Gûco 5 - ÎVUKU RÎA ÛVORO MWARO

Maathani îkûmi

¹ Musa nîwetire andû onthe a Isiraeli vamwe na akîmeera atîrî, “Mue andû a Isiraeli tathikîrîriani, mawatho na irîra irîa ngûmwîra ûvoro wacio ûmûnthî nîguo mûimenye na mûivingagie na kinyi.

² Ngai-Mûnene Ngai wetû nîwarûthire kîrîkanîro natue kîrîmarî gîa Sinai.

³ Kîrîkanîro kîu gîtiarî Kîam methe metû, nwatî aarûthire natue tuonthe arîa tûrî mwoyo ûmûnthî.

⁴ Ngai-Mûnene nîwaririe namue mûkîyonagîra arî mwakirî kûu kîrîmarî.

⁵ Nie nînarûngamire gatagatî ka Ngai-Mûnene namue nîguo nîmûmenyithie ûrîa aaugaga nîûndû nîmwetigagîra mwaki na mûtingîavotire kûthiî kîrîmarî îgûrû. “Ngai-Mûnene nîwaugire atî,

⁶ ‘Nie, nînie Ngai-Mûnene, Ngai wenyu ûrîa wamûrutire vûrûri wa Misiri, kûrîa mwarî ûkomborî.

⁷ “ ‘Ndûkagooce ngai ciîngî tiga nie.

⁸ “ ‘Ndûkerûthîre mîvuanano ya kîndû wa kîonthe kîrî îgûrû kana kîrî gûkû nthî, wana kana kîrî manjîrî.

⁹ Ndûgaciînamîrîre kana ûigooce. Nîûndû nie Ngai-Mûnene, Ngai waku, nî Ngai wî wîru. Ngaakinyîria ciana waganu wa methe, nginya rûciaro rwa kathatû na rwa kana rwa andû arîa mamenete.

¹⁰ Nwatî nîngoonania wendo ûtathiraga kûrî andû ngiri nyîngî, arîa mamendete na mathîkagîra maathani makwa.

¹¹ “ ‘Ndûkanagwete rîîtwa rîa Ngai-Mûnene, Ngai waku na îtherû nîûndû Ngai-Mûnene, Ngai waku nîakaaverithia andû arîa magwetaga rîîtwa rîake na îtherû.

¹² Kûngûagîra mûthenya wa thavatû na ûwamûrage, wata ûrîa Ngai-Mûnene, Ngai waku aakwathire.

¹³ Rutaga wîra waku wonthe mîthenya îtandatû.

¹⁴ Nwatî mûthenya wa mûgwanja nî thavatû ya Ngai-Mûnene, Ngai waku. Mûthenya ûcio, ndûkarutage wîra wana ûrîkû, we mwene, kana mûvîcîguo, kana mwarîguo, kana ndungata yaku ya mûndûmûrûme kana ya mûndûmûka kana ndegwa yaku, kana mvunda yaku kana nyamû yaku wa yonthe, kana mûgeni ûrîa wî gwaku mûciî. We na ndungata ciaku nwanginya mûvurûkage mûthenya ûcio.

¹⁵ Ririkana atî vîndî îmwe warî Ngombo vûrûrirî wa Misiri, na Ngai-Mûnene, Ngai waku nîwakûrutire kuo na vinya na wathani na nî kîo Ngai-Mûnene, Ngai waku arakwatha ûkûngûagîre mûthenya wa thavatû.

¹⁶ Tîîa aguo na nyûkwe wata ûrîa Ngai-Mûnene, Ngai waku akwathîte wîkage. Weka ûguo maûndû maku nîmakûvua na nîûgûtûûra vîndî ndaca vûrûrirî ûrîa Ngai-Mûnene, Ngai waku agûkûva.

¹⁷ “ ‘Ndûkaûragane.

¹⁸ “ ‘Ndûkatharanie.

¹⁹ “ ‘Ndûkaîe.

²⁰ “ ‘Ndûkaigîrîre mûndû ûrîa wîngî kîng'enyo.

²¹ “ ‘Ndûkerirîrie mûka wa mûndû ûrîa wîngî, ndûkerirîrie nyomba ya mûndû ûrîa wîngî, kana mûgûnda wake, ndungata yake ya mûndûmûrûme kana ya mûndûmûka, kana ndegwa yake, kana mvunda yake, kana kîndû gîake wa kîonthe.’

²² “Mama nîmo maathani marîa Ngai-Mûnene aamûveere muonthe rîrîa mwacemanîtie kîrîmarî. Rîrîa aaririe na mûgambo mûnene arî mwakirî, matuurî na nduma nene, ndongerera Maathani mengî tiga mama. Nîwacokire akîandîka Maathani mau ivengererî igîrî cia mathiga na akînengera cio.

Andû nîmegwire guoya

²³ “Vîndî îrîa mwegwire mûgambo kuuma ndumarî îo îgûrû rîa kîrîma kîrîa gîakanaga mwaki, atongoria onthe a mîvîrîga yenyu, na athuuri nîmaaûkire

²⁴ na makîmbîra atî, ‘Ngai-Mûnene, Ngai wetû nîwatwonirie riiri na ûnene wake rîrîa twegwire akîaria arî mwakirî! Ûmûnthî nî twona Ngai akîaria na mûndû na îthenya rîa mûndû ûcio gûkua agatûûra mwoyo.

²⁵ Nwatî tûngîîvira ûgwatirî wa gîkuû rîngî nîkî? Mwaki ûcio mûnene ûguo nîûgûtûvîvia tûkue tûthire tûngîgua mûgambo wa Ngai-Mûnene, Ngai wetû rîngî.

²⁶ Kûrî mûndû wanegua mûgambo wa Ngai ûrîa ûtûûraga mwoyo akîaria arî mwakirî ta ûrîa twîguîte na agatûûra mwoyo?

²⁷ Musa, coka na ûthikîrîrie maûndû monthe marîa Ngai-Mûnene, Ngai wetû akuga. Ûcoke ûke ûtwîre maûndû mau monthe agûkwîra na nî tûkûmegua na tûmeke.’

²⁸ “Ngai-Mûnene nîwegwire maûndû marîa mwaragia na akîmbîra atî, ‘Nînegua maûndû marîa andû aya makwîra na nî ma ma.

²⁹ Naarî kethîrwa mageciragia ûguo vîndî cionthe, mandîîage na mathîkagîre maathani makwa! Mangîka ûguo, maûndû mao monthe na ma njiarwa ciao makethagîrwa marî maro tene na tene.

³⁰ Thiî ûmeere macoke magemarî mao.

³¹ Nwatî we Musa rûngama ava nîrî, na nîngûkûva Maathani monthe, Mawatho na matuîro ma ciira. Mathomithieni andû nîguo makaamathîkîra makinya vûrûri ûrîa ngaamava megwatîre.’

³² “Mue andû a Isiraeli, menyererani mwone nîmwavingia maûndû monthe marîa Ngai-Mûnene, Ngai wenyu amwathîte. Mûtikaregane na watho wanarî ûmwe wa Ngai-Mûnene.

³³ Athîkagîrani maûndû monthe marîa Ngai-Mûnene, Ngai wenyu amwathîte nîguo maûndû menyu methagîrwe marî maro, na mûthiî na mbere gûtûûra vûrûrirî ûrîa mûkwîgwatîra.