Isaia 13 - ÎVUKU RÎA ÛVORO MWARO

Ngai nîakaaverithia Babuloni

¹ Îno nî ndûmîrîri îgiî Babuloni îrîa Isaia, mûvîcî wa Amozu oonirue nî Ngai.

² Ngai augîte atîrî, “Vandani vendera îgûrû rîa kîrîma gîtarî na mîtî, ugîrîriani mwîte athigari, na mûmavenerie na njara, nîguo matonyere kîvingo gîa îtûûra rîa andû arîa marî îgweta.

³ Nie mwene nîmbathîte arîa nyamûrîte, nîmbîtîte andû akwa arîa njamba arîa makenaga rîrîa navootana, makarûe na arîa mandakarîtie.”

⁴ Tathikîrîriani înegene rîrîa rîrî irîmarî îgûrû, nîta rîa andû eengî mûno! Tathikîrîriani înegene rîa mothamaki na mavûrûri magomanîte vamwe. Ngai-Mûnene mwene vinya wonthe nîaravarîrîria athigari ake a mbaara.

⁵ Maûkîte maumîte mavûrûri ma kûraca, maumîte mîthiia yonthe ya nthî. Ngai-Mûnene arî na marakara akuuîte indo ciake cia mbaara, nîguo acûkangie nthî yonthe nîûndû wa marakara make.

⁶ Rîrani, nîûndû mûthenya wa Ngai-Mûnene ûrî vakuvî, ûgaaûka wîkariî ta mûthiro kuuma kûrî mwene vinya wonthe.

⁷ Kwoguo njara cia andû onthe nîikaaregera, na ngoro cia andû onthe iringîke.

⁸ Nîmakegua guoya na ruuo, megue ruuo ta rwa mûndûmûka akîgîa mwana. Makaaroranagia wa mûndû amakîtue nî ûrîa wîngî, namo mothiû mao makethîrwa mecûrîtwe nî nthoni.

⁹ Taroria, mûthenya wa Ngai-Mûnene nîûgaakinya, mûthenya mûcûku wa marakara meengî na mang'ûrîka. Nthî nîgaacûkangua, nao andû evia arîa marî kuo mathirue viû.

¹⁰ Njata cionthe wana irîa ciîthagîrwa irî itutu nîigaatiga gûkenga; riûa rîkaaratha rîkariî ta nduma, naguo mweri ndûkaara.

¹¹ Ngai-Mûnene arauga atîrî, “Nîngaaverithia nthî nîûndû wa waganu wayo, na mverithie andû arîa aganu nîûndû wa mevia mao. Nîngaathiria mwîtîîo wa andû arîa eyambî, na nthirie mwîcaaro wa andû arîa matarî ntha.

¹² Nîngaatûma andû matigare anini gûkîra thaavu îrîa mbaro mûno; nao andû makethîrwa marî anini gûkîra thaavu ya Ofiri.

¹³ Kwoguo nîngaatûma îgûrû rinaine, na nthî nîkaathingitha yume vandû va yo, mûthenya ûrîa nie, Ngai-Mûnene mwene vinya wonthe, ngonania marakara makwa manene.

¹⁴ “Wa mûndû akaavinyûraga ta nthwariga îkîvîtwa, ta ng'ondu itarî na mûrîthi, wa mûndû nîagaacoka kûrî andû ake, na wa mûndû nîakaaûra athiî vûrûrirî wake.

¹⁵ Mûndû wa wonthe ûkoonwa nîakaamundwa na rûviû, na mûndû wa wonthe ûkaanyitwa nîakaaûragwa.

¹⁶ Ciana ciao cia ngenge nîikaaûragwa wa makîyonagîra; indo cia nyomba ciao nîigaatavwa, na aka ao mamenywe kîîmwîrî na vinya.”

¹⁷ Ngai-Mûnene arauga atîrî, “Nîngaaringîrîra Amede nîguo matharîkîre Babuloni. Mavûrûri mama matiûragia sîlûva, na matikenagua nî thaavu.

¹⁸ Nîmakaaûraga andû ethî na mîguî yao, matikeguîra ciana ntha, kana macaîre ciana cia ngenge.

¹⁹ Babuloni îrî riiri gûkîra mothamaki monthe; ûnene waguo nîûtûmaga Akalidei metîîa. Nwatî nie Ngai-Mûnene ngaacûkangia îtûûra rîu, wata ûrîa nacûkangirie Sodomu na Gomora.

²⁰ Îtûûra rîu rîtigacoka gûtûûrwa nî andû, kana rîkarwa nî njiarwa tene na tene. Gûtirî Mûarabu ûkaamba îgema rîake kuo, na gûtirî mûrîthi ûkaarîthia ndîthia yake kuo.

²¹ Vandû va ûguo, gûgaatûûrwa nî nyamû cia kîthaka, na nîkuo irwîgî igaatumaga ciomba ciacio. Nyaga nîcio igekaraga kuo, na mbûri cia kîthaka irûgarûgage kuo.

²² Mviti nîikaarîraga irî nyombarî ndaca na îgûrû, nacio ciathi igambage irî nyombarî irîa ciarî ciao athamaki. Îvinda rîa Babuloni rîrî vakuvî! Mîthenya yarîo îrî vakuvî kûthira.”