Isaia 23 - ÎVUKU RÎA ÛVORO MWARO

Ndûmîrîri îgiî Foenike

¹ Îno nîyo ndûmîrîri îgiî Turo. Mue meri cia Tarishishi, rîrani, nîûndû îtûûra rîa Turo nîrîcûkangie. Nyomba ciakuo na kûrîa meri irûngamaga nîkwomomore. Nîmûkaamenyithua ûvoro ûcio mwacoka kuuma Kuporo.

² Kirani na mûmake, mue mûtûûraga rûtererî rwa îria; takirani, mue andû a Sidoni arîa mûgûraga mûkendia indo, anjaama enyu mathiîcagîrîra îriarî,

³ mavîtûkîrîrîte manjîrî meengî; mamûretagîre ngano kuuma Shihoru, mwagûraga na mûkendanîria na mavûrûri monthe.

⁴ Conoka we Sidoni, îtûûra rîgitîre rûtere rwa îria, nîûndû îria nîrîarîtie rîkauga atîrî, “Ndianegua ûrûrû wa gûciara na ndianaciara; ndianarera anake kana ndera erîtu.”

⁵ Rîrîa ûvoro ûgaakinyîra andû a Misiri, nîmakaamaka megua atî îtûûra rîa Turo nîrîcûkangie.

⁶ Ringani mûthiî Tarishishi! rîrani mue mûtûûraga rûtere rwa îria!

⁷ Rîîrî nîrîo îtûûra rîa Turo rîrîa rîarî rîa ikeno, îtûûra rîatumirwe tene, na andû a kuo maathiîre gûtûûra mavûrûri ma kûraca?

⁸ Nû wavangire maûndû mama megiî Turo, îtûûra rîrîa riumaga athamaki; kûrîa agûri na endia a indo maarî anene, na maatîîtwe nthî yonthe?

⁹ Ngai-Mûnene mwene vinya wonthe, nîke wavangire maûndû mama monthe. Eekire ûguo nîguo athirie mwîtîîo wa andû a kuo, na aconorithie arîa maveetwe gîtîîo nthî yonthe.

¹⁰ Mue arîa mûtûûraga Tarishishi rîmani mîgûnda yenyu; nîûndû mûtirî na kîndû gîa kûmûrigîrîria rîngî.

¹¹ Ngai-Mûnene nîatambarûkîtie njara yake îgûrû rîa îria, na akainainia mothamaki; nîarutîte watho atî kûrîa kuonthe kûgitîre Kanaani gûcûkangue.

¹² Ke nîwaugire atîrî, “We mwarî wa Sidoni, ndûgaakena rîngî; wana ûkaûra ûkînathiî Kuporo, wana kûu ndûkoona ûvurûko.”

¹³ Akalidei nîo maarekererie nyamû cia kîthaka itharîkîre îtûûra rîa Turo nwatî tî Asîria. Akalidei maatumire nyomba ndaca na îgûrû ithiûrûrûkîrîtie îtûûra rîu, makîomomora nyomba cia kuo na magîtiga îtûûra rîu rîrî îganjo.

¹⁴ Mue meri cia Tarishishi rîrani, nîûndû îtûûra rîenyu rîa kûûrîra nî rîcûkangie.

¹⁵ Îtûûra rîa Turo nîrîkaariganîra îvinda rîa mîaka mîrongo mûgwanja (70), îvinda ta rîrîa mûthamaki atûûraga mwoyo. Rîrîa mîaka mîrongo mûgwanja îkaathira, îtûûra rîa Turo rîkethîrwa rîkariî ta rwîmbo rwinaga rwa maraa rwinagwa atîrî,

¹⁶ “Oca ngita yaku, ûthiûrûrûke îtûûra, we îraa rîîrî îriganîru! Ina nyîmbo irîa mbaro. Ina nyîmbo nyîngî, nîguo ûririkanwe rîngî.”

¹⁷ Vuva wa mîaka mîrongo mûgwanja, Ngai-Mûnene nîagaacokerera îtûûra rîa Turo. Nwatî nîrîgacokerera wîra warîo wa kûvûra ûmaraa ta mbere na nîrîkaavûra ûmaraa na mavûrûri monthe ma nthî.

¹⁸ Mbeca irîa rîkaagîa nacio ikaamûrîrwa Ngai-Mûnene. Mbeca icio itikaigwa, nwatî nîigaatûmîrwa nî arîa magoocaga Ngai-Mûnene kûgûra irio nyîngî na nguo mbaro.