Isaia 36 - ÎVUKU RÎA ÛVORO MWARO

Andû a Asîria nîmaatharîkîre Jerusalemu

¹ Mwakarî wa îkûmi na îna Hezekia arî mûthamaki wa Juda, Senakeribu, mûthamaki wa Asîria nîwatharîkîre matûûra monthe ma Juda marîa magitîre na akîmagwata.

² Mûthamaki wa Asîria nîwatûmire Rabushake arî na athigari eengî a mbaara kuuma Lakishi athiî akagîre mûthamaki Hezekia kuuma Jerusalemu. Rabushake nîwarûngamire vakuvî na mûtaro ûrîa ûvîtûkagia manjî kuuma kariarî ka mwena wa îgûrû, varavararî nene îrîa yerekerete kûrîa nguo ithambagîrua.

³ Andû athatû nîmaathiîre kûmûtûnga: nao maarî; Eliakimu, mûvîcî wa Hilikia, mûmenyereri wa nyomba ya mûthamaki; Shebuna, mwandîki na Joa, mûvîcî wa Asafu, mûmenyereri wa mandîko.

⁴ Nake Rabushake nîwamerire atîrî, “Îrani Hezekia, mûthamaki mûnene, na nîke mûthamaki wa Sîria araûria atî, ‘Ûrutîte ûmîrîru ûyû kû?

⁵ Ûreciria atî ciugo ntheri nîcio wara na vinya wa mbaara? Wîvokete û, nginya ûkaregana nanie?

⁶ Taroria, we wîvokete Misiri, mûthanje ûcio munîku, ûrîa ûkaamunda njara ya mûndû wa wonthe ûrîa ûgeetiira naguo. Ûguo nîguo mûthamaki wa Misiri ekariî kûrî arîa onthe mamwîvokaga.’

⁷ “Nwatî ûngîmbîra atîrî, ‘Twîvokete Ngai-Mûnene Ngai wetû.’ Anga tîke mwene kûndû gwa kûgoocerwa na metha cia magongoona irîa Hezekia aacûkangirie akîûragia Juda na Jerusalemu atîrî, ‘Nîmwagîrîrwe nî kûgoocera metharî îno ya kîgongoona?’

⁸ Ûka rîu mwarîrîrie na mwathi wakwa, mûthamaki wa Asîria. Nîngûkûva mbarathi ngiri igîrî (2,000) ethîrwa ûrî na andû a kûthiîcaga maitwîte.

⁹ We ûngîvota kwîgananua atîa wanarî na mûnene ûrîa mûnini mûno gatagatîrî ka ndungata cia mûthamaki wa Asîria, na nwa wîvokete mûthamaki wa Misiri agûtûmîre ikaari cia mbarathi na andû arîa mathiîcaga matwîte mbarathi?

¹⁰ Makîria ya ûguo, ûreciria ntharîkîrîte vûrûri waku na ngaûcûkangia ndavetwe rûtha nî Ngai-Mûnene? Ngai-Mûnene nîke wambîrire nthiî ngaûtharîkîre na nîûcûkangie.”

¹¹ Eliakimu, Shebuna na Joa nîmaacokire makîra Rabushake atîrî, “Twakûthaitha warie natue ndungata ciaku na rûthiomi rwa Suriata, na nîtûkûrwîgua. Tiga gûtwarîria na rûthiomi rwa Kîhibirania; nîûndû wana nthingo irî matû.”

¹² Nwatî Rabushake nîwamerire atîrî, “Nîkwa mûreciria mwathi wakwa, mûthamaki aandûmire kûrî mue muenga na mûthamaki wenyu tu? Naarî, nîrarîria wana andû arîa mekarîte îgûrû rîa rûthingo arîa mûtuîrîrîtwe vamwe nao, arîa makaarîcaga mai mao na manyunyage maumago mao, wata ûrîa wanamue mûgeekaga.”

¹³ Rabushake nîwacokire akîrûngama na akîanîrîra na mûgambo mûnene na Kîhibirania akiuga atîrî, “Thikîrîriani ûrîa mûthamaki mûnene, mûthamaki wa Asîria arauga!

¹⁴ Mûthamaki aramwîra mûtigetîkîre Hezekia amûveenia, nîûndû ndakaavota kûmûvonokia.

¹⁵ Mûtikareke Hezekia amûringîrîrie mwîvoke Ngai-Mûnene akiugaga mûtigecirie nama atî, Ngai-Mûnene nîagûtûvonokia na atî îtûûra rîîrî tî rînenganîrwa kûrî mûthamaki wa Asîria.

¹⁶ Mûthamaki wa Asîria arauga mûtikathikîrîrie Hezekia; gîani na thayû nanie na mûke kûrî nie, na wa mûndû wa mûndû akaarîcaga matunda ma mûthavibu wake ke mwene, na ma mûkûyû wake ke mwene, na wa mûndû anyunyage manjî kuuma kîrikorî gîake ke mwene,

¹⁷ nginya rîrîa ngaaûka na nîmûvire vûrûrirî wîkariî ta ûyû wenyu, vûrûri wî ngano na ndivei, vûrûri wî irio na mîgûnda ya mîthavibu.

¹⁸ Îîmenyerereni Hezekia ndakamûvîtithie akîmwîraga, atî Ngai-Mûnene nîagaatûvonokia. Kûrî ngai wanarî îmwe gatagatîrî ka ngai cia mîvuanano cia mavûrûri yanavonokia vûrûri wao kuuma kûrî mûthamaki wa Asîria?

¹⁹ Nîkwa ngai cia Hamathi na cia Aripadi irî kû? Nîkwa ngai cia Sefarivaimu irî kû? Nîivonoketie Samaria kuuma kûrî nie?

²⁰ Nî ngai îrîkû gatagatîrî ka ngai icio cia mavûrûri mau cianavonokia mavûrûri mao kuuma kûrî nie, atî nîguo Ngai-Mûnene akûre Jerusalemu kuuma kûrî nie?”

²¹ Nwatî andû maakirire ki, na matiamûcokeria wanarî ûndû, nîûndû maathîtwe nî mûthamaki atîrî, “Mûtikamûcokerie.”

²² Vîndî îo Eliakimu mûvîcî wa Hilikia, mûmenyereri wa nyomba ya mûthamaki, Shebuna mwandîki na Joa, mûvîcî wa Asafu mûmenyereri wa mandîko, nîmaathiîre kûrî mûthamaki Hezekia matembûrangîte nguo ciao na makîmwîra ûrîa Rabushake aaugîte.