Isaia 35 - ÎVUKU RÎA ÛVORO MWARO

Njîra ya Ûtheru

¹ Kûndû kûrîa gûtakûraga irio na kûndû kûrîa kûnyaru nîgûgaacanjamûka, werû nîûgaakena na kûmere maûa.

² Nîgûkaamera maûa meengî, na kwine gûcanjamûkîte na gîkeno. Werû nîûkaavewa riiri wa Lebanoni, ûthaka wa kîrîma gîa Karimeli na wa Kîamnda gîa Sharoni. Nîmakoona riiri wa Ngai-Mûnene, nîmakoona ûnene wa Ngai wetû.

³ Ongererani vinya njara icio icunjurîte, na mwongerere vinya maru mau maregerû.

⁴ Îrani arîa marî na guoya ngoro atîrî, “Îyûmîrîrieni, tigani gwîtigîra! Taroriani Ngai wenyu nîagaaûka kûmûrîvîrîria, nîagaaûka kûverithia nthû cienyu, ke mwene nîagaaûka kûmûvonokia.”

⁵ Itumumu nîikaavota kwona, na itaigua nîikaavota kwîgua.

⁶ Cionje nîikaarûgarûga ta ngûrûngû, nao andû arîa matarî ûvoti wa kwaria nîmakaaina makenete. Manjî nîmakaatherûka werûrî, natuo tûrûnjî nîtûkaanyûrûrûka werûrî;

⁷ mûthanga ûrîa ûvenavenagia ta mwaki werûrî nîûgaatuîka îria rîa manjî, nayo nthî nyûmû nîkaatherûka manjî. Kûrîa ciathi itûûraga nîgûgecûra manjî, nyaki nîkaamera na îkûre îkare ta mûthanje na marura.

⁸ Kûu werûrî nîgûkaagîa varavara nene, nayo nîgetwa, “Njîra Ntheru.” Gûtirî mûndû mwîvia ûkaavîtûkîrîra varavararî îo, na irimû itikaavîtia njîra îo.

⁹ Gûtirî mînyambû îkethîrwa njîrarî îo, kana nyamû wa yonthe mbaganu îvîtûkîrîra varavararî îo. Nyamû icio itikooneka varavararî îo, nwatî andû arîa akûre nîo makaavîtûkîrîra kuo.

¹⁰ Arîa maakûûrirwe nî Ngai-Mûnene nîmagaacoka, magaaûka Zayuni magîkûngûagîra, makethîrwa marî na gîkeno gîa tene na tene. Nîmakethîrwa marî na gîkeno na marî acanjamûku, kîeva na kîrîro nîikaathira viû.