Isaia 33 - ÎVUKU RÎA ÛVORO MWARO

Îvoya rîa gwîtia Ûtethio

¹ Kaî we mûcûkangia ûyû, wî thînarî-î! Ûcûkangagia na ndûcûkangagua, we wîkaga maûndû macûku, na gûtirî mûndû ûgwîkaga maûndû macûku! Rîrîa ûkaathiria gûcûkangia, wanawe nîûgaacûkangua! Rîrîa ûkaathiria gwîka andû maûndû macûku, wanawe nîûgekwa maûndû macûku.

² Ûûi Ngai-Mûnene, twîguîre ntha; we nîwe twîkaraga twîrîgîrîrîte. Tuîka vinya wetû mîthenya yonthe, na ûtûvonokagie vîndî ya thîna.

³ Andû nîmaûraga nî mûrurumo wa mûgambo waku, rîrîa waûkîra mavûrûri nîmanyaganagia.

⁴ Nthû ciao ciûnganagia indo irîa itavîte ta ûrîa igunyû ciûngûrûragia indo; wata ûrîa ngige irûgaga, nwataguo andû makaarûgîra indo icio.

⁵ Ngai-Mûnene nî mûnene, ke atûûraga îgûrû; nîagecûria Zayuni na kîvooto na ûthingu.

⁶ Nîke ûgaatûma vûrûri wenyu wîkare wîkindîrîtie, nîagaatûma kûgîe na ûvonokania mwîngî, ûûgî na ûmenyo. Mûthithû wenyu ûrîa mûnene mûno nî gwîtigîra Ngai-Mûnene.

⁷ Taroria, andû arîa njamba nîmararîra, anjaama a thayû nî mararîra marî na kîeva kîngî.

⁸ Njîra irîa nene nî ndiganîrie, na gûtirî mûndû ûravîtûkîrîra kuo. Irîkanîro nîiraunwa, nao aira makanyararwa. Gûtirî mûndû ûtîîaga ûrîa wîngî.

⁹ Nthî îrî na kîeva na îkarega gûciara maciaro, mîtî ya Lebanoni nî mîûmû; Kîamnda kînoru gîa Sharoni gîkariî ta werû, nayo mîtî ya Bashani na Karimeli nî mîrivarivûku mathangû ma yo.

Ngai-Mûnene nîwakaanirie nthû ciake

¹⁰ Ngai-Mûnene arauga atîrî, “Rîu nîngûkîra, rîu nîngwonania vinya wakwa, rîu nie nîngaakumua.

¹¹ Mûkaavangaga maûndû matarî na vata; mûgekaga maûndû matarî na umithio. Mîvevû yakwa nîta mwaki ûrîa ûvîvagia; mîvevû yakwa îkaamûcûkangia ta mwaki.

¹² Andû mageekara takwa mavîvîtue magatuîka mûu, kana ta mîgua îtemetwe îkavîvua na mwaki.

¹³ Mue arîa mûrî kûraca, tathikîrîriani mwîgue ûrîa mbîkîte, namue arîa mûrî vakuvî, taumbûrani ûvoro wa vinya wakwa.”

¹⁴ Andû evia arîa marî Zayuni nîmaretigîra, nao andû arîa matagoocaga Ngai marainaina makiugaga atîrî: “Nû gatagatîrî getû ûngîvota gûkuvîvîria mwaki ûyû ûvîvagia ûkathiria? Nû gatagatîrî getû ûngîtirîria mwaki ûyû ûtavoraga tene na tene?”

¹⁵ Nî mûndû ûrîa ûtûûraga na ûthingu na waragia ûma, ûrîa ûreganaga na umithio umanîte na kûvinyanîrîria. Ûrîa ûtendaga kwamûkîra mavaki, ûrîa ûtendaga kûthikîrîria ndeto cia ûûragani na ûtendaga kwona maûndû macûku.

¹⁶ Mûndû wa mûthemba ûcio atûûraga îgûrû; vandû vake va ûgitîri vakethagîrwa vatumîtwe na nthingo cia vinya. Ndagaatura irio cia kûrîa, kana manjî ma kûnyua.

Ûtûûro mwaro wa vuvarî

¹⁷ Metho menyu nîmakoona mûthamaki arî na ûthaka wake; nîmûkoona vûrûri mwariî na mûraca, ûrîa ke athaga.

¹⁸ Mûkaririkanaga maûndû ma tene mûrî na guoya, mûkaûria atîrî, “Arîa maaûnganagia na magîtaraga gooti marî kû? Arîa maataraga nyomba cietû irîa ndaca na îgûrû marî kû?”

¹⁹ Mûtikoona andû arîa etîi rîngî, andû arîa maragia mwarîrie ûtangîereeka, arîa maragia makînyenyega na matangîereeka.

²⁰ Taroriani Zayuni îtûûra rîrîa tûkûngûagîra irugo cietû cia ndini. Taroriani Jerusalemu kûndû kûvoreru kwa gûtûûra îgema rîtangîenyenya, nthugî cia rîo itigaakûûrwa, kana mîkanda ya rîo îtuîka.

²¹ Nwatî kûu nîkuo Ngai-Mûnene agaatwoneria riiri wake. Nîgûkethîrwa kûrî na nyûnjî nene na tûrûnjî, kûrîa meri cia mbaara itakaavîtûkîrîra, kana meri irîa nene itonya kuo.

²² Nîûndû Ngai-Mûnene nîke mûtucanîri ciira wetû, Ngai-Mûnene nîke ûtwathaga, Ngai-Mûnene nîke mûthamaki wetû, na nîke ûgaatûvonokia.

²³ Mîkanda yonthe ya meri icio nî mîregerû; ndîngîvota kûrûngamia mîtî ya vendera, wana kana matûme itambaa itambûrûke nîguo ivotithie meri kûthiî. Nwatî indo nyîngî irîa itavîtwe nîikagaanua, wana nginya cionje nîigooca indo ciao.

²⁴ Gûtirî mûndû ûkaauga rîngî atîrî, “Nie nîrî mûrwaru.” Andû onthe arîa matûûraga kûu nîmagaakirîrîrua mevia mao.