Gûco 32 - ÎVUKU RÎA ÛVORO MWARO

¹ “Tathikîrîriani ngîaria, mue îgûrû, thikîrîriani ûrîa nguuga mue nthî.

² Kîrîra gîakwa nî kiura ta mbura, ciugo ciakwa igwe nthî ta îme. Ciugo ciakwa ciure ta mbura ya rûnyunyuû îgûrû rîa nyaki nini, ta mbura ya rûnyunyuû îgûrû rîa mîmera mînini.

³ Nîngaanîrîra rîîtwa rîa Ngai-Mûnene, nao andû nîmakaauga, Ngai nî mûnene.

⁴ “Ke nî ta îthiga, wîra wake nî mûkinyanîru, maûndû make monthe nî ma kîvooto. Ngai nî mwîvokeku na wa ûma; ekaga maûndû marîa magîrîrîte na ma kîvooto.

⁵ Nwatî ciana ciake itirî na wîvokeku, tî agîrîru gûtuîka andû ake, nî rûciaro rwaganu na rwîvia.

⁶ Ûguo nîguo mwagîrîrwe nî gwîka Ngai-Mûnene, mue irimû ino na mûtarî na ûûgî? Kinthî tîke aguo ûrîa wamûmbire, ûrîa wamûmbire na akîmûtua rûrîrî?

⁷ “Taririkanani ûvoro wa mavinda ma tene; ta îcirieni ûvoro wa mîaka mîîngî mîvîtûku, ûriani methe menyu na nîmakûmwîra ûrîa gwekariî, ûriani athuuri enyu na nîmakûmwîra ûrîa gwekariî.

⁸ Rîrîa Ngai ûrîa Ûrî Îgûrû Mûno aagaîre mavûrûri îgai rîao, rîrîa agaanagia andû nîwavere mavûrûri kûndû gwa gûtûûra, wa vûrûri kûringana na mûraika wa guo.

⁹ Nîwathuurire njiarwa cia Jakovu matuîke andû ake, na akîmamûra matuîke andû ake.

¹⁰ “Aamethîrîrie makîûrûraga werûrî, werû mûtiganîrie na warî na rûkûngi rûnene. Nîwamamenyerere na akîmagitîra, wata ûrîa angîmenyerera riitho rîake ke mwene.

¹¹ Ta ûrîa nderi îtharagia kîomba Kîamyo; na îkagûrûka îgûrû rîa twana twayo, yambararagia mathagu mayo nîguo îtûnyitîrîre, na îgatûkuua tûrî mathagurî ma yo.

¹² Ngai-Mûnene ke mwene nîke watongoririe andû ake, na gûtirî ngai îngî yamûtethererie.

¹³ “Nîwametîkîrie mathiîre kûndû kûrîa gûtûgîru, makîrîcaga irio irîa ciarî mîgûndarî. Nîwamavere ûûkî kuuma mathigarî makîrîa, na maguta ma ndamaiyû kuuma rûciararî.

¹⁴ Ngai-Mûnene nîwamavere maguta na îriia kuuma ndîthiarî, maarî na mathunya ma ng'ondu na ndûrûme, na ng'ombe cia Bashani na mbûri. Nîwamavere ngano irîa mbaro mûno, na ndivei îrîa mbaro mûno.

¹⁵ “Andû a Isiraeli nîmaarîre waro na makînora, nwatî makîregana nake; nîmaanorire magîtunguva na makîvaa mûno. Nîmaareganire na Ngai ûrîa wamaûmbire, na magîtiganîria mûvonokia wao mûnene.

¹⁶ Nîmaatûmire Ngai-Mûnene egue wîru nîûndû wa kûgooca ngai cia mîvuanano, na magîtûma arakare nîûndû wa ciîko ciao njûku.

¹⁷ Nîmaarutîre ndaimono magongoona, nwatî tî ngai irîa methe mao maaicî; ngai irîa ciaumîrîte kavinda gatarî karaca, irîa methe mao mataatîîaga.

¹⁸ Nîmaariganîrwe nî Îthiga rîrîa rîamaveere mwoyo, nîmaariganîrwe nî Ngai ûrîa wamaciarire.

¹⁹ Rîrîa Ngai-Mûnene oonire ûguo nîwamatiganîrie, nîwatiganîrie erîtu na anake ake.

²⁰ Nîwaugire atî, ‘Nîngaamathitha ûthiû wakwa,’ nîngaaroria mone ûrîa makaarîkîrîria, nîûndû nî rûciaro rûremi na andû matarî evokeku.

²¹ Nîmatûmîte mbîgue wîru nîûndû wa indo icio metaga ngai, nîmandakarîtie nîûndû wa ngai ciao cia mîvuanano. Kwoguo nîngaatûma megue wîru nî andû matarî kîene, nîngaatûmîra vûrûri wa irimû nîguo marakare.

²² Marakara makwa makanîte ta mwaki, mavîvagia nthî na indo cionthe irîa irî kuo. Mavîvagia nginya kwa arîa akuû, na makathiria mîcingi ya irîma.

²³ “‘Nîngaamaretithîria mîthiro mîîngî mûno, nîngaamatharîkîra na njîra cionthe.

²⁴ Nîmagaakua nîûndû wa yûra, na maûragwe nî mîrimû mîcûku. Nîngaatûma matharîkîrwe nî nyamû cia kîthaka, na ndûme njoka irîa irî ûrogi imarûme.

²⁵ Nthû ciao nîikaamaûragîra vûrûrirî, na andû mecûrwe nî guoya mîciîrî yao. Anake na erîtu nîmakaaûragwa, ngenge na athuuri akûrû wanao nîmakaaûragwa.

²⁶ Nînîngîamathiririe onthe viû, mariganîre gûkû nthî.

²⁷ Nwatî ndingîetîkîrie nthû ciao ciîtîîe, ikiugaga atî nîciavootire andû akwa, wa rîrîa arî nie mwene naamaverithirie.’

²⁸ “Isiraeli nî vûrûri ûtarî mbîguîro, matirî ûmenyo wanarî vanini.

²⁹ Kethîrwa maarî na ûûgî nîmaangîamenyire kîrîa gîatûmire mavootwe, nîmangîamenyire ûrîa makaarîkîrîria.

³⁰ Nî atîa mûthigari ûmwe nthû angîvoota athigari ngiri îmwe a Isiraeli? Nî atîa athigari aîrî nthû mangîvoota athigari ngiri îkûmi a Isiraeli? Tiga nwa Îthiga rîao amendetie, Ngai-Mûnene amatiganîrîtie?

³¹ Nthû ciao nîciîcî atî ngai ciao itirî na vinya, ngai ciao itirî na vinya ta Ngai wa andû a Isiraeli.

³² Nthû ciao nî mbaganu ta andû a Sodomu na Gomora, ciîkariî ta mîthavibu îrîa îciaraga thavibu ndûrû na irî na ûrogi,

³³ ciîkariî ta ndivei îrûthîtwe na ûrogi wa njoka.”

³⁴ “Ngai-Mûnene augîte atîrî, Nîmvangîte ûrîa ngwîka andû a Isiraeli na nthû ciao, nwanie mbîcî ûrîa mvangîte gwîka.

³⁵ Nînie ngerîvîrîria na nîmaverithie, vîndî nîgaakinya rîrîa makaagwa, mûthenya wao wa kûverithua ûrî vakuvî.

³⁶ Ngai-Mûnene nîakaarekereria andû ake, rîrîa akoona vinya wao wathira. Nîakeeguîra ntha andû onthe a Isiraeli, na gûtirî Mûisiraeli ûkeethîrwa atigarîte arî mwoyo, arî ngombo kana atarî ngombo.

³⁷ Vîndî îo Ngai-Mûnene nîakaaûria andû ake, ‘ngai cienyu irîa mwevokaga imûtethie irî kû?’

³⁸ Irî kû ngai irîa ciarîcaga mathunya ma nyama cia magongoona na ikanyua ndivei ya îtega? Nîciûke imûtethie rîu; nî ciûke imûgitîre.

³⁹ “Menyani rîu atî, Nie nînie Ngai; na gûtirî ngai îngî tiga nie. Nînie mbûragaga na ngariûkia, nînie nguraragia na ngavonia, gûtirî mûndû ûngîvota gûtethûra mûndû njararî ciakwa.

⁴⁰ Wata ûrîa Nie nîrî Ngai ûrîa ûtûûraga mwoyo, nîngûkîrîria njara nîîvîte atî,

⁴¹ rîrîa ngaanoora rûviû rwakwa rûrîa rûvenavenagia, na ndue ciira na kîvooto, nîngerîvîrîria kûrî nthû ciakwa, na mverithie andû arîa mamenete.

⁴² Nîngaatûma mîguî yakwa înyue nthakame. Rûviû rwakwa rûrîe nyama, na rûconjwe nî nthakame ya andû arîa aûrage na mîgwate, na nthû irîa irî njuîrî ndaca.

⁴³ “Mue mavûrûri, kumiani andû a Ngai-Mûnene, nîûndû nîarîvagia arîa maûragaga ndungata ciake. Nîerîvagîrîria kûrî nthû ciake, na akatheria mevia ma andû ake.”

⁴⁴ Musa marî na Joshua mûvîcî wa Nuni nîmaainire rwîmbo rûrû ruonthe andû onthe a Isiraeli makîgucaga.

Mataaro ma mûthiia ma Musa

⁴⁵ Rîrîa Musa aarîkirie kwîra andû onthe a Isiraeli maûndû mau monthe,

⁴⁶ nîwamerire atîrî, “Menyererani mwathîkagîre ciugo irîa namwatha ûmûnthî na mûciîrage ciana cienyu nîguo ivingagie na kinyi ûrîa mawatho mama monthe maugîte irî na wîvokeku.

⁴⁷ Nîûndû tî ciugo ntheri irî mawathorî mama, nwatî nî mûtûûrîre wenyu. Mathîkagîreni na nîmûgûtûûra vîndî ndaca vûrûrirî ûrîa mûthiîte kwîgwatîra mûringo wa rûnjî rwa Jorodani.”

⁴⁸ Mûthenya wa ûcio Ngai-Mûnene nîwerire Musa atîrî,

⁴⁹ “Unûkia kîrîmarî Kîam Abarimu vûrûrirî wa Moabu ûrîa ûng'ethanîrîte na îtûûra rîa Jeriko ûkarorie vûrûri wa Kanaani, ûrîa ngûva andû a Isiraeli ûtuîke wao.

⁵⁰ Nîûgaacoka ûkuîre kûu kîrîmarî ta Aroni mûrwanyûkwe ûrîa wakuîrîre kîrîmarî Kîam Hori;

⁵¹ nîûndû wa muoîrî mûtiarî evokeku kûrî nie mûrî mbere ya andû a Isiraeli rîrîa mwarî manjîrî ma Meriba vakuvî na îtûûra rîa Kadeshi werûrî wa Sini. Mue mûtionania ûtheru wakwa mûrî mbere ya andû a Isiraeli.

⁵² Nîûkoona vûrûri ûcio wî varaca, nwatî ndûgaatonya vûrûrirî ûcio ngaava andû a Isiraeli.”