Isaia 10 - ÎVUKU RÎA ÛVORO MWARO

¹ Andû arîa matungaga mawatho matarî ma kîvooto kaî marî na thîna-î, mavîtûkagia mawatho ma kûvinyanîrîria.

² Mekaga ûguo nîguo maime athîni kîvooto, na gûcuuna athîni a andû akwa kîrîa kîmagîrîrîte. Matavaga aka a ndigwa, na makaîa ciana cia ndigwa.

³ Mûgeeka atîa mûthenya ûrîa Ngai akaamûverithia, rîrîa akaamûretere rûkûngi rûnene kuuma vûrûri wa kûraca? Mûkaathiî kûvoya ûtethio kûrî û? Mûgaatiga ûtonga wenyu kû?

⁴ Gûtirî ûndû mûgeka tiga kwînyitania na andû arîa ove, kana mûgwe kûrî arîa aûrage. Kûnarî ûguo, marakara ma Ngai-Mûnene tîmathiru, na nîatambarûkîtie njara yake averithanie.

Ngai-Mûnene nîwatûmîre Mûthamaki wa Asîria

⁵ We Asîria, nîwe rûthanju rûrîa ndûmagîra narakara, nîwe mûragi wa mang'ûrîka makwa.

⁶ Natûmire Asîria akaverithie vûrûri ûtaicî Ngai, namwathire akaverithie andû arîa mandakarîtie; akamacune indo na amatave, na amakinyange ta ndaka njîrarî.

⁷ Nwatî Asîria ndaarî na mworoto ûcio na tîguo eeciragia gwîka; nwatî eendaga gûcûkangia viû, na kûthiria mavûrûri meengî wata ûrîa kûngîvoteka.

⁸ Etîîaga akiugaga atîrî, “Kinthî atongoria a athigari akwa onthe tî athamaki?

⁹ Nîmvoota Kalino wata ûrîa nekire Karikemishi. Nîmvoota Hamathi wata ûrîa nekire Aripadi, na mvoote Samaria wata ûrîa nekire Damesiki.

¹⁰ Wata ûrîa naaverithirie mothamaki marîa maagoocaga mîvuanano, mîvuanano yarî mînene gûkîra îrîa yarî Jerusalemu na Samaria,

¹¹ nwaguo ngaacûkangia Jerusalemu na mîvuanano yakuo, wata ûrîa nekire Samaria na mîvuanano yakuo.”

¹² Rîrîa Mwathani akaarîkia wîra wake wonthe Kîrîmarî gîa Zayuni na Jerusalemu, nîakaaverithia mûthamaki wa Asîria nîûndû wa mwîcaaro na mwîtîîo wake.

¹³ Nîûndû ke etîîaga akiugaga atîrî, “Mbîkîte ûndû ûyû nie mwene, wana ngameka na ûûgî wakwa nîûndû nîrî na ûmenyo. Nî nthengutîtie mîvaka ya mavûrûri, na ngamacuuna ûtonga wao; nîngwîthîtie athamaki ao ta matharîkîrîtwe nî ndegwa.

¹⁴ Ta ûrîa mûndû atambarûkagia njara akanyita kîomba Kîam gîconi, nwaguo naanyitire ûtonga wa andû. Ta ûrîa mûndû ocanagia matumbî matigîtwe kîombarî, nwaguo mbocete andû a nthî yonthe. Gûtirî mûndû wanarî ûmwe wambararirie îthagu kana atumûra kanyua ambugîrîrie!

¹⁵ Îthanwa nwa rîtîîre mûndû ûrîa ûrarîtûmîra? Mûcumano nwa wîneneverie mûndû ûrîa ûtinagia naguo? Nîkwa rûthanju rûngîambararia mûndû ûrîa ûrûkagîrîria, kana mûragi ûkîrîrie mûndû ûrîa ûûtûmagîra!”

¹⁶ Kwoguo Mwathani, Ngai-Mûnene mwene vinya wonthe, nîakaarete mûrimû wa gûtûma athigari ake arîa anoru magînje, naguo riiri wake nîûkaavîvua wakane ta mwaki ûkîrîrîmbûka.

¹⁷ Ngai, ûrîa arî ke ûtheri wa Isiraeli, akethîrwa ekariî ta mwaki. Mûtheru wa Isiraeli akethîrwa ekariî ta rûrîrîmbî rwa mwaki, ûrîa ûkaavîvia mîgua na nthaugû ciake mûthenya ûmwe.

¹⁸ Naguo riiri wa mîtitû yake na mîgûnda yake mînoru; Ngai-Mûnene nîakamîcûkangia îthire viû, îkethîrwa îkariî ta ûrîa mûndû athiragua nî mûrimû.

¹⁹ Mîtî îrîa îgaatigara îkethîrwa îrî mînini mûno, atî nginya mwana wa rûkenge nwa avote kûmîtara.

Andû anini nîmagaacoka

²⁰ Mûthenya ûcio andû a Isiraeli, arîa makethîrwa matigarîte na andû a Juda arîa makethîrwa marî mwoyo matikevoka rîngî vûrûri ûrîa wamavinyagîrîria, nwatî makevoka nama Ngai-Mûnene, Ûrîa Mûtheru wa Isiraeli.

²¹ Andû a Isiraeli arîa magaatigara nî magaacokerera Ngai mwene Vinya.

²² Wana ethîrwa andû aku Aisiraeli nî eengî ta mûthanga ûrîa ûrî rûtererî rwa îria, nî andû anini tu magaacoka. Nîkûvangîtwe andû macûkangue, na gûcûkangua kûu gûgekîka na kîvooto.

²³ Nîûndû Mwathani, Ngai-Mûnene mwene vinya wonthe nîatuîte atî nîagaacûkangia nthî yonthe wata ûrîa augîte.

Ngai-Mûnene nîakaaverithia Asîria

²⁴ Kwoguo Mwathani, Ngai-Mûnene mwene vinya wonthe arauga atîrî, “Mue andû akwa arîa mûtûûraga Zayuni, mûtigetigîre andû a Asîria wana mamûriva na njokoma kana mûragi ta ûrîa mwekagwa nî andû a Misiri.

²⁵ Nîûndû vuva wa kavinda kanini marakara makwa nîmakaathira na nîngaacûkangia andû a Asîria nîrî na mang'ûrîka.

²⁶ Nie, Ngai-Mûnene mwene vinya wonthe, nîngaamariva na kîvoko ta ûrîa narivire andû a Midiani marî îthigarî rîa Orebu. Ngaamaverithia wata ûrîa naverithirie andû a Misiri.

²⁷ Vîndî îo, nîngaamwaûra mûrigo ûrîa Asîria mamwigîrîrîte, na munange îcoki rîrîa mamwigîrîrîte ngingo.”

Nthû nîciatharîkîre

²⁸ Nthû nîciaunûkirie kuuma Rimoni, na nînginyu îtûûrarî rîa Aiathi! Ivîtûkîrîrîte Migironi! Na cigîte mîrigo yacio Mikimashi!

²⁹ Nîivîtûkîte îriûko, na ûmûnthî nîmararîrîra Geba! Andû a Rama marainaina nî guoya; nao andû a Gibea, îtûûra rîa Saûlo nîmaûrîte.

³⁰ Ugîrîriani, mue andû a Galimu! Thikîrîriani, mue andû a Laisha! Metîkeni, mue andû arîa mûtûûraga Anathothi!

³¹ Andû a Madimena nîkwa maraûra, andû arîa matûûraga Gebimu maraûra matikaûragwe.

³² Ûmûnthî nthû nîikûrûngama Nobu, ikûnjîrîte kîrîma gîa Zayuni ngundi, karîma ka îtûûra rîa Jerusalemu.

³³ Taroria, Ngai-Mûnene mwene vinya wonthe akaamarivania nthî ta ûrîa mvûa cia mûtî irivanagua ciatemwa; njamba irîa nene nîigaatemwa igwe nthî, nao arîa etîi nîmagaaconorithua.

³⁴ Ngai-Mûnene nîagaatemanga nthû ta ûrîa mîtî îrî mûtitûrî îtemagwa na îthanwa, amagwîthie ta mîtarakwe îrîa mînene ya Lebanoni!