Gûco 34 - ÎVUKU RÎA ÛVORO MWARO

Gûkua kwa Musa

¹ Musa nîwaumire kûndû kûrîa kwaraganu vûrûrirî wa Moabu, na akiunûkia kîrîmarî Kîam Nebo akîthiî nginya kathûrûmûndû ga kîrîma gîa Pisiga kûng'ethanîra na Jeriko. Arî vau, Ngai-Mûnene nîwamwonirie vûrûri wonthe: kuuma Gileadi nginya Dani;

² vûrûri wonthe wa Nafutali; vûrûri wa Efiraimu na wa Manase; vûrûri wonthe wa Juda nginya mwena wa îthûîro wa îria rîa Mediterania.

³ Nîwamwonirie Negebu; kûndû kûrîa kwaraganu, kuuma Zoari nginya Kîamndarî Kîam Jeriko, îtûûra rîa mîtî ya mîkîndû.

⁴ Ngai-Mûnene nîwacokire akîra Musa atîrî, “Ûyû nîguo vûrûri ûrîa nerîîre Iburahimu, Isaka na Jakovu na mwîvîtwa atî, nîngaava njiarwa ciao. Nînagwîtîkîria ûwone na metho, nwatî ndigaagwîtîkîria ûkinye kuo.”

⁵ Kwoguo, Musa ndungata ya Ngai-Mûnene nîwakuîrîre kûu vûrûrirî wa Moabu wata ûrîa Ngai-Mûnene aaugîte.

⁶ Ngai-Mûnene nîwamûthikire Kîamndarî Kîam Moabu, kûng'ethanîra na îtûûra rîa Bethi-peori, nwatî nginya ûmûnthî, gûtirî mûndû wîcî varîa aathikirwe.

⁷ Musa aakwire arî na ûkûrû wa mîaka îgana rîmwe rîa mîrongo îîrî (120); arî na vinya wa mwîrî, na atarî mûru metho.

⁸ Andû a Isiraeli nîmaacakaîre Musa îvinda rîa mîthenya mîrongo îthatû (30) marî kûndû kûrîa kwaraganu vûrûrirî wa Moabu, nginya rîrîa îvinda rîa macakaya rîathirire.

⁹ Nake Joshua mûvîcî wa Nuni nîwecûrirwe nî ûûgî nîûndû Musa nîwamûthuurîte atuîke mûtongoria vuva wake. Andû a Isiraeli nîmaathîkîre Joshua na nîmaarûmagîrîra maûndû monthe marîa Ngai-Mûnene aathîte Musa.

¹⁰ Kuuma vîndî îo, gûtirî kwagîa mûrathi wîngî ta Musa vûrûrirî wa Isiraeli, mûndû maaranagîria na Ngai-Mûnene metho kwa metho.

¹¹ Gûtirî mûrathi wanaringa ciama na kwonania morirû ta ûrîa Ngai-Mûnene aatûmire Musa eke kûrî mûthamaki wa Misiri, ndungata ciake na vûrûri wake wonthe.

¹² Gûtirî mûrathi wîngî wanavota gwîka maûndû manene na ma gwîtigîrwa gûkîra marîa Musa eekire mbere ya andû onthe a Isiraeli.