Hosea 7 - ÎVUKU RÎA ÛVORO MWARO

¹ Rîrîa rîonthe nenda kûrûnga andû akwa a Isiraeli na kûmavonia, wîvia wa andû a Efiraimu nîûguûragua, vamwe na ciîko njûku irîa ciîkîtwe nî andû a Samaria. Nao nîmaavenanagia; nîmavunjaga nyomba cia arîa engî, na acunani nîmaakavagîra andû njîrarî na makamacuna indo ciao.

² Nwatî o matimenyaga atî nîndirikanaga ciîko ciao cionthe njûku. Mathiûrûkîrîtue nî mevia mao atî vîndî cionthe nie monaga makîvia.

³ Nîmakenagia mûthamaki na waganu wao, na magakenia atongoria na maveeni mao.

⁴ Andû onthe nî itharia na nî aremi; mekariî ta karaî karî rikorî, rîrîa mûrugi atigire kûrûthîra mwaki, nginya arîkie gûkanda mûtu ma mûgate wimbe.

⁵ Mûthenya wa gûkûngûîra mûthamaki, atongoria ake manyuire ndivei makîrîwa na makîrita, nake mûthamaki akînyitanîra na andû arîa mamûnyûrûragia.

⁶ Wata ûrîa njiko yakanaga mwaki, nwa ta guo maakanagwa nî marakara ûtukû mûgima, na kîraûko marakara magatumûka rûrîrîmbî.

⁷ Andû onthe makanîtwe nî marakara ta makara njikorî, na makaûraga atongoria ao. Athamaki ao onthe nîmagûîte, na gûtirî wanarî ûmwe ûngîmvoya ûrekero.

Isiraeli nîmevokire nîmevokire mavûrûri mengî

⁸ Efiraimu nîmatukanîte na andû a mavûrûri marîa mengî, mekariî ta mûgate ûtarî mûvîu mbarî îmwe.

⁹ Ageni nîmamûthirîtie vinya, na ke mwene ndaicî. Kîongo gîake kîonthe gîcûrîte mbuî, na ke mwene ndaramenya.

¹⁰ Mwîtîîo wa andû a Isiraeli nî mûcûku wao. Kûnarî ûguo matingînjokerera nie Ngai Mûnene Ngai wao, wana matingînjaria manekîte maûndû mau monthe.

¹¹ Efiraimu nî ta ndutuura nditu, nî kîrimû gîteciragia. Mavinda mamwe arî Misiri na mavinda meengî arî Sîria kûvoya ûtethio.

¹² Makîthiî nîngamatandîkîra neti yakwa îmagwate, nîngamagûîthia nthî ta iconi cia rîerarî, nîngamaverithia kûringana na wîvia wao.

¹³ O nîanyite nî kîrumi nîûndû nîmandiganîrîtie! Nîmagûcûkangua nîûndû nîmareganîte nanie! nîmendaga kûmakûûra, nwatî o maaragia maveeni îgûrû rîakwa.

¹⁴ O nîmangayagîra nwatî tî kuuma ngoro ndaarî. Maragaragara na magetemanga marî itandarî ciao, nîguo nyamûkîre matega mao ma ndivei na ngano; nwatî nîmareganîte nanie.

¹⁵ Nînie namekîrire vinya njararî ciao, nwatî o meciragia naaî îgûrû rîakwa.

¹⁶ Nîmagarûrûkîrîte ngai ya Baali, mekariî ta ûta mûregerû. Atongoria ao makaûragîrwa mbaararî, nîûndû wa ciugo ciao cia mwîtîîo. Kwoguo nîmakaanyararwa marî vûrûri wa Misiri.