU RÎA ÛVORO MWARO

Mûthamaki nîwaûririe ûtaaro kûrî Isaia

¹ Rîrîa Mûthamaki Hezekia eeguire ûguo, nîwatembûrangire nguo ciake, agîkîra nguo cia macakaya na agîtonya nyombarî ya Ngai-Mûnene.

² Nîwatûmire Eliakimu, mûmenyereri wa nyomba ya mûthamaki; Shebuna, mwandîki; na athînjîri-Ngai arîa akûrû mekîrîte nguo cia macakaya mathiî kûrî mûrathi Isaia, mûvîcî wa Amozu.

³ Nao nîmeerire Isaia atîrî, “Hezekia augîte atî, ‘Ûmûnthî nî mûthenya wa kîeva, wa kûrumana, na wa gûconorithua. Twîkariî ta mûndûmûka akîenda gûciara mwana, nwatî ndarî na vinya wa gûciara.

⁴ Nwa kwîthîrwa Ngai-Mûnene Ngai waku, nîeguîte ûrîa Rabushake augîte, ûrîa watûmîtwe nî mwathi wake, mûthamaki wa Asîria, nîguo athekerere Ngai ûrîa ûtûûraga mwoyo, nake Ngai-Mûnene, Ngai waku nîakaaregana na maûndû mau eeguire. Kwoguo voera andû arîa matigarîte.’ ”

⁵ Rîrîa ndungata cia mûthamaki Hezekia ciakinyire kwa Isaia,

⁶ Isaia nîwamerire atîrî, “Îrani mwathi wenyu Ngai-Mûnene arauga atî, ‘Ndûgetigîre nîûndû wa ûrîa wegua ndungata cia mûthamaki wa Asîria cianuma.

⁷ Taroria, nîngûtûma egue ûvoro ûcio na ûtûme acoke vûrûrirî wake, na kûu nîkuo ngaatûma aûragîrwe.’ ”

Andû a Asîria nîmaatharîkîre Jerusalemu rîngî

⁸ Nake Rabushake nîwacokire, na akîthîrîria mûthamaki wa Asîria akîrûa na îtûûra rîa Libuna, nîûndû nîweguîte atî mûthamaki nîwaumîte Lakishi.

⁹ Rîrîa eegwire atî Tirihaka, mûthamaki wa Ethiopia nîaûkîte kûrûa nake, nîwatûmire anjaama kûrî Hezekia akiuga atîrî,

¹⁰ “Thiîni mwîre Hezekia, mûthamaki wa Juda atî: ‘Ndûgetîkîre Ngai waku ûrîa wîkaraga wîvokete akûveenie akiugaga atî îtûûra rîa Jerusalemu tîrînenganîrwa kûrî mûthamaki wa Asîria.

¹¹ We nîwîguîte ûrîa athamaki a Asîria mekîte mavûrûri marîa mengî monthe, makamathiria viû. We-î, ûreciria nîûkûvonoka?

¹² Methe makwa nîmaacûkangirie mavûrûri ma Gozani, Harani, Rezefu na andû a Edeni arîa maatûûraga Telasari; ngai cia mavûrûri mau nîciamavonokirie?

¹³ Mûthamaki wa Hamathi, na wa Aripadi, wa îtûûra rîa Sefarivaimu, na wa Hena, kana wa Iva marî kû?’ ”

¹⁴ Hezekia nîwamûkîre maarûa kuuma kûrî anjaama acio maatûmîtwe na akîmîthoma. Nîwacokire akîthiî agîtonya nyombarî ya Ngai-Mûnene, na akîmîkûnjûrîra mbere ya Ngai-Mûnene.

¹⁵ Hezekia nîwacokire akîvoya Ngai-Mûnene akiuga atîrî,

¹⁶ “We Ngai-Mûnene mwene vinya wonthe, Ngai wa Isiraeli, ûrîa wîkarîrîte gîtî Kîam ûthamaki îgûrû rîa akerubi, we wenga nîwe Ngai wa mothamaki monthe ma nthî; we nîwe waûmbire îgûrû na nthî.

¹⁷ Vingûra metho maku, we Ngai-Mûnene, na wone; tega gûtû gwaku, we Ngai-Mûnene, na wîgue ciugo cionthe irîa Senakeribu atûmanîte cia kûruma Ngai ûrîa ûtûûraga mwoyo.

¹⁸ Ûûi Ngai-Mûnene, nîma atî athamaki a Asîria nîmacûkangîtie ndûrîrî cionthe, wana mavûrûri mao,

¹⁹ na magaikia ngai ciao mwakirî nîûndû itiarî ngai cia ma, nwatî ciarî mîvuanano yaumîtue nî andû ya mîtî na ya mathiga; kwoguo nîciacûkangirue.

²⁰ Kwoguo rîu, we Ngai-Mûnene, Ngai wetû, tûvonokie kuuma kûrî Sanakeribu, nîguo mothamaki monthe ma nthî mamenye atî we wenga tu nîwe Ngai-Mûnene.”

Ndûmîrîri ya Isaia kûrî Mûthamaki

²¹ Isaia, mûvîcî wa Amozu nîwacokire agîtûma ndûmîrîri kûrî Hezekia akiuga atîrî, “Ngai-Mûnene, Ngai wa Isiraeli arauga atî: Nîûndû nîûmvoete nîûndû wa Senakeribu mûthamaki wa Asîria,

²² ûvoro wîgiî mûthamaki ûcio, Ngai-Mûnene augîte atî: Mwîrîtu nthingi mwarî wa Zayuni, nîakûmenete na agakûthekerera. Mwarî wa Jerusalemu nîarakwinainîria kîongo na agakûnyarara.

²³ Nîûrîkû ûthekererete na ûkaruma? Nîûrîkû ûcio ugîrîrîtie na ûgakûûrîra metho? Nînie Ûrîa Mûtheru wa Isiraeli!

²⁴ We nîwathekerere Mwathani na njîra ya ndungata ciaku, na ûkiuga atî, nîndwîte irîma irîa ndaca na ikaari ciakwa nyîngî cia mbaara, nginya ngakinya gacûmbîrî ka Lebanoni. Nînakindire mîtarakwe îrîa mîraca mûno, na mîthithinda yakuo îrîa mîaro mûno; nînginyîte mîthiia ya Lebanoni kûrîa kûraca mûno, na ngakinya kûrîa mûtitû ûrumîrîte.

²⁵ Nînenjire ithima na ngînyua manjî ma cio, na nînanyarithirie nyûnjî cionthe cia Misiri, na makinyo ma magûrû makwa.

²⁶ “Senakeribu nîkwa ûteguîte atî naavangire ûndû ûyû kuuma tene? Ûrîa nîreka rîu naaûvangire kuuma tene. Nakûveere vinya wa kwomomora matûûra marîa mairigîre matuîke maganjo.

²⁷ Wa rîrîa andû akuo mathirîtwe nî vinya, nîmaamakire na magîconoka. Matuîkîte ta mîmera îrî mûgûndarî, ta nyaki ya mûgîna, ta nyaki îmerete îgûrû rîa nyomba, îrîa yûmaga yavurutwa nî rûkûngi kuuma mwena wa îrathîro.

²⁸ “Nie nîmbîcî mîthiîre yaku, nîngwicî ûkiumagara na ûgîcoka, nîmbîcî rîrîa ûndakarîrîte.

²⁹ Nîûndû nîûndakarîrîte, na nîmbîguîte ûvoro wa mwîtîîo waku, nîngwîkîra ndûano yakwa îniûrûrî rîaku, na mbîkîre gîcûvî gîakwa kanyuarî gaku, na ngûcokie na njîra îrîa waûkire nayo.”

³⁰ Isaia nîwacokire akîra Mûthamaki Hezekia atîrî, “Ûndû ûrîa ûgaakûmenyithia maûndû mama nî ûyû: Mwaka ûyû na mwaka mûku mûkaarîcaga kîrîa kîîmeretie kîo kîene; naguo mwaka wa kathatû nîmûkaavanda na mûkethe maciaro; mûkaavanda mîthavibu na mûrîe matunda mayo.

³¹ Nao andû arîa magaatigara a nyomba ya Juda nîmakoongerereka na mengîve ta ûrîa mûtî ûmeraga mîri îgatonya mûtheturî ndarî na ûgaciara matunda na îgûrû.

³² Nîûndû nîgûkaagîa na andû magaatigara kûu Jerusalemu, nakuo Kîrîmarî gîa Zayuni nîgûkethîrwa na andû anini makethîrwa matigarîte. Ngai-Mûnene mwene vinya wonthe nîavangîte gwîka ûguo.

³³ “Kwoguo ûvoro wîgiî mûthamaki wa Asîria Ngai-Mûnene arauga atî: ‘Ke ndagaaûka îtûûrarî rîîrî, kana aikia mûguî kuo, kana atonya kuo na ngo, kana arîcîgîrîria arîtharîkîre.

³⁴ Ngai-Mûnene arauga atî, varavara îo aaûkire nayo nwayo agaacoka nayo, na ndagaatonya îtûûrarî rîîrî.

³⁵ Nîngaagitîra îtûûra rîîrî nîguo nîrîvonokie nîûndû wa gîtîîo gîakwa nie mwene na nîûndû wa ndungata yakwa Daudi.’ ”

³⁶ Mûraika wa Ngai-Mûnene nîwathiîre kûrîa Asîria maambîte magema mao na akîûraga athigari ngiri îgana rîmwe rîa mîrongo înana na ithano (185,000). Rîrîa andû maaramûkire kîraûko tene, andû acio onthe methîrîrue marî ciimba.

³⁷ Senakeribu, mûthamaki wa Asîria nîwacokire akiuma kûu, akînûka na agîtûûra Nineve.

³⁸ Mûthenya ûmwe, Senakeribu akîgooca arî nyombarî ya Nisiroki, ngai yake, avîcî ake Adurameleki na Sharezeri nîmaamûragire na mviû ciao, na makîûra makîthiî vûrûrirî wa Ararati. Nake mûvîcî, Esarihadoni nîwatuîkire mûthamaki vuva wake.