Isaia 21 - ÎVUKU RÎA ÛVORO MWARO

Kîoneki kîgiî kûgwa kwa Babuloni

¹ Îno nîyo ndûmîrîri îgiî ûrathi wa Babuloni: Ta ûrîa rûkûngi rûnene rûvurutanaga kuuma îveti, ûguo nîguo thîna mûnene ûgaaûka umîte werûrî, vûrûrirî wa gwîtigîrwa.

² Nîmonetue kîoneki gîa kûmakania; kîoneki Kîam arîa maîaga makîîa, na arîa macûkangagia magîcûkangia. Mue andû a Elamu, unûkiani mûthiî mbaararî; mue andû a Media cîgîrîriani Babuloni! Ngai nîagûtûma mînyamaaro îrîa Babuloni aretete îthire.

³ Maûndû marîa noonire na ngîgua nîmaatûmire mbîgua ûrûrû mûno, nîrî mwîcûre nî ûrûrû mwîngî, ûrûrû ta wa mûndûmûka agîciara. Nînîratuurwa mûno nginya ngaremwa nî kwîgua, nîrî mûmaku mûno nginya ngaremwa nî kwona.

⁴ Ngoro yakwa nî îratumatuma, na nîrîmwîcûre nî guoya. Nîneriragîria kîvwaî gîkinye, nwatî rîrîa gîakinyire nîgîatûmire minaine.

⁵ Îruga rînene nîrîavarîrîrue, metha igatandîkwa, na andû makîrîa na makînyua. Wa rîmwe mûgambo nîwaugire atîrî, “Ûkîrani mue athamaki! Varîrîriani ngo cienyu!”

⁶ Mwathani nîwacokire akîmbîra atîrî, “Thiî wige mûrangîri, mwîre anagîrîre maûndû marîa arona.

⁷ Rîrîa akoona andû mathiîte aîrî aîrî, matwîte mbarathi, andû matwîte mvunda na engî matwîte ngamîîra, mwîre akaaroria waro, akaaroria na kinyi.”

⁸ Mûrangîri ûcio nîwacokire akiugîrîria atîrî, “Mwathani, nûngamaga nyombarî ndaca na îgûrû ngîrangîra, mûthenya na ûtukû!”

⁹ Taroria maûkîte matwîte mbarathi, na marî aîrî kwa aîrî. Mûrangîri ûcio nîwacokire akiuga atîrî, “Babuloni nîngwîu! Mîvuanano yonthe ya ngai ciakuo nîmiunange na îkagwîthua nthî.”

¹⁰ Mue Isiraeli andû akwa, mûrî avûûre na mûkagûrûkua ta ngano. Nîramwîra maûndû marîa mbîguîte, kuuma kûrî Ngai-Mûnene mwene vinya wonthe, Ngai wa Isiraeli.

Ndûmîrîri îgiî Edomu

¹¹ Îno nî ndûmîrîri nene îgiî Edomu, nînîregua mûndû agîtana kuuma Seiru, “Mûrangîri, ûtukû ûtigarîtie vegana atîa ûthire? Gûgaakîa rî?”

¹² Nanie mûrangîri ngîcokia atîrî, “Nîgûkîa, na gûcoke gûtuke rîngî. Wenda kûria ûria, thiî ûûke rîngî.”

Ndûmîrîri îgiî Arabia

¹³ Ûyû nî ûrathi wîgiî Arabia. Mue andû a Dedani mûthiîte mûrûmanîrîrîte, rarîrîrani werûrî wa Arabia ûmûnthî.

¹⁴ Mue arîa mûtûûraga vûrûrirî wa Tema, kundiani andû arîa anyondu manjî; vani andû acio maûrîte irio.

¹⁵ Andû acio nîkwa maûrîrîte mviû, icomoretwe nîguo maûragwe nacio, maûrîrîte mota matungîtwe marathwe na ûgwati wa mbaara.

¹⁶ Mwathani nîwacokire akîmbîra atîrî, “Varî îvinda rîa mwaka ûmwe, ta ûrîa ûtaragîrwa mûruti wa wîra, riiri wonthe wa Kedari nîûkaathira.

¹⁷ Andû arîa njamba maikagia mîguî a ciana cia Kendari, nî andû anini tu gatagatîrî kao magaatigara. Nie, Ngai-Mûnene, Ngai wa Isiraeli, nînie nauga ûguo.”