Isaia 3 - ÎVUKU RÎA ÛVORO MWARO

Mathîna îtûûrarî rîa Jerusalemu

¹ Rîu Mwathani Ngai-Mûnene mwene vinya wonthe, nîakûthengutîria Jerusalemu na Juda mwîvoko wao, mwîvoko wao wa irio na wa manjî.

² Nîakûthengutia andû arîa njamba na athigari, atucanîri ciira na arathi, aragûri na athuuri,

³ anene a ikundi cia athigari mîrongo îtano, na andû arîa marî gîtîîo, ataarani na andû arîa marî wara wa kûringa ciama, ago na aragûri arîa aûgî mûno.

⁴ Ngai-Mûnene nîagaatûma ciana ituîke anene ao, na atûme ngenge imathage.

⁵ Andû nîmakaavinyanagîrîria, wa mûndû na ûrîa wîngî; andû ethî nîmakaaira andû arîa akûrû, na andû matarî kîene nîmakaaira anene ao.

⁶ Vîndî îo mûndû nîakaanyita mûrwang'ina, marî kwa îthe mûciî amwîre atîrî, “We wî na nguo ya gwîkîra, tuîka mûtongoria wetû, na wathage kûndû gûkû kwomomoku.”

⁷ Nwatî vîndî wa îo nîagaacokia atîrî, “Naarî! Nie ndingîvota kûmûtethia; mûciî gwakwa gûtirî irio kana nguo, mûtikandue mûtongoria wenyu!”

⁸ Andû a Jerusalemu nîavîngîku! Andû a Juda nîagwîu; nîûndû mîario yao na maûndû marîa mekaga nîmareganîte na Ngai-Mûnene, makîreganaga na riiri wake gatagatîrî kao.

⁹ Ûthiû wao nîwonanagia ûrîa marî evia; managîrîra wîvia wao ta wa Sodomu na matiûthithaga. Kaî andû acio marî na thîna-î, nîûndû nîo ene meretererete mathîna.

¹⁰ Andû arîa athingu nîmagaakena, nîmakaarîa matunda ma maûndû marîa mekîte.

¹¹ Nwatî kaî andû arîa aganu marî na thîna-î, Nîûndû maûndû marîa mekîte andû arîa engî nwamo mageekwa.

¹² Andû akwa makaavinyagîrîrua nî ciana na aka mamathage. Mue andû akwa, atongoria enyu nî maramûvîtithia, makamwagagia nîguo mûvîtie njîra îrîa mûkûthiîra.

Ngai-Mûnene nîatucagîra andû ake ciira

¹³ Ngai-Mûnene nîevarîrîtie gûcirithania; nîekarîrîte gîtî atuîre andû ciira.

¹⁴ Ngai-Mûnene nîaracirithia andû; aracirithia athuuri na atongoria a andû ake. Arameera atîrî, “Nîmue mûcûkangîtie mûgûnda wa mîthavibu, na indo irîa mwatavire athîni irî nyombarî cienyu.

¹⁵ Mwîciragia atîa rîrîa mûkûvinyîrîria andû akwa na mûkanyarira athîni?” Ûguo nîguo nie, Mwathani Ngai mwene vinya wonthe, nîraûria.

Aka a Jerusalemu nîmaakaanirue

¹⁶ Ngai-Mûnene augîte atîrî, “Aka a Zayuni marî mwîtîîo, mathiîcaga maûkîrîrîtie ciongo makîîroraroragia, makinyûkagia na mwîcaaro, makîgambagia njang'iri magûrû.

¹⁷ Kwoguo, nie Ngai-Mûnene nîngaamaverithia; aka acio a Zayuni nîngaamenja njuîrî cia ciongo ciao, na nîmarute nguo matigwe marî njaga.”

¹⁸ Mûthenya ûcio Mwathani nîagaacuna aka a Jerusalemu indo irîa megemagia nacio: njang'iri, indo cia kûgemia ciongo, mîkathî,

¹⁹ mindo cia matû, macango na itambaa cia ngingo,

²⁰ itambaa cia ciongo, mîcivi, mvang'iri, mîcivi, tûthandûkû twa mînyamû manungi waro, na ithitû;

²¹ mbete, icûvî cia maniûrûrî;

²² nguo irîa mbaro mûno, nguo cia ndaarî, nguo cia gwîkîra îgûrû rîa irîa ciîngî, mîvuko yao ya njara;

²³ nguo ciao cia kwîyonania nacio, nguo irîa mbaro, iremba na itambaa cia gwîkunîka ûthiû.

²⁴ Vandû va kûgîa na mûnungo mwaro, makaanungaga woru; vandû va kwîyova mîcivi, makeyova mîkanda; vandû va kwîthîrwa na njuîrî nthaka, makethîrwa na ivara; vandû va kwîthîrwa na nguo mbaro, mageekîra matangari; vandû va ûthaka makethîrwa na gîconoko!

²⁵ Arûme enyu makaaûragwa na rûviû, nao andû enyu arîa njamba makaaûragîrwa mbaararî.

²⁶ Ivingo cia îtûûra rîa Zayuni nîikaarîra na icakae, narîo îtûûra rîkethîrwa rîkariî ta mûndûmûka acunîtwe indo cionthe, ekarîte nthî mûtheturî.