Gûco 7 - ÎVUKU RÎA ÛVORO MWARO

Andû arîa Ngai-Mûnene athuurîte

¹ “Rîrîa Ngai-Mûnene, Ngai wenyu akaamûkinyia vûrûrirî ûrîa mûkegwatîra ûtuîke wenyu, nîakengata andû a mavûrûri mûgwanja arîa marî vinya kûrî mue maume kuo. Namo nî: Ahiti, Agirigashi, Amori, Akanaani, Aperizi, Ahivi na Ajebusi.

² Rîrîa Ngai-Mûnene, Ngai wenyu akaamarekereria kûrî mue na mûmavoote, nwanginya mûkaamaûraga onthe mathire. Mûtikarûthe kîrîkanîro nao kana mûmeguîre ntha.

³ Mûtikavikanie nao: mûtikareke erîtu enyu mavikua nî anake ao kana mûreka anake enyu mavikia erîtu ao,

⁴ nîûndû nwa matûme ciana cienyu itiganîrie Ngai-Mûnene na ciambîrîrie kûgooca ngai ciîngî. Ingîka ûguo, Ngai-Mûnene nîakaarakara nîmue na amûthirie wa rîmwe.

⁵ Kwoguo nîmûkoomomora metha ciao cia magongoona, na munange itugî cia ngai ciao, na mûtemange mîvuanano ya Ashera, na mûvîvie mîvuanano yao ya kumua.

⁶ Mue mûrî rûrîrî rûtheru rwa Ngai-Mûnene, Ngai wenyu. Ngai-Mûnene, Ngai wenyu aamûthuurire gatagatîrî ka andû onthe a nthî mûtuîke andû ake kîûmbe.

⁷ “Ngai-Mûnene ndaamwendire na akîmûthuura nîûndû wa ûrîa mwarî eengî gûkîra andû a mavûrûri marîa mengî, nama mwarî anini mûno gûkîra mavûrûri marîa mengî ma nthî.

⁸ Nwatî aamûthuurire nîûndû wa kûmwenda na kûvingia mwîvîtwa wake kûrî methe menyu. Kîu nîkîo gîatûmire amûvonokie na vinya wake mûnene na akîmûkûûra kuuma ûkomborî wa mûthamaki wa Misiri.

⁹ Menyani nama atî Ngai-Mûnene, Ngai wenyu nîke Ngai, na nî mwîvokeku. Ke nîavingagia kîrîkanîro gîake na arî wendo ûtathiraga, kûrî njiarwa ngiri cia andû arîa mamwendete na mavingagia maathani make.

¹⁰ Nwatî nîakaaverithia arîa mamûmenete na amacûkangie.

¹¹ Kwoguo menyagîrîrani mûvingagie na kinyi maathani, mawatho na matuîro ma ciira marîa ngûmwatha ûmûnthî.

Irathimo irîa ciumanaga na wathîki

¹² “Ethîrwa mûkegucaga maathani mama na mûmathîkagîre na kinyi, Ngai-Mûnene, Ngai wenyu akaavingagia kîrîkanîro gîake namue, na amwonagie wendo ûtathiraga wata ûrîa aarîkanîre na methe menyu.

¹³ Akaamwendaga, amûrathimage, na atûme mwongerereke mûtuîke rûrîrî rûnene. Ngai-Mûnene nîakaarathima ciana cienyu na mîgûnda yenyu, na maciaro ma mîgûnda yenyu nîguo mwîthagîrwe mûrî na ndivei na maguta, na amûrathime na ng'ombe na ng'ondu nyîngî. Ngai-Mûnene nîakaamûrathima na indo icio cionthe mûrî vûrûrirî ûrîa eerîre methe menyu atî nîakaamûva.

¹⁴ Nîmûkaarathimwa gûkîra andû onthe. Gûtirî mûndû wanarî ûmwe wenyu ûkethîrwa arî nthata kana nyamû wa yonthe ndîthiarî yenyu îthîrwe îrî nthata.

¹⁵ Ngai-Mûnene nîakaamûgitîra kuuma kûrî mîrimû yonthe. Ndagaatûma mûgîe na mîrimû mîcûku ta îrîa mwonire Misiri, nwatî arîa onthe mamûthûrîte nîo makaanyitwa nî mîrimû îo.

¹⁶ Na nîmûkaaûraga andû arîa onthe Ngai-Mûnene, Ngai wenyu akaarekereria kûrî mue. Mûtikameguîre ntha kana mûtungatîre ngai ciao, nîûndû ûcio ûkethîrwa ûrî mûtego kûrî mue.

¹⁷ “Mûtikeîre na ngoro atî, andû acio nî eengî kûmûkîra, na atî mûtingîvota kûmengata.

¹⁸ Mûtikegue guoya nî o na mûririkane ûrîa Ngai-Mûnene, Ngai wenyu eekire mûthamaki wa Misiri na andû a kuo onthe.

¹⁹ Taririkanani mîthiro îrîa mwonire na metho menyu. Taririkanani ciama na morirû marîa Ngai-Mûnene aaringire na ûvoti na vinya wake ûrîa aatûmîre nîguo amûrute Misiri. Ûguo nwaguo Ngai-Mûnene, Ngai wenyu ageeka kûrî mavûrûri mau mûretigîra.

²⁰ Ngai-Mûnene, Ngai wenyu nîagaatûma andû acio megue guoya, nginya rîrîa arîa onthe magaatigara methithîte kuuma kûrî mue makaaûragwa.

²¹ Kwoguo mûtigetigîre andû acio. Ngai-Mûnene, Ngai wenyu arî vamwe namue; nî Ngai mûnene na wagîrîrwe nî gwîtigîrwa.

²² Ngai-Mûnene, Ngai wenyu nîakaamwîngatîra andû arîa marî mavûrûri marîa mûgaatonya kavora wa kavora. Mûtikamengate onthe wa rîmwe, nîûndû mweka guo nyamû cia kîthaka nîikengîva na imûtoorie.

²³ Ngai-Mûnene, Ngai wenyu nîakaarekereria nthû cienyu kûrî mue na atûme magaage nginya mathirue.

²⁴ Ngai-Mûnene nîakaarekereria athamaki ao kûrî mue nîguo mûmaûrage mariganîre. Gûtirî mûndû ûkaamwîtirîria nginya mûmathirie onthe.

²⁵ Nîmûkaavîvia mîvuanano ya kumua ya ngai ciao. Mûtigacumîkîre sîlûva kana thaavu ciao kana mûcioce ituîke cienyu nîûndû nî mûgiro kûrî Ngai-Mûnene.

²⁶ Mûtikavire ngai icio cia mûvuanano mîciîrî yenyu, nîguo mûtikarumwe ta cio. Nwanginya mûmene na mûnyarare ngai icio cia mîvuanano, nîûndû nî nume nî Ngai-Mûnene.