Hosea 13 - ÎVUKU RÎA ÛVORO MWARO

Îtua rîa Ngai kûrî andû a Isiraeli

¹ Rîrîa andû a Efiraimu maririe, andû nîmaatetemire; andû a Efiraimu maarî na ûvoti mûnene mûno kûu Isiraeli, nwatî nîmaambîrîrie kûgooca Baali, na makîîretera gîkuû.

² Andû a Efiraimu nwa marathiî na mbere kwîvia, nîmarethondekera mîvuano ya sîlûva cia kûgooca, mîvuano îrîa îrûthîtwe na njara ciao na wara wao, cionthe irûthîtwe nî mavundi. Maugaga atîrî, “Irutîreni magongoona!” Andû nîmaramumunya mûviano wa njaû!

³ Kwoguo nîmakaathira wa rîmwe ta nundu ya kîraûko, kana mathire wa rîmwe ta îme, kana ta mavûngo marîa magûrûkagua nî rûkûngi, kana ta ndogo îrîa yumaga nyomba.

⁴ Ngai-Mûnene arauga atîrî, “Nînie Ngai-Mûnene Ngai wenyu, nînie namûrutire ûkomborî Misiri; mûtirî na Ngai wîngî tiga nie, na gûtirî ûngîvota kûmûvonokia tiga nie.

⁵ Nînie namûmenyerere rîrîa mwarî werûrî; vûrûri ûrîa warî mûmagaru na ûtarî na manjî.

⁶ Nwatî rîrîa mwarîre mûkîvaa, nîmwambîrîrie gwîtîîa, nginya mûkîriganîrwa nînie.

⁷ Kwoguo nînîmûtharîkîra ta mûnyambû, nînîmwîthithîra mûkîra wa njîra ta gîtang'a.

⁸ Nînîmûrûgîra ta Kîamthi gîcunîtwe twana twakîo, Nînîmûtarûranga ithûri cienyu ta mûnyambû na nîmûrîe vau vau. Nînîmûtarûranga inuku ta ûrîa nyamû ya kîthaka îkaga.

⁹ Nîngûmûcûkangia mue andû a Isiraeli; nû ûngîmûtethia?

¹⁰ Mûthamaki wenyu arîkû rîu nîguo amûvonokie? Atongoria enyu marî kû nîguo mamûgitîre? Nîmue mwavoire atîrî, ‘Tûve mûthamaki na anene nîguo matwathage.’

¹¹ Nîrî na marakara nînamûveere mûthamaki, na nîrî na marûrû nînamacunire mûthamaki.

¹² “Waganu wa andû a Efiraimu nîmwandîke, Mevia make nîmaige îkûmbîrî.

¹³ Ûrûrû ta wa mûndûmûka akîgîa na mwana nîûmûkinyîrîte. Nwatî ke nî mwana mûritu; kavinda gake ga gûciarwa ke nîwaregire kuuma ndarî ya ng'ina!

¹⁴ Nwanginya nîmakûûre kuuma kûrî arîa akuû? Nwa nginya nîmavonokie kuuma kûrî gîkuû? We gîkuû, mûthiro waku ûrî kû? Nawe kwa arîa akuû, gûcûkangua gwaku kûrî kû? Nie ndikaameguîra ntha rîngî.

¹⁵ “Wana ethîrwa Efiraimu nîakûthiî na mbere kûvua arî gatagatîrî ka aa mûrwang'ina, nie Ngai-Mûnene nîngatûma rûkûngi kuuma mwena wa îrathîro rûvurutane; rûkûngi rûu rûkauma werûrî, nacio ithima ciakuo nîikaathira manjî, na kûrîa kûtherûkaga manjî kûvwe. Kûrîa kuonthe aigîte mîthithû yake ya goro nîgûkaanyitwa.

¹⁶ Samaria nîagaakuua mûrigo wake wa mevia, nîûndû nîareganîte na Ngai wake; nîmakaûragwa na rûviû rwa njûra, ciana ciao irîa nini nîigaatemangwa inuku; na aka arîa marî îvu nîmagaatarûrangwa!”