Isaia 25 - ÎVUKU RÎA ÛVORO MWARO

Rwîmbo rwa gûkumia Ngai

¹ We Ngai-Mûnene, nîwe Ngai wakwa; nîngaakwambararia na ngumie rîîtwa rîaku, nîûndû we nîwîkîte maûndû ma magegania; mîvango îrîa wavangire kuuma tene, ûmîvingîtie na wîvokeku na ûûma.

² Nîûtûmîte îtûûra rîtuîke kîrûndo Kîam mathiga, ûgatûma îtûûra ririgîre rîtuîke îganjo. Nyomba ya ûnene ya andû a ndûrîrî nî nyomomore, na ndîgaatumwa rîngî tene na tene.

³ Kwoguo andû arîa marî vinya nîmakaagûkumia; matûûra ma ndûrîrî irîa itarî ntha nîmagaagwîtigîra.

⁴ Nîûndû we nîwe mûgitîri wa andû arîa athîni, mûgitîri wa ngîa vîndî îrîa irî na mathîna. We nîwe ûmagitagîra kuuma kûrî rûkûngi rûnene, na nîwe kîruru Kîamo Kîam vîndî ya ûrugarî. Nîûndû îringa rîa mûndû ûtarî ntha rîkariî ta rûkûngi rûnene rûringîte rûthingo;

⁵ nîta ûrugarî ûrî kûndû kûnyaru. Nwatî we nîûthirîtie înegene rîa ageni; ta ûrîa kîruru gîa îtu kîthiragia ûrugarî, nwaguo ûthiragia nyîmbo cia arîa matarî ntha.

Ngai nîakaavarîrîria kîrugo

⁶ Kîrîmarî gîkî gîa Zayuni, nîkuo Ngai-Mûnene mwene vinya wonthe akaavarîrîria andû onthe kîrugo Kîam nyamû noru, ndivei îrîa mbaro ya kûvivwa, nyamû noru irî na maguta mavîndîrî na ndivei îno ntheru îvivîtwe waro.

⁷ Îgûrû rîa kîrîma gîkî nîkuo Ngai-Mûnene akaathengutîria andû onthe gîtambaa kîrîa kîmakunîkîrîte, gîtambaa kîrîa gîkunîkîrîte mavûrûri monthe.

⁸ Ngai-Mûnene nîakaathiria gîkuû tene na tene, nîakaagiria methori mothiûrî monthe na kûthirîria andû ake gîconoko nthî yonthe. Ngai-Mûnene nîke ugîte ûguo.

⁹ Mûthenya ûcio, andû onthe nîmakaauga atîrî, “Taroriani, ûyû nîke Ngai wetû! Nîke twetererete, nîguo atûvonokie. Ûyû nîke Ngai-Mûnene; nîke twetererete; tigani tûkene na tûcanjamûke nîûndû wa gûtûvonokia.”

Ngai nîakaaverithia Moabu

¹⁰ Ngai-Mûnene nîakaagitîra kîrîma gî Zayuni, nwatî andû a Moabu magaakinyangîrwa kwao ta ûrîa nyaki îkinyangagîrwa îrimarî rîa mborera.

¹¹ Nîmakaambararia njara ciao ta mûndû akîgeria kûthambîra, nwatî Ngai-Mûnene nîakaathiria mwîtîîo wao vamwe na wara wao

¹² Nîakomomora îtûûra rîrîa rîgitîre rîa Moabu na nthingo ndaca ciarîo na aigwîthie nthî.