Hagai 2 - ÎVUKU RÎA ÛVORO MWARO

¹ Mûthenya wa mîrongo îîrî na ûmwe, mweri wa mûgwanja mwaka wa ûcio, Ngai-Mûnene nîwarîrie mûrathi Hagai.

² Nîwerire Hagai arie na mûnene wa Juda na nîke Zerubabeli mûvîcî wa Shealitieli, Joshua mûvîcî wa Jehuzadaki mûthînjîri-Ngai mûnene na andû onthe arîa maacokire kuuma îthamîriorî ameere atîrî,

³ “Kûrî na mûndû wanarî ûmwe gatagatîrî kenyu ûngîririkana ûrîa hekarû îo yarî na riiri? Rîu mwonaga îkariî atîa? Mwonaga takwa îtarî kîndû varî.

⁴ Kûnarî ûguo, ndûgakue ngoro we Zerubabeli. Îyûmîrîrie we Joshua mûvîcî wa Jehozadaki mûthînjîri-Ngai mûnene. Îyûmîrîrieni mue andû onthe a vûrûri ûyû. Rutani wîra nîûndû nie Ngai-Mûnene mwene vinya wonthe nîrî namue.

⁵ Rîrîa mwaumire Misiri nînamwîrîîre atî ngethagîrwa nîrî namue tene na tene. Kwoguo, nîrî vamwe namue, mûtikamake.

⁶ Ngai-Mûnene mwene vinya wonthe arauga atîrî, “Vîndî îtarî ndaca nîngainainia îgûrû na nthî, îria na nthî nyûmû.

⁷ Nîngainainia mavûrûri monthe, na nîguo mîthithû yonthe ya mavûrûri îkaaretwe gûkû, na nîngecûria hekarû îno ûthaka wayo, nînie Ngai-Mûnene mwene vinya wonthe nauga ûguo.

⁸ Sîlûva na thaavu yonthe gûkû nthî nî ciakwa.

⁹ Hekarû îrîa njerû îkethîrwa îrî nthaka gûkîra ya mbere, na kûu nîkuo ngarathimîra andû akwa.” Ûguo nîguo Ngai-Mûnene mwene vinya wonthe arauga.

Mûrathi nîwaririe na Athînjîri-Ngai

¹⁰ Mûthenya wa mîrongo îîrî na îna mweri wa kenda, mwaka wa kaîrî wa wathani wa mûthamaki Dario, Ngai-Mûnene Mwene vinya wonthe nîwaririe rîngî na mûrathi Hagai.

¹¹ Nîwamwîrire atîrî, “Îra athînjîri-Ngai matue îgûrû rîgiî ûndû ûyû:

¹² Ethîrwa mûndû nwa oce nyama îno ntheru kuuma îgongoonarî na amîkuue yovetwe na nguo yake. Ethîrwa nwa areke nguo îvutie mûgate, irio irî nduge, ndivei, maguta ma ndamaiyû, kana irio cia mûthemba wa wonthe, irio icio nwa ituîke nyamûre wanacio?” Nao athînjîri-Ngai nîmaamûcokerie atîrî, “Naarî.”

¹³ Hagai nîwacokire akîûria atîrî, “Ethîrwa mûndû tî mûtheru nîûndû wa kûvutania na mûndû ûyû mûkuû, angîvutia imwe cia irio ino, ikethîrwa itarî ntheru?” Athînjîri-Ngai nîmaacokirie atîrî, “Îî, ikethîrwa itarî ntheru.”

¹⁴ Hagai nîwacokire akiuga atîrî, “Mwathani-Ngai arauga atî, ûguo nîguo gûgaatuîka kûrî andû a vûrûri ûyû na maûndû monthe marîa mekaga. Kwoguo indo cionthe irîa makaaruta metharî ya kîgongoona tî ntheru.”

Ngai-Mûnene nîwîranîrîte kîrathimo gîake

¹⁵ Ngai-Mûnene arauga atîrî, “Roriani maûndû marîa magekîka mbere ya mwambîrîria kûndumîra hekarû rîngî, mûmenye

¹⁶ maûndû menyu mekariî atîa? Mwathiîre gwoca kîrûndo Kîam ngano mwîrîgîrîrîte kwona ithimo mîrongo îîrî, nwatî mwonire ithimo îkûmi tu. Mwathiîre îtangirî rîa ndivei mwîvokete gwîcûria mîtûngi mîrongo îtano, nwatî mwecûririe mîtûngi mîrongo îîrî tu.

¹⁷ Nînatûmire rûkûngi rûnene na ndavaîki na mbura ya mbembe ciûke icûkangie indo cionthe irîa mwageragia kûrîma, nwatî kûnarî ûguo mue mûtianjokerera, ûguo nîguo Ngai-Mûnene arauga.

¹⁸ Ûmûnthî nî mûthenya wa mîrongo îîrî na îna wa mweri wa kenda, mûthenya ûrîa mûcingi wa hekarû ya Ngai-Mûnene wathirire. Etererani mwone maûndû marîa mûkûthiî na mbere kwona kuuma rîu.

¹⁹ Wana ethîrwa gûtirî na ngano makûmbîrî, mîthavibu, mîkûyû, mîkûngûmanga, na mîtî ya mîtamaiyû tî mîciaru, kuuma rîu nîngûmûrathima.”

Ngai-Mûnene nîwarîrie Zerubabeli

²⁰ Mûthenya wa ûcio wa mîrongo îîrî na îna wa mweri, Ngai-Mûnene nîwavere Hagai ndûmîrîri riita rîa kaîrî:

²¹ “Aria na Zerubabeli, mûnene wa Juda ûmwîre nîrî vakuvî kwinainia îgûrû na nthî,

²² kûgarûrania mothamaki na kûthiria mavinya mao. Nîmûgaacûkangia ikaari ciao cia mbarathi na atwarithia a cio, nao nîmakaaûragana o ene kwa ene.

²³ Mûthenya ûcio, nîngagwoca we Zerubabeli ndungata yakwa mûvîcî wa Shealitieli nîguo wathanage vandûrî vakwa, we nîwe nthurîte.” Ûguo nîguo Ngai-Mûnene mwene vinya wonthe arauga.