Isaia 19 - ÎVUKU RÎA ÛVORO MWARO

Ngai nîakaaverithia Misiri

¹ Îno nîyo ndûmîrîri îgiî Misiri: Ngai-Mûnene nîaûkîte vûrûrirî wa Misiri, aûkîte ekarîrîte îtu rîthiîte na îvenya, mîvuanano ya ngai cia Misiri nîgaatetemaga îrî mbere yake, nao andû a Misiri nîmakaathira vinya ngoro.

² Ngai-Mûnene augîte atîrî, “Nie nîngaatûma andû a Misiri marûe o ene: wa mûndû nîmakaarûa na mûrwang'ina, wa mûndû marûe na ûrîa mariganîtie nake, wa îtûûra rîrûe na îtûûra rîrîa rîngî, na mûthamaki nîakaarûa na mûthamaki ûrîa wîngî.

³ Nîngaathiria ûrûme wa andû a Misiri, na njûkangie mîvango yao. Nîmakaaûria ûtaaro kûrî mîvuanano na aringi ciama, na kûrî ago na arogi.

⁴ Nîngaanenganîra andû a Misiri kûrî mûtongoria mwaganu, na nîmakaathwa nî mûthamaki ûtarî ntha. Nie Ngai-Mûnene mwene vinya wonthe, nînie nauga ûguo.”

⁵ Manjî ma Rûnjî rwa Nilo nîmakaavûa, naruo rûnjî rûnyare.

⁶ Mîtaro ya rûnjî rûu nîkaanunga, na tûrûnjî tûrîa tûviraga manjî rûnjîrî rwa Nilo nîtûkaavwa. Mûthanje na nyaki nîikoora,

⁷ ndere na nguvarî cia Rûnjî rwa Nilo gûtikaamera kîndû. Na kîrîa kîonthe gîkaavandwa nîgîkaaûma, na kîgûrûkue nî rûkûngi kîûre.

⁸ Ategi onthe a nthamaki nîmakaarîra na macakae, arîa onthe mategaga na ndûano nîmakaarîra, nao arîa mategaga na neti nîmakaathirwa nî vinya.

⁹ Arîa matumaga nguo na arîa marûthaga ngoora cia vamba, nîmagaakua ngoro.

¹⁰ Itugî cia vûrûri nîikaaunangwa, na aruti wîra wa kîvarûa nî makegua kîeva.

¹¹ Atongoria a îtûûra rîa Zoani nî aritu mûno; ataari a mûthamaki wa Misiri mavecanaga mataaro ma ûrimû. Mangîvota atîa kwîra mûthamaki wa Misiri, atî o nî njiarwa cia andû arîa aûgî, njiarwa cia athamaki a tene atîa?

¹² We mûthamaki wa Misiri marî kû andû acio aku aûgî? Tiga makwonie na makwîre, maûndû marîa Ngai-Mûnene mwene vinya wonthe, avangîte gwîka vûrûri wa Misiri.

¹³ Atongoria a Zoani nî aritu, na atongoria a Memufisi nîaveenie; magîrîrwe nî gûtongoria andû, nwatî nîmavîtithîtie vûrûri wa Misiri.

¹⁴ Ngai-Mûnene nîatûmîte mavecane mataaro mavîngîcanu, nîmatûmîte andû a Misiri magaage mawîrarî mao monthe, na magatûgûga ta ûrîa mûrîu atûgûgaga agîtavîkaga.

¹⁵ Gûtirî mûndû vûrûrirî wa Misiri, arî gîtonga kana mûthîni, mûndû ûrî îgweta kana ûtarî îgweta, ûngîvota gwîka ûndû wa vata.

Andû a Misiri nîmakaagooca Ngai-Mûnene

¹⁶ Mûthenya ûcio andû a Misiri nîmakegua guoya ta aka, mainaine nî guoya rîrîa makoona Ngai-Mûnene mwene vinya wonthe aûkîrîrîtie njara yake nîguo amaverithie.

¹⁷ Andû a Misiri nîmakaanyitwa nî guoya nîûndû wa vûrûri wa Juda. Mûndû wa wonthe ûkaagweterwa ûvoro wa Juda nîagetigîra nîûndû wa ûrîa Ngai-Mûnene mwene vinya wonthe avangîte kûmeka.

¹⁸ Mûthenya ûcio wakinya, nîgûkaagîa na matûûra matano vûrûrirî wa Misiri kûrîa rûthiomi rwa Kîhibirania rûkaaragua. Andû a matûûra mau nîmakevîta na mauge atî makethagîrwa marî evokeku kûrî Ngai-Mûnene mwene vinya wonthe. Îtûûra rîmwe rîamo rîgeetwa, “Îtûûra rîa Riûa.”

¹⁹ Mûthenya ûcio gûkethîrwa kûrî na metha ya kîgongoona ya Ngai-Mûnene vûrûrirî wa Misiri, na gîtugî Kîammûrîrîtwe Ngai-Mûnene kîrî mûvakarî wa vûrûri ûcio.

²⁰ Metha îo ya kîgongoona îgaatuîka kîmenyithia na ûira kûrî Ngai-Mûnene mwene vinya wonthe vûrûrirî wa Misiri. Rîrîa andû a kuo makaarîrîra Ngai-Mûnene amatethie kuuma kûrî arîa mamavinyagîrîria, ke nîakaamatûmîra mûmatethia wa kûmagitîra na kûmavonokia.

²¹ Ngai-Mûnene nîakemenyithania kûrî andû a Misiri, nao nîmakaamûmenya na mamûgooce, na mamûrutagîre magongoona na matega ma kûvîvua. Nîmakevîta kûrî Ngai-Mûnene na mavingie mîvîtwa îo.

²² Ngai-Mûnene nîakaaverithia andû a Misiri, acoke amavonie; nao nîmakaamûcokerera nake nîakegua mathaithana mao na amavonie.

²³ Mûthenya ûcio, nîgûkethîrwa kûrî na varavara nene yumîte Misiri îthiîte vûrûrirî wa Asîria. Andû Asîria nîmagaceraga Misiri, nao andû a Misiri nîmagaceraga Asîria; nao andû a Misiri na andû a Asîria nîmakaagooca Ngai vamwe.

²⁴ Mûthenya ûcio vûrûri wa Isiraeli nîûkaanyitanîra na vûrûri wa Misiri na wa Asîria; namo mavûrûri mau mathatû nîmagaatuîka kîrathimo kûrî nthî yonthe.

²⁵ Ngai-Mûnene mwene vinya wonthe nîakaamarathima akiugaga atîrî, “Mûrorathimwa andû akwa a Misiri, mûrorathimwa andû a Asîria arîa naûmbire na njara ciakwa, na Aisiraeli arîa nîîthuurîrîte.”