Isaia 30 - ÎVUKU RÎA ÛVORO MWARO

Ngwatanîro ya mana na Misiri

¹ Ngai-Mûnene arauga atîrî, “Kaî ciana irîa ireganaga nanie irî na thîna-î, irûthaga mîvango yacio, nwatî tî yakwa; irûthaga ngwatanîro itaringanîte na ûrîa mendaga, makongerera wîvia îgûrû rîa wîvia.

² Ciambagîrîria rûgendo ithiîte Misiri itambûrîtie ûtaaro, ithiîte gûcaria ûgitîri wa mûthamaki wa Misiri, na ikathiî gûcaria gwa kwîthitha vûrûrirî wa Misiri!

³ Kwoguo ûgitîri ûcio wa mûthamaki wa Misiri nîûkaamûconorithia, nakuo kwîthitha vûrûrirî wa Misiri kûmwîguithie nthoni.

⁴ Nîûndû wana ethîrwa anene ake marî Zoani, na anjaama ake magakinya nginya Hanesi,

⁵ onthe nîmagaaconorithua nî andû matangîmaguna, andû acio matangîmatethia kana mamaguna, tiga kûmaconorithia na kûmanyararithia.”

⁶ Îno nîyo ndûmîrîri ya Ngai îgiî nyamû cia Negebu. “Anjaama mathiîte mavîtûkanîrîtie vûrûrirî wa thîna na kîeva, kûrîa kûrî mînyambû ya nga na ya njamba, kûrîa kûrî njoka irî ûrogi na ciîngî nene igûrûkaga. Makuuithîtie mvunda ûtonga wao, na magakuuithia ngamîîra indo ciao cia goro, mavirîrîte andû matangîmaguna na kîndû wanarî kîrîkû.

⁷ Nîûndû ûtethio wa Misiri nî wa mana na ndûrî kîguni; kwoguo nîmvete Misiri rîîtwa, ‘Rahabu.’ ”

Andû arîa aremi

⁸ Ngai nîwambîrire atîrî, “Rîu thiî wandîke ûvoro ûcio kîvengererî, na ûwandîke îvukuurî, nîguo ûtuîke ûira wa mavinda marîa magaaûka nginya tene na tene.

⁹ Nîûndû andû aya nîaremi, ciana itaragia ûma, na itegucaga mataaro ma Ngai-Mûnene.

¹⁰ Meraga oni maûndû atîrî, ‘Tigani kwona maûndû.’ Na makeera arathi atîrî, ‘Mûtigatûrathîre maûndû marîa magîrîru, twaragîrieni maûndû marîa maro, na mûrathage maûndû ma maveeni.

¹¹ Umani njîrarî na mûtige gûtûvîngîca, tûtikwenda kwîgua rîngî Ûrîa Mûtheru wa Isiraeli akîgwetwa.’ ”

¹² Kwoguo, Ûrîa Mûtheru wa Isiraeli arauga atîrî, “Nîûndû nîmûnyararîte ûrîa mbugîte, na mûkevoka maûndû ma kûvinyanîrîria na maveeni;

¹³ kwoguo mevia nîmamûretera mûthiro, ta mwatûka wa rûthingo rûraca na îgûrû, rûkaagwa wa rîmwe.

¹⁴ Kwomomoka kwa rûthingo rûu nîta kwa nyûngû îrîa îkucaga îkavaragana, gûtarî wanarî karûgîo kangîkuuwa makara ma mwaki, kana kangîtava manjî kuuma kîrikorî.”

¹⁵ Nîûndû Ngai-Mûnene, Ngai Ûrîa Mûtheru wa Isiraeli arauga atîrî, “Mûngînjokerera na mûkirîrîrie, nîmûkaavonoka; mwakirîrîria na mwanîîvoka mûkaagîcaga na vinya.” Nwatî mue nîmwaregire gwîtîkîra.

¹⁶ Vandû va ûguo mue mwaugire atîrî, “Naarî! Tue tûkaavinyûra tûtwîte mbarathi irîa irî îvenya.” Îî nîguo, nîmûkaavinyûra na mbarathi irîa irî îvenya, nwatî arîa makaamûvinyûria makethîrwa matwîte mbarathi irî na îvenya makîria!

¹⁷ Andû ngiri îmwe nîmakaaûra nî mûndû ûmwe, na andû atano nîmagaatûma muonthe mûre. Nginya rîrîa mûgatigwa mwîkariî ta mûtî wa vendera ûrî kîrîmarî, ta rûûri rûrî îgûrû rîa karîma!

¹⁸ Kûnarî ûguo, Ngai-Mûnene nwa wetererete kûmwîguîra ntha, kwoguo nîevarîrîtie kûmûtuga. Nîûndû Ngai-Mûnene nî Ngai wîkaga maûndû ma kîvooto, kûrathimwa nî arîa onthe mamwetagîrîra.

Ngai nîakaarathima andû ake

¹⁹ Mue andû a Zayuni, arîa mûtûûraga Jerusalemu, mûtikaarîra rîngî. Nama nîakaamwîguîra ntha rîrîa akegua mûgambo wenyu mûkîmûrîrîra; rîrîa akegua mûgambo wa kîrîro kîenyu, nîakaamûthikîrîria.

²⁰ Wana ethîrwa Mwathani nîagaatûma mwone mathîna na mînyamaaro, ke nîke mwarimû wenyu na ndakethitha rîngî, nwatî nîmûkaamwona na metho menyu mue ene.

²¹ Mûngîvîtia njîra mûthiî na mwena wa ûrîo kana wa ûmotho, nîmûkegucaga mûgambo vuva wenyu ûkîmwîra atîrî, “Îno nîyo njîra; mîrûmîrîreni.”

²² Nîmûgaacoka mûcûkangie mîvuanano yenyu ya gwacwa îrîa îvakîtwe sîlûva na mîvuanano yenyu îrîa îvakîtwe thaavu. Nîmûkaainyagia ta indo irî gîko, mûkiugaga atîrî, “Iroûra!”

²³ Rîrîa mûkaavanda mbeû mîgûndarî yenyu, Ngai nîakaaurithia mbura, nacio nîigaakûra na iciare maciaro meengî. Nacio ndîthia cienyu nîikaagîa na kûndû kûnene mûno gwa kûrîthua.

²⁴ Ndegwa na mvunda cienyu cia mîraû nîikaarîa macaki marî mavûnge na magacungwa na magekîrwa cumbî.

²⁵ Mûthenya ûcio wakinya, rîrîa nthû cienyu ikaaûragwa na nthingo ciao ndaca ciomomorwe, tûrûnjî nîtûkaanyûrûrûka kuuma irîmarî cionthe na tûrîmarî tuonthe.

²⁶ Makîria ya ûguo, mweri nîûkaara ta riûa, naguo ûtheri wa riûa ûneneve maita mûgwanja ta ûtheri wa mîthenya mûgwanja warîte mûthenya ûmwe. Ûguo nîguo gûgekara mûthenya ûrîa Ngai-Mûnene akoova ngurara na avonie ironda cia andû ake kûrîa aamativangirie na rûthanju rwake.

Ngai nîakaaverithia Asîria

²⁷ Taroriani, Ngai-Mûnene nîaûkîte aumîte kûndû kûraca, atûmbîtwe nî marakara na arî ndogorî ndumanu îkiunûkagia; mîromo yake îcûrîtwe nî mang'ûrîka, naruo rûrîmî rwake rwîkariî ta mwaki ûrîa ûvîvagia viû.

²⁸ Mîvevû yake îkariî ta rûnjî rwîcûrîte rûkauna, manjî ma ruo makinyaga mûndû ngingo; Aûkîte kwinainia ndûrîrî aicûkangie, agaciovania na aivire kûrîa itendaga kûthiî.

²⁹ Nîmûkaaina nyîmbo ta irîa cinagwa vîndî îrîa kûrî na ûkûngûîri wa kîrugo Kîammûre. Mûgaacanjamûka ta andû mathiîte kîrîmarî Kîam Ngai-Mûnene, mûgitîri wa Isiraeli makîvuvaga mîtûrirû.

³⁰ Ngai-Mûnene nîagaatûma mûgambo wake ûrîa ûrî riiri wîguîke, na aringe nthû ciake na vinya arî na marakara. Nîgûkethîrwa na rûrîrîmbî rwa mwaki rwa kûvîvia viû, marurumî, ngûa na mbura ya mbembe.

³¹ Asîria nîmagecûrwa nî guoya mûnene rîrîa makeegua mûgambo wa Ngai-Mûnene akîmaringa na mûragi wake.

³² Wa ûrîa Ngai-Mûnene akaamaringa akîmaverithia, nwaguo andû ake makaavûraga tamburini na ngita. Ngai ke mwene nîke ûkaarûa na Asîria.

³³ Nîûndû vandû va kûvîvîria Asîria vaathondekirwe wa tene; vandû vau nî îrima îriku na rîariî, varî na mwaki na ngû nyîngî. Ngai-Mûnene nîagaakania mwaki ûcio ta mwaki wa ûviriti.