Isaia 22 - ÎVUKU RÎA ÛVORO MWARO

Ndûmîrîri îgiî Jerusalemu

¹ Îno nî ndûmîrîri nene îgiî Kîanda gîa Kîoneki. Nîkwa kûrî na ndûî, rîu andû onthe maratwa nyomba îgûrû?

² Nîndûî kîratûma mugîrîrie mûkenete, îtûûra rîonthe rîcûrîtwe nî wagagu na înegene. Andû enyu arîa maakwire matiaûragwa na mviû, na matiaûragîrwa mbaararî.

³ Atongoria enyu onthe nîmaaûrire, nao nîmaanyitirwe wana mataikîtie mûguî wanarî ûmwe. Andû enyu onthe arîa maanyitîkanire nî maatavirwe, wana ethîrwa nîmaaûrîte makathiî kûndû kûraca.

⁴ Kwoguo rîu nîramwîra atîrî: Mûtigatindanîre nanie, tiganani nanie ndîre methori ma ruuo, mûtikethînie kûmvoreria nîûndû wa ûrîa andû akwa macûkangîtue.

⁵ Nîûndû ûmûnthî Ngai-Mûnene mwene vinya wonthe, nîatûreterete kîmako, gûcindwa na kîvîngîcî, gûkû Kîandarî gîa Kîoneki. Nthingo cia îtûûra nî nyomomore, na înegene rîa andû akuo nî rîreguîka nginya irîma.

⁶ Athigari a mbaara a Elamu nîmaaûkire na mota na mîguî, marî na ikaari cia mbaara na andû matwîte mbarathi, nao athigari a Kiri nîmaavarîrie ngo ciao.

⁷ Ciandarî ciaku mbaro we Jerusalemu, gwecûrîte ikaari cia mbaara na mbarathi; nao andû arîa mathiîcaga matwîte mbarathi maarangîrîte ivingorî.

⁸ Ûgitîri wonthe wa Juda nîwagwîre. Mûthenya ûcio, nîmwathiîre gûcaria indo cia mbaara irîa ciaigîtwe vandû vetagwa Nyomba ya Mûtitû,

⁹ na mûkîona atî nthingo cia îtûûra rîa Daudi ciarî mbatûkangu kûndû kwîngî na nîmwecûririe manjî kariarî ka mwena wa ngurumo.

¹⁰ Nîmwatarire nyomba cionthe cia Jerusalemu, mûkîomomora imwe ciacio nîguo mûgîe na mathiga ma gûcokereria nthingo cia îtûûra nîguo igîe vinya.

¹¹ Nîmwatumire îtangi gatagatî ka nthingo igîrî nîguo rigage manjî rîrîa magwîtîka kuuma kariarî karîa ka mbere. Nwatî mûtiacaria Ngai ûrîa wavangire maûndû mau, na mûtiaûria ûtethio wa Ngai ûrîa wavangire maûndû mau kuuma tene.

¹² Mûthenya ûcio Ngai-Mûnene mwene vinya wonthe, nîwamwîtire mûrîre na mûcakae, mwenje njuîrî na mwîkîre nguo cia macakaya.

¹³ Vandû va ûguo, mwakenire na mûgîkûngûîra, nîmwathînjire ndegwa na ng'ondu, mûkîrîa nyama na mûkînyua ndivei. Nîmwaugire atîrî, “Tiga tûrîe na tûnyue, nîûndû rûyû nîtûgaakua.”

¹⁴ Ngai-Mûnene mwene vinya wonthe nîwanguûrîrie akîmbîra atîrî, “Nama, mûtikoverwa wîvia ûyû nginya rîrîa mûgaakua.” Ûguo nîguo Ngai-Mûnene mwene vinya wonthe augîte.

Ngai nîwakaanirie Shebuna

¹⁵ Ngai-Mûnene mwene vinya wonthe nîwambîrire atîrî, “Thiî kûrî Shebuna mûmenyereri wa mûciî wa mûthamaki na ûmûrie,

¹⁶ ‘Ûreka atîa gûkû, na mûrî na û? Nîwagîrîrwe wîyacîre mbîrîra yaku gûkû vandû vatûgîru rwararî rwa îthiga?

¹⁷ We wî mûndû ûrî na vinya, nwatî Ngai-Mûnene nîagaakûnyita na agwikie na vinya kûndû kûraca.

¹⁸ Agaakûnyita akûthiûrûrûkie, acoke aguikie ta mûvira na agwikie vûrûrirî mwariî. Kûu nîkuo ûgaakuîra ûrî vakuvî na ikaari ciaku cia mbaara icio wîtîîaga nacio. We wî gîconoko kûrî nyomba ya mwathi waku.

¹⁹ Nîngaakûruta wîrarî waku, na ngûvarûrûkie ume ûnenerî waku.’

²⁰ “Mûthenya ûcio nîngeta ndungata yakwa Eliakimu, mûvîcî wa Hilikia.

²¹ Nîngaamwîkîra nguo yaku ya ûnene, nîmwove mûcivi na nîmûve ûnene waku. Ke nîagaatuîka îthe wa andû a Jerusalemu na nyomba ya Juda.

²² Nîngaamûnengera cavi ya nyomba ya Daudi. Angîvingûra, gûtirî mûndû ûkaavinga; na angîvinga, gûtirî mûndû ûkaavingûra.

²³ Nîngaavanda Eliakimu na kinyi ta mûcumarî ûvûrîrîtwe vandû na nîakaavewa gîtîîo nî andû a nyomba ya îthe.

²⁴ “Nao andû ao onthe a mûciî wake, anini na anene nîmagaacuragîrîra kûrî ke ta thaburia na mbakûri icuurîtue mûcumarîrî.

²⁵ Ngai-Mûnene mwene vinya wonthe augîte atîrî, ‘Rîrîa mûthenya ûcio ûgaakinya, mûcumarî ûrîa wamundîrîrîtwe vandû na kinyi nîûkagûka. Nîûkagûka na ûgwe nthî, naguo mûrigo ûrîa wenyitîrîrîte mûcumarîrî ûcio nîûkaagwa. Nie, Ngai-Mûnene nînie nauga ûguo.’ ”