Hosea 8 - ÎVUKU RÎA ÛVORO MWARO

Ngai mûnene nîwacirithirie andû a Isiraeli nîûndû wa kûvoya mîvuanano

¹ Vuva karumbeta! Nthû cienyu ciûkîte ta ndiiû, kûtharîkîra nyomba ya Ngai-Mûnene, nîûndû andû akwa nîmaunîte kîrîkanîro kîrîa narûthire nao, na magîtiganîria watho wakwa.

² Andû a Isiraeli mandîragîra makiugaga: “Ngai wetû, nîtûgwîcî.”

³ Nwatî andû a Isiraeli nîmareganîte na ûndû ûrîa mwaro; nîûndû wa ûguo, rîu nthû nîîkûmûrûmîrîra.

⁴ Andû akwa nîmeethuurîre mûthamaki ndamavete rûtha, nîmeethuurîre atongoria arîa nie ndaicî. Nîmeerûthîrîte ngai cia sîlûva na cia thaavu, ûndû ûyû nîguo ûkamûthiria.

⁵ Andû a Samaria, nie nînthûrîte mûvuano wa gacaû. Marakara makwa nîmanene îgûrû rîenyu. Nî nginya rî mûgûtûûra mûtarî atheru?

⁶ Nwa ta guo mwîkariî wanamue andû a Isiraeli! Mûvundi nîke warûthire mûvianano ûcio. Tî yo Ngai. Mûviano ûcio wa njaû wa Samaria nîûkaunangwa icunjî icunjî!

⁷ Mavandaga rûvuvo, na magaaketha rûkûngi rûnene! Mîmera yao ya ngano ndîgaciara wanarî kîndû, na îngîgaciara, maciaro mayo makarîwa nî ageni.

⁸ Andû a Isiraeli nîamerie; rîu marî gatagatî ka mavûrûri mengî, ta kîndû gîtarî na vata;

⁹ nîûndû nîmaathiîre kûvoya ûtethio kûrî Asîria. Efiraimu îkariî ta nyûmbû îkîûrûra yonga; Efiraimu nîmwîendiu kûrî arata ake.

¹⁰ Wana ethîrwa nîmeyendetie kûrî andû a ndûrîrî, nie nîngaamaûngania wa rîmwe. Vîndî îo nîrîo makegua maûndû makîmaritûvîra marî rungu rwa mûthamaki ûrîa ûmavinyagîrîria.

¹¹ “Andû a Efiraimu nîmatumîte metha nyîngî mûno cia magongoona, kûu metharî icio cia magongoona nîkuo waganu wîngîvîrîte.

¹² Wana nîngîamandîkîre maathani makwa mavinda meengî atîa, o mangîamoonaga marî kîndû kîgeni tu.

¹³ O nîmendete magongoona, na kûrîa nyama cia magongoona; nwatî nie Ngai-Mûnene ndikenagua nîo wana vanini; Ke aririkanaga mevia mao; na akamaverithia nîûndû wa mevia mao; nîakaamacokia Misiri ûkomborî.

¹⁴ Andû a Isiraeli nîmariganîrîtwe nî Mûmbi wao, na magetumîra nyomba mbaro mûno; andû a Juda nîmeyongerere matûûra marîa magitîre, nwatî nîngarekia mwaki ûvîvie matûûra mau, na ûcûkangie nthingo irîa imairigîrîte.”