Isaia 15 - ÎVUKU RÎA ÛVORO MWARO

Ngai nîagaacûkangia Moabu

¹ Îno nîyo ndûmîrîri ya Ngai îgiî Moabu: Îtûûra rîa Ari na rîa Kiri nîmacûkangîtue ûtukû ûmwe, naguo vûrûri wa Moabu ûkirîte îvooru.

² Andû a Diboni nîmaunûkîtie kûrîa magoocagîra magacakae. Andû a Moabu mararîrîra matûûra ma Nebo na Medeba. Andû onthe nî enju ciongo ciao na makenja nderu ciao,

³ maravîtûkîrîra njîrarî mekîrîte nguo cia macakaya; maracakaya makîrîraga methori marî nyombarî îgûrû na ivaarorî cia matûûra.

⁴ Andû a Heshiboni na a Eleale nîmararîra, kîrîro Kîamo nî kîreguîka nî andû marî Jahazi. Athigari a Moabu nîmararîra maugîrîrîtie; ngoro ciao nîiratetema.

⁵ Ngoro yakwa nîîrarîrîra Moabu! Andû a kuo maûrîte makathiî Zoari, na Egilathi-shelishiya. Maunûkîtie na njîra îrîa îthiîte Luhithi makîrîraga; marî njîrarî mathiîte Horonaimu, nîmarauga mbu nî ûrîa macûkangîtue.

⁶ Karûnjî ka Nimurimu nî kavwîu; nyaki ya kuo nî nyûmû, mîmera nî mîvovu, gûtirî kîndû kîrakûra kuo.

⁷ Andû mararinga karûnjî ka Wilosi, makuuîte indo ciao cionthe irîa maagîte nacio, wana irîa meeigîrîte mûthithû.

⁸ Vûrûri wonthe wa Moabu wîcûrîte kîrîro, macakaya makinyîte Egilaimu na Beeri-elimu.

⁹ Manjî monthe ma Diboni mecûrîte nthakame; kûnarî ûguo, Ngai nîakûgera ngero nene Diboni. Andû arîa makaaûra kuuma vûrûrirî wa Moabu, na arîa magaatigara makaaûragwa nî mûnyambû.