Hagai 1 - ÎVUKU RÎA ÛVORO MWARO

Ngai-Mûnene nîwathanire hekarû îtumwe rîngî.

¹ Mûthenya wa mbere wa mweri wa gatandatû mwaka wa kaîrî wa ûtongoria wa Dario mûthamaki wa Perisia, Ngai-Mûnene nîwavere mûrathi Hagai ndûmîrîri avirîre Zerubabeli mwana wa Shealitieli, mûnene wa Juda, na Joshua mûthînjîri-Ngai mûnene mwana wa Jehozadaki.

² Ngai-Mûnene mwene inya wonthe nîwerire Hagai atîrî, “Andû aya marauga atî kavinda ga gûtuma hekarû rîngî tî gakinyu.”

³ Ngai-Mûnene nîwacokire akîva andû ndûmîrîri îno kûvîtûkîrîra kûrî mûrathi Hagai,

⁴ “Nî vîndî yenyu ya gûtûûra nyombarî itumîtwe waro, wa rîrîa hekarû yakwa îromomoka?”

⁵ Rîu Ngai-Mûnene mwene vinya wonthe arauga atîrî, “Îîcirieni kana mwîthîrîtwe mûgîka waro.

⁶ Mue mûvandîte mbeû nyîngî, nwatî mûkethete tûnini; mûrîcaga, nwatî mûtivaaga; mûnyunyaga ndivei, nwatî mûtiîganagia; nîmwîkagîra nguo, nwatî nwa mûregua mvevo; mûrutaga wîra nwatî mûcara nîtakwa wîkîrîtwe mûvukorî mûtûrîku.”

⁷ Ngai-Mûnene mwene vinya wonthe arauga atîrî, “Îîcirieni kana nîmûraruta wîra waro.

⁸ Rîu thiîni irîmarî mûgateme mîtî mûtume hekarû rîngî, nîguo nîmîkenerere na ngoocagwe ûrîa kwagîrîrîte.

⁹ “Mweriragîria maketha meengî, nwatî mwonire manini. Na rîrîa mwamaretire mûciî, nînamagûrûkirie. Nake Ngai-Mûnene mwene vinya wonthe araûria, ‘Nekire ûguo nîkî?’ Nîûndû hekarû yakwa nî nyomomoku, na wa mûndû arethînia na nyomba yake.

¹⁰ Kîu nîkîo gûtarî mbura kuuma îgûrû na gûtirî kîndû kîngîkûra nthî.

¹¹ Nîndûmîte kûgîe na thano vûrûrirî, na îgacûkangia irîmarî, mîgûnda ya ngano, mîgûnda ya mîthavibu na ya mîtamaiyû, andû na nyamû na kîrîa kîonthe mûkûragia.”

Andû nîmaathîkîre rîathani rîa Ngai-Mûnene

¹² Zerubabeli mûvîcî wa Shealitieli, na Joshua mûvîcî wa Jehozadaki, mûthînjîri-Ngai mûnene, na andû acio engî onthe nîmeetîkîre mûgambo wa Ngai-Mûnene Ngai wao, na ciugo cia mûrathi Hagai, wata ûrîa Ngai-Mûnene Ngai wao aamûtûmîte, nao andû nîmeetigîre Ngai-Mûnene.

¹³ Nake Hagai, mûnjaama wa Ngai-Mûnene, nîwavere andû ndûmîrîri kuuma kûrî Ngai-Mûnene yaugaga atîrî, “Nie nîrî vamwe namue.”

¹⁴ Kwoguo Ngai-Mûnene nîwekîrire ngoro ya Zerubabeli mûnene wa Juda vinya, Joshua mûthînjîri-Ngai mûnene na andû arîa onthe maacokete kuuma îthamîriorî. Nîmaambîrîrie gûtuma rîngî hekarû ya Ngai-Mûnene mwene vinya wonthe, Ngai wao,

¹⁵ mûthenya wa mîrongo îîrî na îna wa mweri wa gatandatû, mwaka wa kaîrî Dario arî mûthamaki.