Isaia 26 - ÎVUKU RÎA ÛVORO MWARO

Rwîmbo rwa ûvootani

¹ Mûthenya ûcio, andû nîmakaaina rwîmbo rûrû marî vûrûrirî wa Juda: Tue tûrî na îtûûra rîrî na vinya! Ngai nîke ûtûgitagîra ta ûrîa nthingo igitagîra andû.

² Vingûrani ivingo cia îtûûra, nîguo vûrûri ûrîa mûthingu, na ûrîa mwîvokeku ûtonye ndaarî.

³ We Ngai-Mûnene, arîa magwîtîkîtie, nîûmaigaga marî na thayû mûkinyanîru, nîûndû nwawe mevokete.

⁴ Îîvokage Ngai-Mûnene tene na tene, nîûndû Ngai-Mûnene, Ngai nî îthiga rîa ûgitîri tene na tene.

⁵ Nîûndû nîagwîthîtie arîa metûûgagîria, nîomomorete îtûûra rîrîa rîrî vinya na akarîvaragania mûtheturî.

⁶ Îtûûra rîu nîrîkinyangagwa, na magûrû ma athîni, na ma ngîa.

⁷ Njîra ya andû arîa athingu nî nûngarû; we Ngai-Mûnene nîûrûngaragia njîra cia andû arîa athingu.

⁸ We Ngai-Mûnene nîtûgwetagîrîra, tûrûmîrîrîte matuîro maku ma ciira; na ngoro cietû nwawe ciîriragîria.

⁹ Ngoro yakwa nîîkwîriragîria ûtukû; nie nîngûcaragia na kinyi. Nîûndû rîrîa ûgaatuîra nthî, andû onthe a nthî nîmakaamenya gwîka maûndû ma ûthingu.

¹⁰ Nwatî wana mûndû mwaganu angîguîrwa ntha, nderutaga gwîka maûndû ma ûthingu; wana rîrîa arî vûrûrirî wa andû arîa athingu, nwa ekaga maûndû ma waganu; na ndakenagua nî ûnene wa Ngai-Mûnene.

¹¹ Ûûi Ngai-Mûnene, nîûkîrîrîtie njara yaku ûkîenda kûverithia nthû ciaku, nwatî itirona. Cionie ûrîa wendete andû aku na nîigaaconoka; tiga mwaki wa mang'ûrîka maku ûivîvie.

¹² We Ngai-Mûnene nîûtûvete thayû, nîûtûvotithîtie kûruta mawîra metû monthe.

¹³ Ûûi Ngai-Mûnene, Ngai wetû, nîtwathagwa nî athani engî, nwatî we wenga tu nwawe twicî.

¹⁴ Andû acio nîmaakwire na matigaatûûra mwoyo rîngî; nîmatuîkîte iruru na matikaariûka. We nîwe wamaverithirie na ûkîmathiria, na gûtirî mûndû ûkaamaririkana rîngî.

¹⁵ Nwatî we Ngai-Mûnene nîûtûmîte rûrîrî rwetû rûkûre, nîwaramîtie mîvaka yonthe ya vûrûri wetû, kwoguo we nîûtîîtwe.

¹⁶ Ûûi Ngai-Mûnene, rîrîa maarî thînarî, nîmaagûkaîre, rîrîa wamaverithirie, o nîmaakûvoire.

¹⁷ Wata ûrîa mûndûmûka arî vakuvî gûciara eyunangaga na akarîra nîûndû wa ruuo, nwaguo we Ngai-Mûnene watûmire tûrîre.

¹⁸ Tue twarî na ûrûrû wa gûciara kaana, nwatî twaciarire rûkûngi. Gûtirî ûndû twekire nîûndû wa kûvonokia nthî, tûtiavota kwongerera andû gûkû nthî.

¹⁹ Andû aku arîa akuû nîmagaatûûra mwoyo, mîîrî yao nîkaariûka! Arîa mamamîte mûtheturî nîmagaaûkîra, na maine makenete. Nîûndû îme rîa Ngai-Mûnene nî îme rîa ûtheri, nao arîa marî kwa arîa akuû nîmakaariûka.

Îtuîro na andû gûcokanîrîrua

²⁰ Ûkani andû akwa, tonyani nyombarî cienyu na mwîvingîre kuo; îîthitheni kavinda kanini nginya rîrîa marakara ma Ngai makaathira.

²¹ Nîûndû Ngai-Mûnene nîagaaûka kuuma îgûrû kûrîa ekaraga aûke averithie andû nîûndû wa mavîtia mao. Nayo nthî nîkaaumbûra arîa maaûragirwe na ndîkaathitha rîngî arîa maaûragirwe.