Isaia 32 - ÎVUKU RÎA ÛVORO MWARO

Mûthamaki mûthingu

¹ Nîgûkaagîa na mûthamaki ûkaathanaga na ûthingu, na anene mathanage na kîvooto.

² Wa mûndû agaatuîka ta kûndû gwa kwîthitha rûkûngi, kana ta vandû va kwîthitha rûkûngi rûnene, kana ta tûrûnjî tûrî kûndû kûnyaru, kana ta mwîgunyî wa îthiga înene werûrî.

³ Metho ma arîa monaga matikaavingwa, namo matû ma arîa megucaga nîmakaathikîrîria.

⁴ Arîa mavinyûraga gwîka maûndû matambîte gwîciiria, nîmakaamenya maûndû ma ûûgî, nao arîa manyenyaga nî makaaria mîario îrûngîrîrîtie.

⁵ Mûndû ûrîa kîrimû ndakagîa na îgweta, kana kîmaramari kîgathîrîrue.

⁶ Nîûndû irimû ciaragia ûrimû, na meciria ma cio mavangaga maûndû macûku. Mekaga maûndû matarî ma ûngai, maragia maûndû ma gûcambia Ngai-Mûnene. Matigaga andû arîa avûtu matarî avau, na makaima arîa anyondu gîa kûnyua.

⁷ Mîthiîre ya mûndû ûrîa mûthunu nî mîcûku; avangaga maûndû ma waganu nîguo acûkangie athîni na ciugo ciake cia maveeni, wana rîrîa athîni maretia kîrîa kîmagîrîrîte.

⁸ Nwatî mûndû mûtîîku ekaga maûndû ma gîtîîo, na arûngamagîrîra ûma.

Mataaro kûrî aka a Jerusalemu

⁹ Ûkîrani, mue aka aya mûtûûraga mwîganîrîte, thikîrîriani mûgambo wakwa, mue erîtu aya mûtarî ûndû mwîtigagîra, thikîrîriani ûrîa nguuga.

¹⁰ Kwa îvinda ta rîa mwaka ûmwe, mue mwîganîrîte ûguo nîmûgaatetema, nîûndû mûtigaketha kîndû, na maketha ma thavibu matikoneka.

¹¹ Inainani, mue aka aya mwîkaraga mwîganîrîte, tetemani mue mûtarî ûndû mwîtigagîra; rutani nguo cienyu, mûtigwe mûrî njaga, na mwîyove nguo cia macakaya ciûnorî cienyu.

¹² Îîvûûreni ithûri mûrî na kîeva Kîam mîgûnda yenyu îrîa mîaro, na nîûndû wa mîthavibu îrîa îciaraga mûno,

¹³ nîûndû wa vûrûri wa andû akwa nîûramera mîgua na nthaugû, mûrîrîre nyomba cionthe irîa ciecûrîtwe nî gîkeno, na ciarî îtûûrarî rîrî na gîkeno.

¹⁴ Nîûndû nyomba ya mûthamaki nîkaathamwa, na îtûûra rîrî îgweta ûguo rîtiganîrue. Irîma na nyomba ndaca na îgûrû cia arangîri igaatuîka maganjo tene na tene, nyûmbû nîigaakenaga irî kuo, na ng'ondu irîcage kuo.

¹⁵ Gûkaathiî na mbere gwîkara ûguo nginya rîrîa tûkaanyûrûrûkîrua Roho kuuma îgûrû. Vîndî îo werû nîûgaatuîka mûgûnda umaga maciaro, nayo mîgûnda îrîa mînoru îtuîke mûtitû.

¹⁶ Kîvooto nîgîgaacoka kûonekana werûrî, naguo ûthingu ûtûûrage mûgûndarî ûrîa uumaga maciaro.

¹⁷ Naguo ûndû ûrîa ûkaaumana na ûthingu nî thayû, naguo ûthingu nîûgaatûma kûgîe ûvooreri na wîvokeku tene na tene.

¹⁸ Andû akwa magaatûûraga kûndû kûrî na thayû, kûndû kûgitîre na kûndû gûtarî na thîna.

¹⁹ Naguo mûtitû nîûkaathirua viû, narîo îtûûra rîcûkangue viû.

²⁰ Gûkena nî mue arîa mûvandaga mbegû cienyu ndeererî cia manjî, ng'ombe na mvunda cienyu ikerîthagia kûndû kuonthe itagwîtigîra.