Hosea 11 - ÎVUKU RÎA ÛVORO MWARO

Wendo wa Ngai kûrî andû ake aremi

¹ Rîrîa Isiraeli aarî mwana nînamwendire, namûruta Misiri nînamwîtire mwana wakwa.

² Wa ûrîa nathiî na mbere kûmeta, nwa guo maathiîcaga varaca nanie. Nîmaathiîre na mbere kûrutîra ngai cia Baali magongoona, na kûvîvîria mîvuanano ûbani.

³ Nînie narutire Efiraimu kûthiî, nie mwene namocire na njara ciakwa, nwatî matiamenya atî nînie namamenyagîrîra.

⁴ Namatongoririe na ntha na wendo wata ûrîa mûciari ocaga wa mwana akamwiga ciande, nwata guo wananie namekire. Nie nakuamîrîrie na ngîmava gîa kûrîa.

⁵ O nîmagacoka Misiri; nîmakaathwa nî mûthamaki wa Asîria, nîûndû nîmaregete kûnjokerera.

⁶ Mbaara nîgecûra matûûrarî mao, nîngaunanga mîkîgo ya mîrango yao, na îmacûkangie marî kwao kûrîa kûgitîre.

⁷ Andû akwa nîmatuîte mandiganîrie, mambîtaga Ûrîa Ûrî Îgûrû Mûno nwatî matindîîaga nama.

⁸ We Efiraumu, nîngîgûtiganîria atîa? We Isiraeli nîngîgûta atîa? Nîngîgûtua ta îtûûra rîa Adama atîa? Kana ngwîke ta îtûûra rîa Zeboimu! Nîregua ngoro yakwa îkîngiria, wendo wakwa kûrî we nî mwîngî mûno.

⁹ Nîngwîrigîrîria ndigeke ûndû na marakara; ndigaacûkangia Efiraimu rîngî, nîûndû nî Ngai na ndiîkariî ta mûndû. Nie ûrîa mûtheru gatagatîrî kenyu, ndigaûka gûkûverithia nîrî na marakara.

¹⁰ Nîmakaanjaria nie Ngai-Mûnene, ûrîa ûrurumaga ta mûnyambû, rîrîa ngaruruma ciana ciakwa ikauma îthûîro igîtetemaga.

¹¹ Magaûka magîtetemaga ta gîconi maumîte ya Misiri, makarûgaga ta macîa maumîte ya Asîria, nanie nîngamacokia kwao mîciî. Ûguo nîguo Ngai-Mûnene arauga.

¹² Ngai-Mûnene arauga atîrî, “Andû a Efiraumu nîmanthiûrûrûkîrîtie na maveeni, na andû a Isiraeli nîmamveenagia. Andû a Juda nîmareganîte na Ngai mûnene, wana nîmareganîte na ûrîa mûtheru mûno.”