Gûco 4 - ÎVUKU RÎA ÛVORO MWARO

Musa nîwerire andû a Isiraeli mathîkagîre Ngai

¹ Musa nîwacokire akîra andû a Isiraeli atîrî, “Kwoguo athîkagîrani mawatho monthe na matuîro ma ciira marîa nîramûthomithia, na nî mûgaatonya na mûtûûre vûrûri ûrîa Ngai-Mûnene, Ngai wa methe menyu akûmûva.

² Mûtikongerere kana mûrute ûndû wanarî ûmwe kûrî maûndû marîa ngûmwatha. Athîkagîra maathani ma Ngai-Mûnene, Ngai wenyu marîa nîmûvete.

³ Mue nîmwonire na metho menyu ûrîa Ngai-Mûnene eekire arî kîrîmarî gîa Peori. Nîwaûragire andû onthe arîa maagoocagîra Baali kuo.

⁴ Nwatî andû amwe gatagatîrî kenyu, arîa maarî evokeku kûrî Ngai-Mûnene, Ngai wenyu, marî mwoyo nginya ûmûnthî.

⁵ “Nie nînîmûthomithîtie mawatho monthe na matuîro ma ciira, wata ûrîa Ngai-Mûnene, Ngai wakwa aambathire mbîke. Mûkaavingagia mawatho mau mûrî vûrûrirî ûrîa mûgûtonya mwîgwatîre ûtuîke wenyu.

⁶ Mathîkagîreni na kinyi na mûmavingagie. Ûndû ûyû nîguo ûgaatûmaga mwonwe nî andû a mavûrûri marîa mengî mûrî aûgî na mûrî na ûmenyo mwîngî. Andû megua mawatho mau monthe makaaugaga, ‘Nama andû aya a vûrûri ûyû marî na ûûgî na ûmenyo mwîngî mûno!’

⁷ “Nî vûrûri ûrîkû wana ethîrwa ûrî mûnene atîa wîthagîrwa ûrî na ngai îrî vakuvî naguo ta ûrîa Ngai-Mûnene, Ngai wetû ethagîrwa arî vakuvî natue rîrîa rîonthe twamwîta?

⁸ Na nî vûrûri ûrîkû wana ethîrwa ûrî mûnene atîa ûrî na mawatho maro na matuîro ma ciira ta kîrîra gîkî kîonthe nîmûthomithîtie ûmûnthî?

⁹ Îîmenyagîrîreni na mûtikariganîrwe nî maûndû marîa mwîyonerete na metho menyu; maririkanageni ûtûûrorî wenyu wonthe. Mamenyithanagieni kûrî ciana cienyu na kûrî ciana cia ciana cienyu.

¹⁰ Mamenyithagieni ûvoro wa mûthenya ûrîa mwarûngamire mbere ya Ngai-Mûnene, Ngai wenyu kîrîmarî Kîam Horebu, rîrîa aambîrire, ‘Îta andû a Isiraeli vamwe. Nîrenda megue ûrîa nguga, nîguo mamenye kûmbathîkagîra mavinda marîa monthe magûtûûra nthî, na mathomithagie ciana ciao gwîka guo.’

¹¹ “Meereni ûrîa mwathiîre na mûkîrûngama nthî ya kîrîma gîa Sinai. Nakîo kîrîma kîu nîgîakunîkirwe nî matu mairû na mwaki warîrîmbûkaga nginya matuurî.

¹² Meereni ûrîa Ngai-Mûnene aaririe namue arî ndarî ya mwaki ûcio. Nîmwegucaga ciugo irîa aamwîraga nwatî mûtiamwonaga. Mwegucaga mîario yake tu.

¹³ Nîwamûmenyithirie ûvoro wa kîrîkanîro kîrîa aarîkanîre namue, na akîathana atî mûkîrûmagîrîre; nakîo nî maathani îkûmi marîa andîkire ivengererî igîrî cia mathiga.

¹⁴ Vîndî îo Ngai-Mûnene nîwambathire akîmbîra nîmûthomithie mawatho monthe na matuîro ma ciira marîa mûkaarûmagîrîra mûrî vûrûrirî ûrîa mûthiîte kwîgwatîra ûtuîke wenyu.

Gûkaanua kûvoya mîvuanano

¹⁵ “Kwoguo nwanginya mûmenyerere mûtikariganîrwe atî vîndî îrîa Ngai-Mûnene aamwarîrie arî mwakirî kûu kîrîmarî gîa Sinai, mûtiamwona na mûtiîcî mûmbîre wake. Nîûndû wa ûguo îîmenyerereni mûno,

¹⁶ nîguo mûtikevie na njîra ya kwîrûthîra ngai cia mîvuanano ya kumua, îrî na mûvuanîre ta wa mûndûmûrûme kana mûndûmûka,

¹⁷ kana mûvuanîre wa nyamû wana îrîkû îrîa îrî gûkû nthî, kana gîconi kîrîa kîgûrûkaga rîerarî,

¹⁸ kana nyamû îrîa îkurumaga gûkû nthî, kana wa nthamaki ya manjîrî.

¹⁹ Rîrîa mwaroria îgûrû mwona riûa, mweri, na njata, na ciûmbe cionthe cia îgîrû, îîmenyagîrîreni mûtikagwe mageriorî ma gûciînamîrîra mûigooce kana mûitungatîre. Ngai-Mûnene, Ngai wenyu avecanîte indo icio kûrî andû onthe a nthî.

²⁰ Nwatî mue nîmue andû ake arîa aarutire Misiri mwakirî warî mûnene mûno. Aamûrutire kuo nîguo mûtuîke andû ake, na nîguo mûrî ûmûnthî.

²¹ Ngai-Mûnene nîwarakarire nînie nîûndû wenyu na akîîvîta akiuga atî, ndikaaringa rûnjî rwa Jorodani na ndigaatonya vûrûri ûcio mwaro Ngai-Mûnene, Ngai wenyu amûveete ûtuîke îgai rîenyu.

²² Nie ngaakuîra vûrûrirî ûyû, ndikaaringa rûnjî rwa Jorodani, nwatî mue nîmûkaaringa mûthiî mûkegwatîre vûrûri ûcio mwaro ûtuîke wenyu.

²³ Menyererani mûno mûtikariganîrwe nî kîrîkanîro kîrîa mwarîkanîre na Ngai-Mûnene, Ngai wenyu. Mûtikerûthîre mûvuanano wa wonthe wa indo irîa Ngai-Mûnene, Ngai wenyu aamûkaanirie.

²⁴ Ngai-Mûnene, Ngai wenyu ekariî ta mwaki ûrîa ûvîvagia ûkathiria viû. Ke nî Ngai wî wîru.

²⁵ “Rîrîa mûgaatûûra vûrûrirî ûcio wa Kanaani îvinda îraca na mûgîe na ciana, nacio ciana icio igîe na ciana ciacio, mûtikevie mbere ya Ngai-Mûnene, Ngai wenyu, na njîra ya kwîrûthîra mîvuanano ya mûthemba wa wonthe, nîûndû ûndû ûcio nwa ûrakarie Ngai.

²⁶ Ûmûnthî nîngwîta îgûrû na nthî ituîke aira atî, mwarega kûmbathîkîra mûrî vûrûrirî ûcio mûthiîte gûtûûra, nîmûkaathirua viû. Mûtigaatûûra kuo îvinda îraca, nwatî nîmûkaathirua viû.

²⁷ Ngai-Mûnene nîakaamûnyagania mavûrûrirî marîa mengî, nwatî nî andû anini magaatigara kûu mavûrûrirî mau.

²⁸ Mûrî mavûrûrirî mau, mûgaatungataga ngai cia mûvuanano irûthîtwe nî andû: ngai cia mîtî, mathiga, irîa itonaga, itegucaga, itarîcaga na itanungagîra.

²⁹ Mûrî kûu, nîmûgaacaria Ngai-Mûnene, Ngai wenyu na nîmûkaamwona, ethîrwa nama nîmûkaamûcaria na ngoro yonthe na mwoyo wonthe.

³⁰ Rîrîa mûkaagîa na mathîna na maûndû mama monthe mekîke kûrî mue, nîmûgaacokerera Ngai-Mûnene, Ngai wenyu na mûmwathîkîre.

³¹ Ngai-Mûnene, Ngai wenyu arî ntha. Ndakaamûtiganîria kana amûcûkangia na ndakaariganîrwa nî kîrîkanîro kîrîa ke mwene aarûthire na methe menyu na akîmerîra na mwîvîtwa.

³² “Tuîriani îgûrû rîgiî mavinda marîa mavîtûku rîrîa mûtaarî aciare nginya rîrîa Ngai aaûmbire mûndû gûkû nthî. Tuîriani nthî yonthe mwone kana kûrî ûndû mûnene ta ûyû wanekîka kana waneguîka.

³³ Kûrî andû manegua mûgambo wa ngai îkîaria îrî mwakirî na magîtûûra ta ûrîa mue mwegwire na mûgîtûûra?

³⁴ Kûrî ngai yanageria kûthiî kûruta andû vûrûrirî wîngî na kûmatua andû ake ta ûrîa Ngai aamwîkire mûrî Misiri? Ngai-Mûnene, Ngai wenyu nîwatûmîre ûvoti na vinya wake mwîngî wa mûkîonaga. Nîwatûmire andû a Misiri manyitwe nî mûthiro na mbaara, nîwaringire ciama na morirû magîkîka na agîtûma maûndû ma kûmakania mekîke.

³⁵ Mwonirue maûndû mau nîguo mûmenye atî Ngai-Mûnene nî Ngai, na gûtirî wîngî tiga Ke.

³⁶ Nîwatûmire mwîgue mûgambo wake arî kûu îgûrû nîguo amûthomithie, nakuo gûkû nthî nîwatûmire mwone mwaki wake mûnene na mûkîgua mûgambo wake ûrî mwakirî ûcio.

³⁷ Ngai-Mûnene nîwendete methe menyu; kwoguo nîwamûthuurire kuuma kûrî njiarwa ciao na akîmûruta Misiri na vinya wake mûnene.

³⁸ Ke nîwengatire andû a mavûrûri manene na maarî na vinya kûrî mue, nîguo amûvire kuo na amûve vûrûri ûcio wao ûtuîke wenyu ta ûrîa gwîkariî ûmûnthî.

³⁹ Kwoguo menyani kuuma ûmûnthî na mwige ûndû ûyû ngororî cienyu atî, Ngai-Mûnene nî Ngai wa îgûrû na nthî, gûtirî ngai îngî.

⁴⁰ Kwoguo athîkagîrani irîra ciake na maathani make marîa namûva ûmûnthî nîguo maûndû menyu vamwe na njiarwa cienyu magîre na mûtûûre vîndî ndaca vûrûrirî ûrîa Ngai-Mûnene, Ngai akûmûva ûtuîke wenyu tene na tene.”

Matûûra ma kûûrîra marîa marî mwena wa îrathîro wa rûnjî rwa Jorodani

⁴¹ Musa nîwacokire akîamûra matûûra mathatû mwena wa îrathîro wa rûnjî rwa Jorodani,

⁴² nîguo mûndû ûrîa ûngîûraga mûndû ûtarî nthû yake na atakwenda aûragîra îtûûrarî rîmwe rîa mama nîguo ndakaûragwe.

⁴³ Nîwamûrire îtûûra rîa Bezeri rîrîa rîrî werûrî kûndû kûrîa kwaraganu rîtuîke rîa andû a mûvîrîga wa Reubeni, na îtûûra rîa Ramothi rîrîa rîrî vûrûrirî wa Gileadi rîtuîke rîa mûvîrîga wa Gadi, na îtûûra rîa Golani rîrîa rîrî vûrûrirî wa Bashani rîtuîke rîa mûvîrîga wa Manase.

Musa nîwavere andû a Isiraeli watho wa Ngai

⁴⁴ Ûyû nîguo watho ûrîa Musa aaveere andû a Isiraeli.

⁴⁵ Ino nîcio irîra, mawatho, na matuîro ma ciira marîa Musa aaveere andû a Isiraeli rîrîa maaumire Misiri.

⁴⁶ Vîndî îo maarî Kîamndarî mwena wa îrathîro wa rûnjî rwa Jorodani kwerekera Bethi-peori. Vûrûri ûyû wathagwa nî Sihoni, mûthamaki wa Amori, ûrîa wathanaga arî îtûûrarî rîa Heshiboni. Sihoni nîwavootirwe nî Musa na andû a Isiraeli marîkia kuuma Misiri.

⁴⁷ Andû a Isiraeli nîmegwatîre vûrûri ûcio vamwe na vûrûri wa Ogu, mûthamaki wa Bashani, athamaki aîrî a Amori arîa maathaga mavûrûri marîa marî mwena wa îrathîro wa rûnjî rwa Jorodani.

⁴⁸ Vûrûri ûcio wambîrîrîtie îtûûra rîa Aroeri rûtere rwa Rûnjî rwa Arinoni, nginya kîrîmarî gîa Sirioni

⁴⁹ vamwe na gîcunjî kîonthe Kîam mwena wa îrathîro wa rûnjî rwa Jorodani, nginya Îria Îtune mwena wa îveti nthî ya irîma cia Pisiga.