Hosea 6 - ÎVUKU RÎA ÛVORO MWARO

¹ Ûkani tûcokerere Ngai-Mûnene; ke mwene nîatûgurarîtie, nwatî wake mwene nîagûtûvonia. Ke mwene nîatûtivangîtie, nwatî ke mwene nîagûtûthondeka kûrîa tûtivangîtue.

² Vuva wa mîthenya îîrî nîagaatûva mwoyo rîngî, vuva wa mîthenya îîrî nîagaatûriûkia, nîguo tûkavota gûtûûrania nake.

³ Tigani twîrutanîrie kûmenya Ngai-Mûnene kumagara gwake nî gwa kwîvokwa. Wata ûrîa gûka gwa kîraûko kûrî gwa kwîvokeka, ke agaûka kûrî tue ta karûnyunyuû, aûke ta mbura ya kîvovoto.

⁴ Nîmbîka atîa nawe, we Efiraimu? Nîmbîka atîa nawe, we Juda? Wendo wenyu kûrî nie nîta îtu rîa kîraûko, nîta îme rîrîa rîthiraga narua.

⁵ Nîkîo nîmathithûkîrîte na njîra ya arathi, nînîmacûkangîtie na ciugo ciakwa, îtuîro rîakwa nî ta riûa rîkîratha.

⁶ Nîûndû mendete wendo ûtathiraga na tî îgongoona, kûmenya Ngai na tî matega ma kûvîvua.

⁷ Nwatî rîrîa maakinyire Adamu nîmaagararire kîrîkanîro gîakwa marî kûu nîmaatigire kûnîîvoka.

⁸ Gileadi nî îtûûra rîa eki naaî, kwaragîte nthakame.

⁹ Ta ûrîa acunani methithagîra mûndû njîrarî, nwata guo athînjîri-Ngai mekaraga ikundi makavîrîte andû. Maûragagîra andû njîrarî ûthiîte Shekemu, nama, nîmekaga maûndû macûku mûno.

¹⁰ Nîmonete ûndû mûcûku mûno gatagatî ka andû a Isiraeli; andû a Efiraimu mavinyûraga gûtungatîra ngai wîngî, nama, andû a Isiraeli nîmegwatîtie mûgiro.

¹¹ Wana mue andû a Juda, kavinda nîkathuure rîrîa mûkaverithua ûrî ta mûcara wenyu.