Hosea 4 - ÎVUKU RÎA ÛVORO MWARO

¹ Ta thikîrîriani kiugo Kîam Ngai-Mûnene mue andû a Isiraeli, nîûndû Ngai-Mûnene nîarathitanga atûûri a vûrûri ûyû. “Gûtirî na wîvokeku kana ntha vûrûrirî ûyû, gûtirî mûndû ûmenyete Ngai-Mûnene vûrûrirî ûyû.

² Kîrîa kîrî kuo nî kwîvîtanîra, ûthani, ûragani, wîi, na ûtharia. Kuna watho na kûûragana gwîkîkaga wa mûthenya.

³ Kwoguo vûrûri wonthe nî werû, na kîûmbe kîonthe gîtûûraga vûrûrirî ûcio nîkîrathirua; wana nyamû cia kîthaka na iconi; wana nthamaki cia îriarî nîiracûkangua.”

Ngai nîarathitanga athînjîri-Ngai

⁴ Ngai-Mûnene arauga atîrî, “Mûndû wana ûrîkû ndagatetie andû kana amacirithie. Nîûndû nînie ndetagia athînjîri-Ngai.

⁵ Mûthenya we nîûkaavîngwa, nake mûrathi nîakaavîngwa vamwe nawe ûtukû. Nîngacûkangia nyûkwe Isiraeli.

⁶ Andû akwa makucaga nîûndû wa gûtura ûmenyo; nîûndû we mûthînjîri-Ngai nîûreganîte na ûmenyo, nînarega ûtuîke mûthînjîri-Ngai wakwa. Nîûndû we nîûriganîrîtwe nî watho wa Ngai waku, wananie nîngariganîrwa nî ciana ciaku.

⁷ Wa ûrîa athînjîri-Ngai mongerekaga, nwaguo onthe mevagia mbere yakwa. Kwoguo nîngatûma riiri wao ûtuîke gîconoko.

⁸ Metongetia na maketha ma andû akwa arîa evia, nîmeriragîria mûno kwona magîka mevia.

⁹ Nwatî kîrîa andû makanyita nwa kîo athînjîri-Ngai makaanyita, nîngamaverithia nîûndû wa njîra ciao. Ngamaverithia nîûndû wa maûndû marîa o ene mekîte.

¹⁰ Nîmakaarîa nwatî matikavaa; nîmakaatharia nwatî matikagîa ciana, nîûndû nîmandiganîrîtie nie Ngai-Mûnene, na makarûmîrîra ngai ng'eni.”

Ngai-Mûnene nîwarumire ûvoi wa

¹¹ Ndivei ngûrû na njerû nîithengutagia ûmenyo.

¹² Andû akwa mavoyaga ûtaaro kuuma mûtîrî, kamûtî kao ka ûragûri nîko kamavecaga ûguûrio, Wendi wao wa ûtharia nîûmavîtithîtie, nîmavûrîte ûmaraa na njîra ya gûtungatîra ngai ciîngî, nîmandiganîrîtie nie Ngai wao.

¹³ Marutagîra magongoona irîmarî îgûrû, marutagîra matega mao tûrîmarî, rungu rwa mîtî mîraca na îyambîte waro, nîûndû kîruru Kîamyo nî kîoro. Kwoguo erîtu akwa nîmavûraga ûmaraa, na aviki enyu makatharia.

¹⁴ Ndikaverithia erîtu enyu rîrîa makethîrwa makîvûra ûmaraa, kana mverithie aviki enyu makîtharia. Nîûndû arûme nîo marûmanagîrîra na maraa, na makaruta magongoona vamwe na maraa ma ndini. Andû aya matarî na ûmenyo nama nîmagacûkangua.

¹⁵ Wana ethîrwa nama mue andû a Isiraeli nîmûvûraga ûmaraa! mûtigatûme andû a Juda methîrwa na mavîtia! Mûtikathiî vandû varîa vatheru kûu Giligali, wana mûtikathiî Bethiaveni, na ndakevîte akiugaga, “Wa ta ûrîa Ngai-Mûnene atûûraga mwoyo.”

¹⁶ Andû a Isiraeli maûmîtie ngingo ta mvunda; Ngai-Mûnene nwa amarîthie, ta ng'ondu îreketue gîtimarî kînene?

¹⁷ Andû a Efiraimu nîmeovanîtie na mîvuano. Tigana nao!

¹⁸ Gîkundi Kîam mîrîu kîîviraga kîo kîene ûmaraarî; nîkîendete gîconoko gûkîra kûvewa gîtîîo.

¹⁹ Kwoguo kîvurutano nîgîkûmagûrûkia, nao nîmakegua nthoni nîûndû wa kûrutîra ngai cia mîvuano magongoona.