Gûco 8 - ÎVUKU RÎA ÛVORO MWARO

Mwatonga mûtikariganîrwe nî Ngai-Mûnene

¹ “Menyererani mwathîkagîre na kinyi maathani monthe marîa nîramûva ûmûnthî, nîguo mûtûûre, mwongerereke na mwîgwatîre vûrûri ûrîa Ngai-Mûnene erîîre methe menyu.

² Ririkanani ûrîa Ngai-Mûnene aamûtongoririe rûgendo rûraca werûrî kavinda ka mîaka mîrongo îna. Nîwatûmire mwînyivie, akîmûgeria nîguo amenye kîrîa kîrî ngororî cienyu, na amenye kana nîmûkaathîkîra maathani make kana mûtikaamathîkîra.

³ Nîwatûmire mwînyivie na njîra ya gûtûma mûvûte, akîmûva mana mûkîrîa, irio irîa mue wana methe menyu mataanarûma rîngî. Eekire ûguo nîguo amûthomithie atî twa mûgate guonga ûtûûragia mûndû mwoyo, nwatî atûûragua nî kiugo kîrîa kîonthe kiumîte kanyuarî ka Ngai-Mûnene.

⁴ Mîaka îo yonthe mîrongo îna mûtîatuîkîrwa nî nguo kana mwimba magûrû.

⁵ Menyani atî wata ûrîa mwana averithagua nî îthe, nwa ta guo Ngai-Mûnene, Ngai wenyu amûverithagia.

⁶ Kwoguo athîkagîrani maathani ma Ngai-Mûnene, Ngai wenyu na mûrûmagîrîre njîra ciake mûkîmwîtigagîra.

⁷ Ngai-Mûnene, Ngai wenyu nîakûmûvira vûrûrirî mwaro na mûnoru, ûrî na nyûnjî na kûndû kûtherûkaga manjî, na nyûnjî ithiîcaga na rungu rwa nthî ikaumîrîra ciandarî na irîmarî;

⁸ vûrûri ûrî ngano, cairi, thavibu, mîkûyû ngûngûmanga, mîtamaiyû, na ûûkî.

⁹ Mûtigaatura gîa kûrîa kana kîndû wa kîonthe kîrîa mûngîenda mûrî vûrûrirî ûcio. Mûkenjaga cuuma mathigarî ma vûrûri ûcio, na mwînjage gîcango irîmarî.

¹⁰ Mûrî vûrûrirî ûcio, gûtirî kîndû mûkenda kûrîa gîture, na nîmûgaacokia ngatho kûrî Ngai-Mûnene, Ngai wenyu nîûndû wa vûrûri mwaro ûcio amûveete.

¹¹ “Îîmenyerereni mûtikariganîrwe nî Ngai-Mûnene, Ngai wenyu. Mûtikarege kwathîkîra maathani, matuîro ma ciira na mawatho make marîa ngûmûva ûmûnthî.

¹² Mwarîkia kûrîa irio mwegania na mwarîkia gûtuma nyomba mbaro na gûtûûra kuo,

¹³ na rîrîa ng'ombe, ng'ondu, sîlûva, thaavu na indo irîa ciîngî cionthe mûrî nacio ikongerereka,

¹⁴ menyererani mûtigetîîe mûriganîrwa nî Ngai-Mûnene, Ngai wenyu, ûrîa wamûrutire vûrûri wa Misiri kûrîa mwarî ûkomborî.

¹⁵ Ngai-Mûnene nwake wamûtongoririe kûu werûrî ûcio mûnene na warî na ûgwati mwîngî wa njoka irîa irî ûrogi na tûng'aurû. Vûrûri ûcio ndwarî na manjî na Ngai-Mûnene nîwatûmire manjî maume îthigarî mûnyue.

¹⁶ Kûu werûrî nîwamûvere mana mûrîe, irio irîa methe menyu matanarûma. Nîwatûmire mwînyivie na akîmûgeria, nîguo mûthiiarî amûrathime na indo mbaro.

¹⁷ Kwoguo îîmenyerereni mûtigecirie atî mûtongete nîûndû wa ûvoti kana vinya wenyu.

¹⁸ Ririkanani atî nî Ngai-Mûnene, Ngai wenyu ûvecanaga ûvoti wa gûtonga. Ekaga ûguo nîguo avingie maûndû marîa aarîkanîre na methe menyu wata ûrîa gwîkariî ûmûnthî.

¹⁹ Na ethîrwa nîmûkaariganîrwa nî Ngai-Mûnene, Ngai wenyu, na mwambîrîrie gûcaria ngai ciîngî cia gûtungatîra na kûigooca, nîramwîra nama atî mweka ûguo nwanginya mûkaathira viû.

²⁰ Ethîrwa tîmwathîkîra Ngai-Mûnene, Ngai wenyu, nîmûkaathirua wata mavûrûri marîa Ngai-Mûnene akûthiria nîguo mûtonye kuo.