Gûco 33 - ÎVUKU RÎA ÛVORO MWARO

Musa nîwarathimire mîvîrîga ya Isiraeli

¹ Gîkî nîkîo kîrathimo kîrîa Musa, mûndû wa Ngai aatigîre andû a Isiraeli mbere ya akue.

² Augire atî: Ngai-Mûnene aaumire kîrîmarî gîa Sinai; aatumîrîre ta riûa kuuma kîrîmarî Kîam Edomu, na akîarîra andû ake arî kîrîmarî gîa Parani. Aaûkire arî na araika ngiri makûmi meengî, aanyitîte rûrîrîmbî rwa mwaki na njara.

³ Ngai-Mûnene nîwendete andû ake, na nîagitagîra andû ake. Kwoguo nîmenamagîrîra magûrûrî make, na makamûkîra mawatho make.

⁴ Musa nîwatwathire twathîkîre watho ûrîa aatûveere, nîûndû nîguo kîndû Kîam goro mûno kîrîa andû a Isiraeli maagaire.

⁵ Ngai-Mûnene nîke watuîkire mûthamaki wa andû ake a Isiraeli, vîndî îrîa mîvîrîga na atongoria a andû a Isiraeli maagomanîte vamwe.

⁶ Musa nîwaririe ûvoro wîgiî mûvîrîga wa Reubeni akiuga atîrî, “Mûvîrîga wa Reubeni ûrotûûra na ndûkathire, wana ethîrwa andû a guo tî eengî.”

⁷ Naguo ûvoro wîgiî Juda nîwaugire atîrî, “We Ngai-Mûnene tathikîrîria kîrîro Kîam andû a Juda; Macokanîrîrie vamwe rîngî na mîvîrîga îrîa îngî. We Ngai-Mûnene, mongerere vinya, na ûmatethie kûrûa na nthû ciao.”

⁸ Ûvoro wîgiî mûvîrîga wa Lawi Musa nîwaugire atîrî, “We Ngai-Mûnene onania wendi waku kûrî Alawi acio aku evokeku, na njîra ya Urimu na Thumimu. Nîwamageririe marî Masa, nîwamatuîririe marî vakuvî na manjî ma Meriba.

⁹ Alawi nîmaatwire matiganîrie aciari ao, makîriganîrwa nî aa mûrwang'ina na aa mwarwang'ina, na magîtiganîria ciana ciao. Nîmaavingirie maathani maku, na makîrûmîrîra kîrîkanîro gîaku.

¹⁰ Nîmakaathomithia njiarwa cia Jakovu irîra ciaku; na mathomithie andû a Isiraeli watho waku. Nîmagaakûvîvîria ûbani, na nîmakaarutîra matega ma kûvîvua metharî yaku ya kîgongoona.

¹¹ We Ngai-Mûnene, mavotithie gûtonga, na wîtîkîre wîra wa njara ciao. Cûkangia vinya wa nthû ciao, nîguo nthû ciao itikavote kûrûa nao rîngî.”

¹² Ûvoro wîgiî mûvîrîga wa Benjamini nîwaugire atîrî, “Ûyû nîguo mûvîrîga ûrîa Ngai-Mûnene endete, ke ekaraga aûgitîrîte, ekaraga aûrigicîrîtie vîndî cionthe, na atûûranagia nao vîndî cionthe.”

¹³ Ûvoro wîgiî mûvîrîga wa Josefu nîwaugire atîrî, “Ngai-Mûnene arotûma îme rîgwe kuuma îgûrû, na amaretere manjî marîa matherûkaga kuuma rungu rwa nthî.

¹⁴ Ngai-Mûnene aromarathima na matunda maro marîa matunîvaga vîndî ya riûa, na amavecage maketha meengî maro wa kîmera.

¹⁵ Aromarathima na matunda maro marîa maumaga irîmarî cia tene, na maciaro meengî kuuma irîmarî irîa itûûraga tene na tene.

¹⁶ Vûrûri wao nîwîcûrwe nî indo cionthe mbaro, ûrorathimwa nîûndû wa ntha cia Ngai-Mûnene, ûrîa waririe arî kîthakarî kîrîa gîakanaga mwaki. Irathimo icio nîikinyîre mûvîrîga wa Josefu, nîûndû nîke warî mûtongoria gatagatîrî ka aa mûrwang'ina.

¹⁷ Josefu arî vinya ta ndegwa, arî na mvîa ta cia mbogo. Nîagaatindîka andû a mavûrûri nacio, nîakaamatindîka onthe nginya mîthiia ya nthî; Andû a mbarî ya Efiraimu marî na vinya ta ûcio maita ngiri makûmi meengî, nao andû a mbarî ya Manase marî na vinya ta ûcio maita makiri.”

¹⁸ Ûvoro wîgiî mûvîrîga wa Zebuluni na wa Isakaru nîwaugire atîrî, “Mue andû a Zebuluni mûrothatûkwa nî wîra wenyu, namue Isakaru mûrothatûkwa mûrî mîciîrî yenyu.

¹⁹ Nîmageta andû onthe magomane vamwe kîrîmarî; na marute magongoona marîa magîrîre vo. Nîûndû marutaga ûtonga wao îriarî, na mûthangarî ûrîa ûrî rûtererî rwa îria.”

²⁰ Ûvoro wîgiî mûvîrîga wa Gadi nîwaugire atîrî, “Kûrathimwa nî ûrîa waveere Gadi vûrûri mwariî. Mûvîrîga wa Gadi wetagîrîra kûu ta mûnyambû, nîguo ûtamburure njara kana kîongo.

²¹ Nîmoocire vûrûri ûrîa warî mwaro mûno ûtuîke wao; vandû varîa vaamûrîtwe varî va mûtongoria. Rîrîa atongoria a Isiraeli maagomanîte vamwe, nîmaathîkîre maathani ma Ngai-Mûnene na mawatho make.”

²² Ûvoro wîgiî mûvîrîga wa Dani nîwaugire atîrî, “Mûvîrîga wa Dani wîkariî ta kaana ka mûnyambû; ûtharîkagîra nthû ciao kuuma Bashani.”

²³ Ûvoro wîgiî mûvîrîga wa Nafutali nîwaugire atîrî, “We Nafutali, wîcûrîtwe nî ntha na irathimo cia Ngai-Mûnene; vûrûri waku ûrî mwena wa îveti wambîrîrîtie îriarî rîa Galili.”

²⁴ Ûvoro wîgiî mûvîrîga wa Asheri nîwaugire atîrî, “Mûvîrîga wa Asheri ûrorathimwa gûkîra mîvîrîga îrîa îngî yonthe, wendwe nî Ngai gûkîra aa mûrwanyûkwe, ûgîe na mîtî mîîngî ya mîtamaiyû îrîa îciaraga matunda.

²⁵ Ivingo cia matûûra maku ikethagîrwa irî cia cuuma na gîcango, ûkethagîrwa wî mûgitîre ûtûûrorî waku wonthe.”

²⁶ Musa nîwarîkîrîrie na kuga atîrî, “Mue andû a Isiraeli, gûtirî ngai îkariî ta Ngai wenyu, atuîkanagîria îgûrû na vinya wake, atuîkanagîria matuurî aûkîte kûmûtethia.

²⁷ Ngai ûrîa ûtûûraga tene na tene nîke ûmûgitagîra; vinya wake ûrîa ûtûûraga tene na tene nîguo ûmûnyitagîrîra. Nîwengataga nthû cienyu wa ûrîa mwathiîcaga na mbere, na nîwamwîrire mûicûkangie viû.

²⁸ Kwoguo andû a Isiraeli matûûraga marî na thayû, njiarwa cia Jakovu itûûraga itarî na thîna, vûrûrirî wîcûrîte ngano na ndivei, kûrîa mbura yuraga kuuma îgûrû.

²⁹ Kûrathimwa nî mue andû a Isiraeli! Gûtirî andû mavaana tamue, andû a vûrûri ûrîa wavonokirue nî Ngai-Mûnene. Ngai-Mûnene nîke ngo yenyu na rûviû rwenyu, nîke ûmûgitagîra na akamûvootanîra. Nthû cienyu nîigaaûka mbere yenyu ciînyivîtie, namue nî mûkaamakinyangîra nthî.”