Isaia 12 - ÎVUKU RÎA ÛVORO MWARO

Rwîmbo rwa gûcokia ngatho

¹ Mûthenya nîûgaakinya rîrîa mûkaaina atîrî, “Nîngagûcokeria ngatho we Ngai-Mûnene, nîûndû warî mûrakaru nîtue, nwatî rîu marakara maku nî mathiru, na nîûtûmîrîrîtie.

² Ngai nîke mûvonokia wakwa; nîke ngwîvoka na ndigeetigîra; nîûndû Ngai-Mûnene, Ngai nîamvecaga vinya; na ke mwene nîke ûmvonokagia.

³ Nîûgaatava manjî ûkenete, kuuma ithimarî cia ûvonokio.”

⁴ Mûthenya ûcio nîmûkaaina atîrî, “Cokeriani Ngai-Mûnene ngatho! Mûvoeni mûkîgwetaga rîîtwa rîake. Menyithiani mavûrûri maûndû marîa ekîte, na mwanîrîre atî rîîtwa rîake nî rînene.

⁵ Inani nyîmbo cia gûkumia Ngai-Mûnene nîûndû nîekîte maûndû manene; maûndû mama nîmamenyekanîte nthî yonthe.

⁶ Ugîrîriani na mwine mûkenete, mue arîa mûtûûraga Zayuni! nîûndû Ûrîa Mûtheru wa Isiraeli nî mûnene, na atûûraga gatagatîrî kenyu.”