Hosea 10 - ÎVUKU RÎA ÛVORO MWARO

¹ Andû a Isiraeli mekariî ta mûthavibu ûrîa mwaro mûno, mûthavibu ûrîa ûciaraga matunda mûno. Wa ûrîa matunda mathiîcaga na mbere kwongereka; nwaguo mathiîre na mbere na gûtuma metha cia kîgongoona. Wa ûrîa maciaro ma vûrûri mongerekire, nwa guo maathiîre na mbere kûvanda itugî ciao cia kûvoyagîra.

² Ngoro ciao ciîcûrîte ûthani, Rîu nwa nginya maverithue nîûndû wa mevia mao. Ngai mûnene nîakoomomora metha cia magongoona, na omomore itugî cia mathiga ciakûvoyagîrwa.

³ Vîndî îo andû acio nîmakaauga atîrî: “Tûtirî na mûthamaki, nîûndû tûtiîtigagîra Ngai-Mûnene; nake mûthamaki agatwîkîra atîa?”

⁴ Maragia ciugo ntheri; mevîtaga na makarûtha irîkanîro cia mama; kîvooto gîtuîkîte tî kîvooto rîngî ûvoro ûcio ûratamba ta ria rîrîa rîrî cumu mûgûndarî ûrîa mûrîme.

⁵ Andû arîa matûûraga Samaria nîmagaatetema, nîûndû wa njaû ya Bethaveni. Andû a kuo nîmagacakaîra njaû îo, wana athînjîri-Ngai arîa magoocaga ngai cia mûviano nîmakaamînamîrîria, makarîra nîûndû riiri wa njaû îo nîmûthengutie.

⁶ Mûviano ûcio nîûkaavirwa Asîria, ûrî ta gooti kûrî mûthamaki mûnene. Andû a Efiraimu nîmagaconorithua, Andû a Isiraeli nîmagaconoka nîûndû wa mûviano wao.

⁷ Mûthamaki a Samaria nîagaatwarwa, ta kînuku Kîam mûtî îgûrû rîa manjî.

⁸ Kûndû gwa kûvoera tûrîmarî twa Aveni, mevia ma Isiraeli, nîgûgaacûkangua. Mîgua na nthaugû nîkîikamera metharî ciao cia magongoona. Nao nîmakeera irîma, “Tûkunîkîre” na meere tûrîma atîrî, “Tûgwîreni!”

Isiraeli agaketha kîrîa avandire

⁹ Mue andû a Isiraeli, kuuma vîndî îrîa mwarî Gibea, mûtûûraga mwîvagia, na nginya rîu nwa mwîvagia. Mûgacûkangua nî mbaara mûrî kûu Gibea.

¹⁰ Nîngaûka kûrî andû aya aganu na nîmaverithie. Mavûrûri nîmakaûngana mamatharîkîre, makaverithua nîûndû wa mevia mao meengî.

¹¹ Efiraimu nî mori mvundithie waro mûno, nîyendete kûthiga ngano. Kwoguo nîngwîkîra îcoki ngingorî îo yayo mbaro, Juda nîarîma na mûraû arî wenga, Jakovu nîuna ndira arî wenga.

¹² Îvandîreni ûthingu, namue nîmûgaaketha wendo; Rîmani mîgûnda îrîa yatigirwe, nîûndû kavinda ga kûnjaria nie Ngai mûnene nîgakinyu, nanie nîngaamurîria kîrathimo ta mbura.

¹³ Nwatî mûvandîte maûndû macûku, mûraketha maûndû matarî na kîvooto; nîmûrîte matunda ma ûthani wenyu. We Isiraeli, wevokire vinya waku wenga, na wîngî wa athigari aku a mbaara.

¹⁴ Kwoguo mûrurumo wa mbaara nîûgakinyîra andû aku; nthingo cionthe cia kwîgitîra nîikomomorwa ta ûrîa Shalimani aacûkangirie Betharibeli marî mbaararî, aka na ciana ciao magatinangua inuku.

¹⁵ Ûguo nwa ta guo wana mue mûgekwa mue andû a Betheli, nîûndû wa mevia menyu manene. Gwakîa, mûthamaki wa Isiraeli nîagaacûkangua viû.