Isaia 24 - ÎVUKU RÎA ÛVORO MWARO

Ngai-Mûnene nîakaaverithia nthî

¹ Taroria, Ngai-Mûnene nîakûthiria nthî na îtigwe îrî ntheri. Akaamîng'aûrania anyaganie arîa matûûraga kuo.

² Andû onthe nîmakaanyitwa nî maûndû mau: ûrîa gûgekara kûrî andû arîa engî, nwaguo gûgekara kûrî athînjîri-Ngai; kûrî ngombo, na kûrî mûmîathi; kûrî ndungata ya mwîrîtu, na kûrî mûndûmûka mûmîathi; kûrî mûgûri wa indo, na kûrî mwendia wa indo; kûrî mûvecani, na kûrî mûvewa; kûrî mûkovi wa kîndû, na kûrî mûkovithania.

³ Nthî nîgaacûkangua yanangîke viû; nîûndû Ngai-Mûnene nîaugîte guo.

⁴ Nthî nîîkwara indo cionthe ciûme; mavûrûri ma nthî nîmaratangîka na makathirwa nî vinya; îgûrû na nthî nî ithirîte vinya.

⁵ Andû arîa matûûraga gûkû nîmagwatîtie nthî mûgiro, nîûndû nîmaunîte mawatho ma Ngai, makarega kûrûmîrîra kîrîra gîake, na makauna kîrîkanîro gîa tene na tene.

⁶ Kwoguo nthî nîîkûthirua nî kîrumi, andû nao marathînîka nîûndû wa mavîtia mao. Andû arîa matûûraga nthî nîmarathira, na nî andû anini tu magaatigara marî mwoyo.

⁷ Mîthavibu nîravova, nayo ndivei îkathira. Arîa onthe marakenaga rîu marî na kîeva.

⁸ Mîgambo ya tamburini nî mîthiru, înegene rîa gîkeno nî rîthiru, mîgambo ya ngita nî mîthiru.

⁹ Gûtirî kwina makînyua ndivei rîngî; arîa manyunyaga ndivei maregua îrî ndûrû.

¹⁰ Îtûûrarî gûtirî na thayû na nîgûcûkangie, nyomba cionthe nî mvinge nîguo gûtigatonye mûndû.

¹¹ Kûrî na kîrîro na kûu njîrarî nîûndû wa gûtura ndivei; gîkeno kîonthe nî kîthiru; nthî ndîrî na gîkeno.

¹² Îtûûra rîu rîgaatigwa rîrî maganjo; ivingo cia rîo nî munange.

¹³ Ûguo nîguo gûgekara mavûrûrirî monthe ma nthî, wata ûrîa mûtamaiyû wîkaraga maketha mathira, gûtigaraga ndamaiyû nini cia mûthiia, nwaguo gûgaatigara andû anini marî mwoyo.

¹⁴ Andû arîa magaatigara nîmakaugîrîria, nîmakaaina makenete. Arîa marî mwena wa îthûîro nîmakaanîrîra ûnene wa Ngai-Mûnene.

¹⁵ Kwoguo mue mûtûûraga mwena wa îrathîro kumiani Ngai-Mûnene. Arîa mûtûûraga ndeererî cia îria kumiani Ngai-Mûnene, Ngai wa Isiraeli.

¹⁶ Nîtûregua nyîmbo cia gûkumia Ngai ûrîa mûthingu, ikinwa kuuma mîthiia ya nthî. Nwatî ngoro yakwa nî ndito nî kîeva, nama, ngoro yakwa nî ndito! Ndirî na kîîrîgîrîro! Andû arîa acukanîrîri mekaga maûndû ma ûcukanîrîri, na ûcukanîrîri ûthiîte na mbere kwongerereka.

¹⁷ Guoya, marima na mîtego, nîcio imwetererete, mue mûtûûraga nthî.

¹⁸ Mûndû ûrîa ûkaaûra nî înegene, akaagwa îrimarî rîu; nake ûrîa ûkaauma îrimarî, akaagwatwa nî mûtego. Nîûndû ndirica cia îgûrû nî mvingûre, nayo mîcingi ya nthî nîîrainaina.

¹⁹ Nthî nî manangîku viû, nthî nî mbatûkangu, nthî nîrathingitha na vinya mûno.

²⁰ Nthî îratûgûgana ta mûrîu wa njovi, îrainaina ta îgema. Mevia mayo nîmamîritûvîrîte mûno; îkagwa na ndîkaarûngama rîngî.

²¹ Mûthenya ûcio Ngai-Mûnene nîakaaverithia ciûmbe, ciûmbe cia îgûrû ikaaverithîrua kûu îgûrû, na athamaki a nthî maverithîrue gûkû nthî.

²² Ngai nîakaamaûngania onthe vamwe îrimarî ta mîgwate; nîmakaavingîrwa njeera mîthenya mîîngî, na mîthenya îo yathira nîmakaaverithua.

²³ Mweri nîûgaaconorithua, narîo riûa rîguithue nthoni, nîûndû Ngai-Mûnene mwene vinya wonthe nîakaathana, arî îgûrû rîa Kîrîma gîa Zayuni kûu Jerusalemu, na nîakoonania riiri wake kûrî atongoria a andû ake.