Isaia 11 - ÎVUKU RÎA ÛVORO MWARO

Ûthamaki wa thayû

¹ Nîgûkaaumîra mûthamaki kuuma njiarwarî cia Jesii, ta ûrîa rûvûa rûkûraga kuuma mûtîrî.

² Nîagecûrwa nî Roho wa Ngai-Mûnene, roho wa ûûgî na ûtaûku; roho wa ûtaarani na vinya, roho wa ûmenyo na gwîtigîra Ngai-Mûnene.

³ Nîagaakenagua nî kwathîkîra Ngai-Mûnene. Ndagaatucanagîra kûringana na ûrîa metho make monaga, kana atue ûndû kûringana na ûrîa matû make megucaga.

⁴ Agaatucagîra athîni na ûthingu, na atucagîre andû arîa matarî vinya gûkû nthî na waragania. Nîakaaverithia nthî na kiugo gîake, na aûrage andû arîa aganu na mûgambo wake.

⁵ Ke akaathanaga na ûthingu na wîvokeku.

⁶ Ciathi igaatûûranagia na tûgondu, itang'a ikaamamaga vamwe na twori twa mbûri. Tûcaû na twana twa mûnyambû ikaarîcaga vamwe, na igaatongoragua nî kaana kanini.

⁷ Ng'ombe na ngatûnyi ikaarîcaga vamwe, natuo tûcaû twacio tûkaamamaga vamwe na thayû. Mînyambû nîkaarîcaga nyaki ta ng'ombe.

⁸ Gakenge gakaathakagîra vakuvî na îrima rîa njoka, mwana nîagaatonyia njara îrimarî rîa kîmvuva.

⁹ Kîrîmarî kîrîa kîtheru Kîam Ngai, gûtigativanua kana gwîkwa maûndû macûku. Nîûndû nthî îkethîrwa îcûrîte ûmenyo wa Ngai-Mûnene, ta ûrîa manjî methagîrwa mecûrîte îriarî.

Andû arîa marî îthamîriorî nîmagaacoka

¹⁰ Mûthenya ûcio mûthamaki mûcerû wa rûciaro rwa Jesii akethîrwa arî kîonereria kûrî andû. Mavûrûri nîmakaathiî gwake mûciî îtûûrarî rîake rîrîa rîrî riiri.

¹¹ Mûthenya ûcio, Mwathani nîagaatambûrûkia njara yake rîngî nîguo acokie andû ake arîa matigarîte Sîria, Misiri, Pathirosi, Ethiopia, Elamu, Shinari, Hamathi na icîgîrîrarî cia îria.

¹² Nîagaaûkîrîria vendera ya kwonia mavûrûri, atî nîakaaûngania andû a Isiraeli arîa matarî kîene, nîakaaûngania andû a Juda arîa manyaganîtie mîthiiarî îna ya nthî.

¹³ Wîru wa Efiraimu kûrî Juda nîûkaathira, na Efiraimu na Juda matikethîrwa marî nthû rîngî.

¹⁴ Efiraimu na Juda marî vamwe nîmakaatharîkîra Afilisiti mwena wa îthûîro. Nîmakaavoota andû a Edomu na a Moabu, nao andû a Amoni mamathîkîre.

¹⁵ Ngai-Mûnene nîaakanyarithia Îria Îtune, na arete rûkûngi rûviû nîguo rûnyarithie rûnjî rwa Farati, na arûgaanie rûtuîke tûrûnjî mûgwanja, nîguo andû maringage na magûrû.

¹⁶ Nîgûkaagîa na njîra nene yumîte Asîria, nîûndû wa andû ake arîa maatigarire kuo, wata ûrîa gwekîkire kûrî andû a Isiraeli rîrîa maaumaga Misiri.