Isaia 27 - ÎVUKU RÎA ÛVORO MWARO

¹ Mûthenya ûcio, Ngai-Mûnene nîagooca rûviû rwake rûrîa rûnene na averithie Leviathani, njoka îrîa îgûrûkaga, njoka îrîa îîthioraga, na aûrage njûnamatu îrîa îtûûraga îriarî.

² Mûthenya ûcio Ngai-Mûnene nîakaaina rwîmbo rwîgiî mûgûnda wake mwaro wa mîthavibu atîrî:

³ “Nie Ngai-Mûnene, nînie nîûmenyagîrîra, na ngawîtîrîria manjî vîndî cionthe. Nîûrangagîra ûtukû na mûthenya, nîguo ndûgacûkangue nî mûndû wa wonthe.

⁴ Nie ndikaarakara rîngî nî mûgûnda ûyû. Kûngîrî mîgua na nthaugû kuo nwa ndûire nacio, nwa ndûe nacio na ngaivîvia na mwaki ikathira viû.

⁵ Tiga nwa maûkire kûrî nie nîmagitîre, tiga tûgîe na thayû nao, îî, tiga tûgîe na thayû nao.”

⁶ Vîndî nîgaakinya rîrîa njiarwa cia Jakovu ikaagîa na mîri, Isiraeli nîkaamera na îtheûke, na matunda mayo nîmagecûra nthî yonthe.

⁷ Ngai-Mûnene ndaaverithia Aisiraeli na vinya ta ûrîa aaverithirie nthû ciao. Aisiraeli arîa maaûragîrwe mbaararî, nî anini gûkîra nthû ciao.

⁸ Aaverithirie andû ake na njîra ya kûmavira îthamîriorî. Rîrîa kwarî na rûkûngi rûnene rwa mwena wa îrathîro, nîwamavonokirie kuuma kûrî rûkûngi rûnene.

⁹ Kwoguo ûguo nîguo mavîtia ma Jakovu makaathirua, ûguo nîguo wîvia wake ûkaathirua viû; mathiga marîa matumîte metha cia magongoona, makaathîwa matuîke mûthetu, na gûtirî mîvuanano ya Ashera, ngai ya mûndûmûka, wana kana metha cia kûvîvîria ûbani igaatigara.

¹⁰ Nîûndû îtûûra rîrîa ririgîre rîtigîtwe rîrî rîonga, rîtiganîrîtue na rîkathamwa ta werû. Kûu nîkuo ng'ombe irîthagua na ikamama wa kuo.

¹¹ Mvûa cia mîtî ya kuo nî nyûmû na ikaunîkanga, nao aka nîmathiîcaga kuna ngû cia mîtî îo. Andû aya a Isiraeli nî aritu. Kwoguo Ngai, ûrîa wamaûmbire ndakaameguîra ntha, ke ûrîa mûmaûmbi ndakaamatuga.

¹² Mûthenya ûcio Ngai-Mûnene nîakaaûngania maketha make kuuma rûnjîrî rwa Farati nginya karûnjîrî ka Misiri, namue andû a Isiraeli nîmûkaaûnganua ûmwe kwa ûmwe.

¹³ Mûthenya ûcio karumbeta kanene nîgakaavuvwa, nao Aisiraeli arîa maaûrîrîte vûrûrirî wa Asîria na arîa maavirîtwe îthamîriorî vûrûrirî wa Misiri nîmagaaûka na magoocere Ngai-Mûnene îgûrû rîa kîrîma kîrîa kîtheru Kîam Jerusalemu.