Hosea 12 - ÎVUKU RÎA ÛVORO MWARO

¹ “Andû a Efiraimu maguîmaga rûkûngi, marûmanagîrîria na rûkûngi rwa mwena wa îrathîro mûthenya mûgima. Maveeni na mbaara nîciongererekaga gatagatî kao. Nîmanyitanagîra a Asîria na makavûra mbiacara na Misiri.”

² Ngai-Mûnene arî na ciira na andû a Juda; na nîakûverithia Juda nîûndû wa ciîko ciake njûku, na amûrîve nîûndû wa ciîko ciake mbaro.

³ Mbere ya Jakovu aciarwe nîwagianire na mûrwang'ina; na atuîka mûndû mûgima nîwagianire na Ngai.

⁴ Nîwagianire na mûraika na akîmûvoota, nîwamûkaîre na akîmûthaitha amûrathime. Arî Betheli nîwacemanirie na Ngai, na arî kûu Ngai nîwaranîrie nake.

⁵ Ngai-Mûnene, Mwene vinya wonthe Ngai-Mûnene nîrîo rîîtwa rîake!

⁶ Nwatî nwa nginya ûcokerere Ngai waku, tongoraguani nî wendo na kîvooto, îîvokageni Ngai wenyu vîndî cionthe.

⁷ Andû a Efiraumu mekariî ta avûri a mbiacara a maveeni arîa matûmagîra ithimo cia maveeni na mendete gûkinyîrîria andû.

⁸ Efiraimu etîîaga akiugaga atîrî: “Nie nî mûtongu! Nînîcarîrîtie ûtonga mwîngî mûno! Gûtirî mûndû ûngiuga atî nagîre ûtonga ûyû na njîra ya maveeni, nie ndianaîa!”

⁹ Nînie Ngai-Mûnene Ngai wenyu, ûrîa wakûrutire Misiri ûkomborî! nîngatûma mûcoke gûtûûraga magemarî rîngî, wa ta ûrîa mwîkaga mwaka wa mwaka vîndî ya kîrugo gîa tûnyomba.

¹⁰ Nie nînaririe na arathi; nînie namaveere cioneki nyîngî na njîra yao, nînîranîrîra mûvango wakwa.

¹¹ Nwatî Gileadi gwîcûrîte evia arîa magocaga ngai cia maveeni, na kûu Gileadi marutaga magongoona ma ndegwa, kwoguo metha ciao cia magongoona cigîtwe mûvari ta irûndo cia mathiga, mîtarorî ya mîgûnda mîrîme.

¹² Jakovu nîwathiîre Aramu, na arî kûu, nîwarutire wîra wa kûrîthia mbûri nîguo agîe na mûka.

¹³ Na njîra ya mûrathi Ngai-Mûnene nîwarutire andû a Isiraeli kuuma Misiri, na na njîra ya mûrathi Ngai nîwamagitîre.

¹⁴ Andû a Efiraimu nîmatûmîte Ngai akanwa nî marakara, magîrîrwe nî kûragwa nîûndû nîmavîtîtie, Ngai-Mûnene nîakamaverithia nîûndû wa maûndû macûku marîa mekîte.