Gûco 9 - ÎVUKU RÎA ÛVORO MWARO

Ngai nîke wavootanagîra andû a Isiraeli

¹ “Tathikîrîriani, mue andû a Isiraeli! Ûmûnthî mûrî vakuvî kûringa Jorodani mûkegwatîre mavûrûri manene na marî na vinya kûrî mue. Matûûra ma mavûrûri mau nî manene na nîmaairigîre na nthingo nginya matuurî.

² Andû a mavûrûri mau nî araca na marî vinya; nî avîcî a Anaki ûrîa mwîcî na mwegwire gûkîarua ûvoro wake atî, gûtirî mûndû ûngîtirîria andû ake mbaararî.

³ Kwoguo menyani ûmûnthî atî Ngai-Mûnene, Ngai wenyu nîke ûkûmûtongoria avaana ta mwaki ûrîa ûvîvagia ûkathiria. Mûkîîgwatîra vûrûri ûcio, Ngai-Mûnene nîakaamavoota namue mûmengate na mûmathirie viû wa rîmwe wata ûrîa eeranîrîte.

⁴ “Ngai-Mûnene arîkia kûmwîngatîra o, mûtikeîre na ngoro atî, Ngai-Mûnene aamûtethirie kwîgwatîra vûrûri ûyû nîûndû wa ûthingu wenyu. Nwatî Ngai-Mûnene nîamwîngatîra andû aya nîûndû wa waganu wao.

⁵ Ngai-Mûnene Ngai wenyu nîamwîtîkîria mwoce vûrûri wao tî nîûndû wa ûrîa mûrî athingu kana mwîkaga maûndû maro, nwatî nîamengata nîûndû nî aganu, na nîguo avingie kîrîkanîro kîrîa eerîre methe menyu na Iburahimu, Isaka na Jakovu na mwîvîtwa.

⁶ Kwoguo menyani atî Ngai-Mûnene Ngai wenyu ndaramûva vûrûri ûyû mwaro ûguo nîûndû wa ûthingu wenyu, nîûndû mue mûrî andû aremi.

⁷ “Mûtikariganîrwe nî ûrîa mwatûmire Ngai-Mûnene Ngai wenyu arakare mûrî werûrî. Kuuma mûthenya ûrîa mwaumire Misiri nginya mûthenya ûrîa mwakinyire gûkû, mwîthîrîtwe mûkîregana na Ngai-Mûnene.

⁸ Wana tûrî kîrîmarî gîa Sinai, nîmwatûmire Ngai-Mûnene anyitwe nî marakara mangîatûmire amûthirie.

⁹ Rîrîa naaunûkirie kîrîmarî nîguo ngamûkîre ivengere cia îthiga irîa ciandîkîtwe kîrîkanîro kîrîa Ngai-Mûnene aarûthire namue, nînekarire kîrîmarî kîu mîthenya mîrongo îna, ûtukû na mûthenya ndakûrîa kana kûnyua kîndû.

¹⁰ Ngai-Mûnene nîwacokire akîmva ivengere icio igîrî cia îthiga irîa aandîkîte ke mwene maûndû marîa aamwîrire arî mwakirî mûthenya ûrîa mwagomanîte kîrîmarî.

¹¹ Vuva wa mîthenya îo mîrongo îna, ûtukû na mûthenya, Ngai-Mûnene nîwamûvere ivengere icio igîrî cia îthiga irîa ciandîkîtwe kîrîkanîro.

¹² “Ngai-Mûnene nîwacokire akîmbîra atîrî, ‘Ûkîra na ûnyûrûrûke ume gûkû kîrîmarî narua, nîûndû andû aku arîa warutire Misiri nîmekîte ûndû mûcûku; nîmatigîte wa rîmwe kûrûmîrîra mawatho marîa namaathire na nîmerûthîrîte mûvuanano.’

¹³ “Ngai-Mûnene nwa wambîrire atîrî, ‘Nîmbicî ûrîa andû acio marî aremi.

¹⁴ Ndûkangirie nîmathirie. Nîrenda kûmathiria onthe na mariganîre viû gûkû nthî. Nîngaacoka ngûtue îthe wa rûrîrî rûnene na rûrî na vinya kûmakîra.’

¹⁵ “Kwoguo nînagarûrûkire ngînyûrûrûka kuuma kîrîmarî nguuîte ivengere igîrî cia îthiga na njara irîa ciandîkîtwe kîrîkanîro. Nakîo kîrîma nwa gîakanaga mwaki.

¹⁶ Nînaroririe na ngîona atî nama nîmûregete kwathîkîra watho ûrîa Ngai-Mûnene Ngai wenyu aamwathîte, na nîmwîvîtie mbere ya Ngai na njîra ya kwîrûthîra mûvuanano wa karegwa.

¹⁷ Kwoguo nînocire ivengere icio igîrî cia îthiga na ngîiringithia nthî ikiunîkanga wa mûkîonaga.

¹⁸ Nînaacokire ngîmama ndurumithîtie ûthiû nthî mbere ya Ngai-Mûnene îvinda rîa mîthenya mîrongo îna, ûtukû na mûthenya, ndakûrîa kana nyua kîndû. Nekire ûguo nîûndû nîmwekîte mevia mbere ya Ngai-Mûnene na mûgîtûma arakare.

¹⁹ Nînetigagîra marakara na mang'ûrîka marîa Ngai-Mûnene aarî namo nîûndû wenyu marîa mangîatûmire amûthiria. Nwatî Ngai-Mûnene nîwanthikîrîrie wa rîngî.

²⁰ Ngai-Mûnene aarî mûrakaru mûno nî Aroni na nîwevarîrîtie kûmûûraga, kwoguo vîndî wa îo nînavoere Aroni.

²¹ Nînoocire kîndû kîonthe kîrîa Kîamrî na mevia, karegwa karîa mwarûthîte, ngîkavîvia na mwaki na ngîkaunanga tûcunjî. Nînaacokire ngîkathîa gagîtuîka rûkûngû na ngikia rûkûngû rûu karûnjîrî karîa kaanyûrûrûkaga kaumîte kîrîmarî kîu.

²² “Wana nwa mwarakaririe Ngai-Mûnene rîrîa mwarî Tabera, Masa, na Kiburothi Hatava.

²³ Na rîrîa Ngai-Mûnene aamûtûmire kuuma Kadeshi-barinea na akîmwîra mûthiî mûkegwatîre vûrûri ûrîa aamûveere, nîmwacokire mûkîregana na maathani ma Ngai-Mûnene Ngai wenyu na mûtiamwîtîkia kana mûmwathîkîra.

²⁴ Mûtûûrîte mûreganîte na Ngai-Mûnene kuuma rîrîa naamûmenyire.

²⁵ “Kwoguo nînaamamire ndurumithîtie ûthiû nthî mbere ya Ngai-Mûnene îvinda rîa mîthenya mîrongo îna ûtukû na mûthenya, nîûndû nînaamenyete atî Ngai-Mûnene nîwavangîte kûmûthiria.

²⁶ Nînavoire Ngai-Mûnene ngîmwîra atîrî, ‘Ûûi Ngai-Mûnene Ngai, ndûgacûkangie andû aku arîa wakûûrire na ûkîmaruta Misiri na vinya waku mûnene.

²⁷ Ndûkarorie ûremi, waganu kana wîvia wa andû aya, nwatî ûririkane ndungata ciaku Iburahimu, Isaka na Jakovu.

²⁸ Ûngîmathiria, andû a vûrûri wa Misiri kûrîa watûrutire nwa mauge atî nîûndû Ngai-Mûnene nîwaremirwe nî gûkinyia andû ake vûrûri ûrîa aamerîîre na atî nîwamamenire, nîkîo amaretete gûkû werûrî nîguo amaûragîre kuo.

²⁹ Nwatî Ngai-Mûnene, aya nî andû aku arîa wathuurire matuîke aku kîûmbe na ûkîmaruta ûkomborî Misiri na vinya na ûvoti waku mûnene.’