Hosea 9 - ÎVUKU RÎA ÛVORO MWARO

Ngai nîwaverithirie andû a Isiraeli

¹ Mue andû a Isiraeli mûtigakene! Mûtigakûngûîre ta mavûrûri marîa mengî, nîûndû mwîthîrîtwe mûkîvûra ûmaraa, mûgatiganîria Ngai wenyu. Mûkenagîrîra mbeca cia ûmaraa, mûrî matîrirî monthe ma ngano.

² Ngano na maguta ma mîtamaiyû itikeegana, matikagîa na ndivei njerû.

³ Matigekara vûrûri wa Ngai-Mûnene; nwatî andû Efiraimu nîmagaacoka Misiri ûkomborî, nîmakaarîa irio itarî ntheru Asîria.

⁴ Matikarutîra Ngai-Mûnene matega ma ndivei wana magongoona mao matikamûkenia. Irugo ciao ikethîrwa ciîkariî ta irugo cia macakaya, andû onthe arîa makaairîa nîmakaagîa na mûgiro. Ikethîrwa irî irio cia kûmavaithia tu; itikavirwa hekarûrî ya Ngai-Mûnene.

⁵ Mûgeeka atîa mûthenya ûrîa mûtuîte wa kîrugo, na mîthenya ya kîrugo Kîam Ngai-Mûnene?

⁶ Rîrîa mûkaûrîra gûcûkangua kwa vûrûri wenyu, nîmûkaagwatwa ûgeni Misiri, nwatî mûkathikwa Memufisi. Igîîna cienyu cia sîlûva igecûra mavûngo, mîgua îgecûra magemarî menyu.

⁷ Mîthenya ya kûverithania nî mîkinyu, mîthenya ya kwîrîvîrîria nîmîkinyu; andû a Isiraeli nwa nginya mamenye mûthenya ûcio. Mue mugaga atî, “Mûrathi nî kîrimû na mûndû ûrîa ûrî na Roho arî na ngoma.” Mugaga ûguo nîûndû wa mevia menyu meengî, na nîûndû wa rûmena rwenyu rûnene îgûrû rîake.

⁸ Mûrathi nî mûrangîri wa Efiraimu, andû a Ngai wakwa, Nwatî wa kûrîa kuonthe akathiî ethagîrîria aigîrîtwe mûtego ta wa gîconi, wana nîmûmene nyombarî ya Ngai wake.

⁹ Nîmarikîrîte mûno maûndûrî ma ungumania, wata ûrîa kwarî vîndî ya Gibea. Ngai nîakaaririkana waganu wao, nîakamaverithia nîûndû wa mevia mao.

¹⁰ Ngai-Mûnene arauga atîrî: “Rîrîa nacemanirie na andû a Isiraeli, mekariî ta mûthavibu ûrî werûrî. Rîrîa nonire atongoria enyu, mekariî ta matunda ma mbere ma mûkûyû. Nwatî wa rîmwe maakinya kûu Baali-peori, nîmeyamûrire na makîambîrîria kûgooca Baali, maagîre na mûgiro wata kîndû kîu mendete.

¹¹ Ngumo ya Efiraumu nî îgûrûka ta gîconi, ciana itigaaciarwa, aka matikaaiga nda na matikagîa nda!

¹² Wana marera ciana, ngaaciûraga cionthe viû. Kûgwatwa nî kîrumi nî o, rîrîa nie ngamatiganîria!”

¹³ We Isiraeli, rîrîa nacemanirie nawe rîa mbere, nonire wîkariî ta mûkîndû ûvandîtwe mûgûndarî mûnoru. Nwatî rîu we Isiraeli nîwatongorerie ciana ciaku ikaûragwe.

¹⁴ We Ngai-Mûnene, verithia andû aya! Nwatî nîûmaverithia atîa? Tua aka ao nthata, tûma mature îria rîa kwongithia ciana.

¹⁵ Ngai-Mûnene arauga atîrî, “Nîûndû wa waganu wao ûrîa wambîrîrie Giligali; kûu nîkuo nambîrîrie kûmamena. Nîûndû wa maûndû marîa mekaga ma mevia, nîngamengata maume nyombarî yakwa. Nie ndikamenda rîngî. Atongoria ao onthe nî aregani

¹⁶ Andû a Efiraimu nî aringe, mekariî ta mîtî îrî na mîri mîûmû, o matigaciara maciaro. Wana maaciara ciana, nîngaûraga ciana ciao irîa mendete.”

¹⁷ Ngai wakwa nîakaaregana nao, nîûndû nîmaregete kûmûthikîrîria; nîmatûûra maûrûraga mavûrûrirî.