Isaia 29 - ÎVUKU RÎA ÛVORO MWARO

Ûrathi wîgiî Jerusalemu

¹ Ûûi Arieli, Arieli, we îtûûra rîrîa Daudi aambîte magema make! Mwaka ûkaga na ûkavîtûka, na irugo ikûngûîrwe mîaka yonthe.

² Kûnarî ûguo nîngaatûma Jerusalemu kûgîe kîeva, na nîgûkaagîa kîrîro na macakaya, na kûrî nie îtûûra rîu rîkethîrwa rîkariî ta metha ya kîgongoona îrî na nthakame.

³ Nie nîngaamûcîgîrîria, nîmûcîgîrîrie na nyomba ndaca na nîmûtharîkîre.

⁴ Nîûgaatungumanua nthî kûndû kûraca; nîûkaaruta mûgambo kuuma rungu rwa mûthetu, nîûkaarutaga mûgambo ûrî rungu rwa mûthetu, mûgambo waku ûkaaumaga na kûu mûtheturî wîkariî ta mûgambo wa ngoma, na mûgambo waku ûkeguîkaga ûkîaria na kîvwe kuuma mûtheturî.

⁵ Nwatî gîkundi Kîam nthû ciaku gîkethîrwa gîkariî ta rûkûngû rûvinyu, nacio nthû ciaku irîa itarî ntha ikethîrwa ciîkariî ta macaki, makaagûrûkua nî rûkûngi wa rîmwe.

⁶ Ngai-Mûnene mwene vinya wonthe nîagaaûka kûrî mue, na njîra ya ngwa, kîthingithia na mûgambo mûnene, rûkûngi rwa ngoma cia aka, rûkûngi rûnene na mwaki wa kûthiria.

⁷ Gîkundi Kîam mavûrûri marîa marûaga na Jerusalemu, marîa monthe marûaga nake, makatharîkîra nthingo ciake cia vinya, na makamûretere thîna, magekara ta kîroto, na ta kîoneki gîa ûtukû.

⁸ Mavûrûri monthe marîa matharîkagîra Kîrîma gîa Zayuni magekara ta mûndû arî mûvûtu akîrota akîrîa irio, kana ta mûndû mûnyondu akîrota akînyua manjî, nwatî akîramûka akethîra arî mûnogu na arî mûnyondu.

Ûgwati wa kûregana na mataaro

⁹ Îritieni na mûtuîke irimû! Vingani metho na mûtuîke ndumumu! Rîwani, nwatî mûtikarîwe nî ndivei; tûgûganani, nwatî mûtigatûgûgithue nî njovi ndûrû!

¹⁰ Nîûndû Ngai-Mûnene nîatûmîte mûnyitwe nî toro na mûmame toro ndito; nîavingîte metho menyu mue arathi, na nîakunîkîte ciongo cienyu, mue oni a maûndû.

¹¹ Kwoguo kûrî mue, cioneki ino cionthe ciîkariî ta ciugo ciandîkîtwe îvukuurî, rîkînavingwa na rîkînavûrwa mûvûûri. Ûngînengera mûndû ûngîvota kûthoma na ûmwîre atîrî, “Ta nthomera ava,” nake akauga atîrî, “Ndingîvota, nîûndû nî kîvinge na gîkavûrwa mûvûûri.”

¹² Ûngînengera mûndû ûtangîvota kûthoma na ûmwîre atîrî, “Ta nthomera îvuku rîîrî,” ke akaauga atîrî, “Ndiîcî kûthoma.”

¹³ Mwathani aaugire atîrî, “Andû aya mamvecaga gîtîîo na mîromo, nwatî ngoro ciao irî kûraca nanie, gîtîîo kîrîa mamvecaga nî Kîam mawatho marîa mathondeketwe nî andû, na makamathoma.

¹⁴ Kwoguo, nîngeka andû aya maûndû ma kûmakania, maûndû ma kûgegania na ma kûmakania. Naguo ûûgî wa andû ao arîa aûgî nîûkaathira, na ûmenyo wa andû ao arîa amenyi ûgaatuîka wa mana.”

Kîîrîgîrîro kîa vuvarî

¹⁵ Andû arîa mathithaga Ngai-Mûnene mîvango yao kaî marî na thîna-î! Marûthagîra mîvango yao ndumarî makiugaga atîrî, “Gûtirî mûndû ûratwona, na gûtirî mûndû ûtwicî.”

¹⁶ Mue mûgarûranagia maûndû monthe. Mûmbi wa nyûngû-î, nwa egananue na yûmba? Kîndû kîthondeketwe nwa kîre mûkîthondeki atî tîke wakîthondekire, kana kîndû kîrî kîûmbe kîre ûrîa wakîûmbire atîrî, “We ndwathondeka,” kana “We ndwîcî wanarî ûndû?”

¹⁷ Nî kavinda kanini gatigarîte Lebanoni îgarûrwe îtuîke mûgûnda mûnoru; naguo mûgûnda ûcio mûnoru ûgatuîka mûtitû.

¹⁸ Mûthenya ûcio itegua nîikegua îvuku rîkîthomwa, nao arîa matûûraga ndumarî marî atumumu nîmakoona.

¹⁹ Andû arîa avooreri nîmakaagîa na gîkeno gîcerû kuuma kûrî Ngai-Mûnene, nao arîa athîni gûkû nthî nîmagaakena nîûndû wa Ûrîa Mûtheru wa Isiraeli.

²⁰ Andû arîa matarî ntha nîmagaacûkangua, na arîa mathekanagîrîra mathirue. Nao arîa onthe meciragia gwîka maûndû ma waganu nîmakaathirua.

²¹ Ngai nîagaacûkangia arîa marutaga ûira wa maveeni nîguo mûndû atuwe mwîvia, arîa mavîtithagia atucanîri ciira magootirî, na arîa maragia maveeni, nîguo maime arîa matarî na mavîtia kîvooto Kîamo.

²² Kwoguo Ngai-Mûnene ûrîa wakûûrire Iburahimu arauga ûvoro wîgiî nyomba ya Jakovu atîrî, “Jakovu ndagaaconorithua rîngî, na ûthiû wake ndûgaatuka rîngî.

²³ Nîûndû rîrîa akoona ciana ciake, wîra wa njara ciakwa, nîmagaakumia rîîtwa rîakwa nie Ûrîa Mûtheru wa Jakovu; na metigîre Ngai wa Isiraeli.

²⁴ Andû arîa ariitu nîmakaagîa na ûmenyo, nao arîa manugunaga nîmagetîkîra kûthomithua.”