Isaia 17 - ÎVUKU RÎA ÛVORO MWARO

Ngai nîakaaverithia Sîria na Isiraeli

¹ Îno nî ndûmîrîri ya Ngai-Mûnene îgiî Damesiki. “Damesiki ndîgaatuîka îtûûra rîngî; îgaatuîka îganjo.

² Matûûra ma Sîria nîmatûûra marî mathame tene na tene. Ng'ondu na ng'ombe nîcio igekaraga kuo, ikaamamaga kuo na gûtirî mûndû ûkaaimakia.

³ Matûûra marîa magitîre ma Efiraimu nîmagaacûkangua, naguo ûthamaki wa Damesiki ûthire. Nao andû a Sîria arîa magaatigara marî mwoyo makaagîa na gîconoko ta andû a Isiraeli; nie Ngai-Mûnene mwene vinya wonthe nînie nauga ûguo.”

⁴ “Mûthenya nîûgaakinya, rîrîa riiri wa Isiraeli ûkaanyivanyivua, na ûtonga wa kuo ûthire.

⁵ Isiraeli îkethîrwa îkariî ta mûgûnda mûkethe ngano, ageekwa ta mûkethi wa ngano, îkethîrwa îkariî ta mûgûnda mûkethe Kîamndarî Kîam Refaimu.

⁶ Gûgaatigara andû anini, ta mûtamaiyû ûrî mûkethe, ûgatigara na ndamaiyû igîrî kana ithatû rûvûarî rwa îgûrû, kana mûtî wa matunda ûkethetwe, ûgatigara matunda mana kana matano mvûarî cia guo. Nie Ngai-Mûnene, Ngai wa Isiraeli, nînie nauga ûguo.”

⁷ Mûthenya ûcio, andû nîmakaaroria ûrîa Wamaûmbire na magarûrûkîre Ûrîa Mûtheru wa Isiraeli.

⁸ Matikaaroria rîngî metha cia magongoona irîa matumîte na njara ciao, kana marorie irîa maturîte o ene îrî mûvuanano wa ngai ya mûndûmûka ya Ashera kana metha cia magongoona cia kûvîvîria ûbani.

⁹ Mûthenya ûcio, matûûra mao marîa magitîre magaatigwa marî maganjo ta matûûra marîa maatiganîrue nî Ahivi na Amori rîrîa maaûrire nî andû a Isiraeli.

¹⁰ We Isiraeli, nîûriganîrîtwe nî Ngai ûrîa wakûvonokirie, ndûririkanaga Îthiga rîrîa rîkûgitagîra. Kwoguo, mûvandîte mîmera mîgûnda mwamûrîrîte Ngai, nîguo mûgoocagîre ngai ng'eni kuo.

¹¹ Wana mwatûma îkûre mûthenya wa ûcio mwamîvanda, na mûtûme îrae kîraûko wa kîu mwamîvanda, wanarîo gûtikethîrwa na maciaro. Ûcio ûkethîrwa wî mûthenya wa kîeva na ruuo rûtangîthira.

Mavûrûri marîa nthû nîmaavootirwe.

¹² Aia, ûcio nî mûrurumo wa andû eengî, mararuruma ta ûrîa îria rîrurumaga. Aia, nî mûrurumo wa ndûrîrî, irî na mûrurumo ta wa manjî meengî.

¹³ Mavûrûri mararuruma ta manjî meengî, nwatî Ngai nîakaamagûkia nao maûre mathiî kûndû kûraca, makaavinyûrua ta ûrîa macaki magûrûkagua nî rûkûngi kîrîmarî îgûrû, kana ta ûrîa rûkûngû rûmbûragwa nî rûkûngi rûnene.

¹⁴ Nîmatûmaga kûgîe na kîmako kîvwaî, nwatî mbere ya gûkîe kîmako gîkathira. Rîu nîrîo îgai rîa arîa matûtavaga indo cietû, na îrîvi rîa arîa matûcunaga indo cietû.