Isaia 2 - ÎVUKU RÎA ÛVORO MWARO

Thayû wa gûtûûra tene na tene

¹ Îno nîyo ndûmîrîri îrîa Isaia mûvîcî wa Amozu aveerwe îgiî Juda na Jerusalemu:

² Mavinda nî magaakinya rîrîa kîrîma kîrîa hekarû ya Ngai-Mûnene îtumîtwe, gîgaatuwa kîrîma kîraca gûkîra irîma cionthe, na gîtûgîrue gûkîra tûrîma tuonthe. Mavûrûri monthe nîmakaathiî kuo.

³ Andû eengî nîmakaathiî kuo na mauge atîrî, “Ûkani, tunûkie kîrîmarî Kîam Ngai-Mûnene, tûthiîni nyombarî ya Ngai wa Jakovu, nîguo atûthomithie mîthiîre yake, natue tûrûmagîrîre njîra ciake. Nîûndû watho ûkaauma Zayuni, na ndûmîrîri ya Ngai-Mûnene îkaauma Jerusalemu.”

⁴ Ngai nîagaatuithania ciira gatagatî ka mavûrûri, na nîakeguîthania ndûrîrî nyîngî; magaatura mviû ciao cia njûra ituîke macembe ma mîraû, namo matumû mao matuîke tûviû twa gûcaa. Vûrûri ndûkaarûa na vûrûri ûrîa wîngî, kana merute kûrûa rîngî.

⁵ Rîu, mue njiarwa cia Jakovu, ûkani tûthiîre ûtherirî wa Ngai-Mûnene.

Mwîtîîo nîûkaathirua

⁶ Rîu we Ngai, nîûtiganîrîtie andû aku, njiarwa cia Jakovu, nîûndû aringi a mbûgû kuuma mwena wa îrathîro mecûrîte kwao, na oni maûndû ta Afilisiti, na nîmanyitanagîra na andû ageni.

⁷ Vûrûri wao wîcûrîte sîlûva na thaavu, na mûthithû wao ndûngîthira. Vûrûri wao wîcûrîte mbarathi, na ikaari ciao cia mbaara itingîtarîka.

⁸ Vûrûri wao wîcûrîte mîvuanano, na magoocaga indo irîa marûthîte na njara ciao.

⁹ Kwoguo wa mûndû nîakegwithua nthoni na aconorithue. We Ngai ndûkamovere wanarî vanini!

¹⁰ Tonyani îthigarî na mwîthithe marimarî, nîguo mûrîre marakara ma Ngai-Mûnene na riiri wa vinya wake!

¹¹ Mwîtîîo wa andû nîûkaathirua, na mwîcaaro wa andû onthe ûcûkangue, na Ngai-Mûnene tu nîke ûgaakumua mûthenya ûcio.

¹² Mûthenya wa Ngai-Mûnene, mwene vinya wonthe nîûgaakinya, nîakaaverithia arîa onthe metîîaga na meyonaga marî aro, na arîa onthe metûgagîria.

¹³ Nîagaakinda mîtarakwe yonthe ya Lebanoni, îrîa mîraca na mîaro, na mîvuru yonthe vûrûrirî wa Bashani.

¹⁴ Nîakeeganania irîma cionthe irîa ndaca na îgûrû, wana tûrîma tuonthe tûrîa tûnini.

¹⁵ Nîakoomomora nyomba cionthe irîa ndaca, wana nthingo cionthe cia vinya cia kwîgitîra.

¹⁶ Nîagaacûkangia meri cia Tarishishi, na acûkangie matarû monthe mathaka.

¹⁷ Mwîtîîo wonthe wa andû nîûkaanyivua, na mwîcaaro wa andû nîûkaathirua, na Ngai-Mûnene wenga tu nîke ûgaakumua mûthenya ûcio.

¹⁸ Mîvuanano yonthe nîkaathira viû.

¹⁹ Andû nîmagaatonya ngurungarî cia mathiga, na matonye marimarî ma nthî, nîguo maûrîre marakara ma Ngai-Mûnene, na vinya wa riiri wake, rîrîa agaaûka kûmakia nthî.

²⁰ Mûthenya ûcio, andû nîmagaaikîria mbuko na mvuvu, mîvuanano yao ya sîlûva na ya thaavu, îrîa meerûthîre nîguo mamîgoocage.

²¹ Andû nîmakethitha ngurungarî cia mathiga, na mîanyarî ya mathiga, nîguo maûrîre marakara ma Ngai-Mûnene, na riiri wa vinya wake rîrîa agaaûka kûmakia nthî.

²² Ndûkevoke mûndû wa gûkû nthî. Ûtûûro wake ûthiraga ta mîvevû. Mûndû nîwa vata ûrîkû?