Gûco 31 - ÎVUKU RÎA ÛVORO MWARO

Joshua nîwatuîkire mûtongoria vuva wa Musa

¹ Musa nîwathiîre na mbere kwarîria andû onthe a Isiraeli,

² na akîmeera atîrî, “Nie nîrî na ûkûrû wa mîaka îgana rîa mîrongo îîrî na ndirî na vinya wa kûvota kûruta wîra rîngî. Wana Ngai-Mûnene nîambîrîte atî ndikaaringa rûnjî rwa Jorodani.

³ Ngai-Mûnene Ngai wenyu ke mwene nîakaaringa athiî mbere yenyu. Nîagaacûkangia andû arîa matûûraga mavûrûri mau monthe, na mwîgwatîre vûrûri wao. Joshua nîke ûkaamûtongoria mûringe rûnjî rwa Jorodani wata ûrîa Ngai-Mûnene aaugire.

⁴ Ngai-Mûnene nîagaacûkangia andû a mavûrûri mau wata ûrîa aacûkangirie Sihoni na Ogi, athamaki a Amori wana vûrûri wao.

⁵ Ngai-Mûnene nîakaamûvotithia kûmavoota na mûmeke wata ûrîa nîmwathîte.

⁶ Gîani na vinya na mûmîrîrie, mûtigetigîre kana mûrwe nî vinya, nîûndû Ngai-Mûnene Ngai wenyu nîke ûkethagîrwa vamwe namue. Ke ndakaamûtiganîria kana amûrekereria.”

⁷ Musa nîwacokire agîta Joshua, na marî mbere ya andû onthe a Isiraeli nîwamwîrire atîrî, “Gîa na vinya na ûmîrîrie nîûndû we nîwe ûgûtongoria andû aya mathiî makegwatîre vûrûri ûrîa Ngai-Mûnene eerîre methe mao.

⁸ Ngai-Mûnene nîke ûkaamûtongoria na ndakaamûtiganîria. Ndakaamûrekereria na ndakaamûtiganîria; kwoguo mûtigetigîre kana mûrwe nî vinya.”

Watho ûkaathomagwa wa mîaka mûgwanja yathira

⁹ Musa nîwandîkire watho wa Ngai na akîûnenganîra kûrî athînjîri-Ngai, Alawi arîa maakuuaga îthandûkû rîa kîrîkanîro Kîam Ngai-Mûnene na atongoria onthe a Isiraeli.

¹⁰ Nîwamaathire atîrî, “Vîndî cionthe mûthiiarî wa mwaka wa mûgwanja, rîrîa andû marekagîrwa mathiirî, na vîndî ya kîrugo gîa tûnyomba,

¹¹ mûkaathomagîra andû onthe a Isiraeli watho ûyû vîndî îrîa mûgomanîte varîa mûgoocagîra Ngai-Mûnene.

¹² Îta andû onthe magomane vamwe: arûme, aka, ciana na ageni arîa marî matûûrarî menyu, nîguo mûndû wa wonthe egue na amenye gûtîîa Ngai-Mûnene Ngai wenyu, na kûrûmîrîra maathani make na kinyi.

¹³ Na njîra îno njiarwa cienyu irîa itanegua watho wa Ngai-Mûnene Ngai wenyu kana iûthoma, nîikaathoma kwathîkîra Ngai-Mûnene, Ngai wenyu mavinda monthe marîa mûgûtûûra mwoyo vûrûrirî ûrîa mûthiîte kwîgwatîra mûringo wa rûnjî rwa Jorodani.”

¹⁴ Ngai-Mûnene nîwacokire akîra Musa atîrî, “Îvinda rîaku rîa gûkua rîrî vakuvî. Îta Joshua na mûke nake îgemarî rîa Ngai-Mûnene, nîguo nîmwîre ûrîa agwîka.” Kwoguo Musa na Joshua nîmaathiîre na magîtonya îgemarî rîa gûcemanîrua.

¹⁵ Nake Ngai-Mûnene nîwamaumîrîre arî îtuurî rîrîa rîarûngamire mûromorî wa îgema.

¹⁶ Ngai-Mûnene nîwerire Musa atîrî, “Rîu îvinda rîaku rîa kuuma nthî îno rîrî vakuvî; na warîkia kuuma nthî îno, andû makethîrwa matarî evokeku kûrî nie na nîmakaaregana na kîrîkanîro kîrîa naarûthire nao. Nîmakaandiganîria na mambîrîrie kûgooca ngai cia mîvuanano irîa ivoyagwa nî andû a mavûrûri ma kûrîa mûthiîte kwîgwatîra.

¹⁷ Rîrîa mageeka ûguo, nîngaarakara nîo na nîmatiganîrie, nao macoke macûkangue. Nîmakaagîa na mathîna na mînyamaaro mîîngî na nîmakaamenya atî marona mathîna na mînyamaaro îo nîûndû, Ngai wao ndarî vamwe nao.

¹⁸ Vîndî îo ndikaamatethia nîûndû nîmekîte maûndû macûku na makagooca ngai ciîngî.

¹⁹ “Rîu, andîka rwîmbo rûrû na ûrûthomithie kûrî andû onthe a Isiraeli, nîguo rwîthîrwe rûrî ûira wakwa kûrî andû a Isiraeli.

²⁰ Nîngaamavira vûrûri wîcûrîte îriia na ûûkî, ûrîa nerîîre methe mao na mwîvîtwa atî nîngaamava. Nîmakaarîa kîrîa kîonthe makaavatara na matûûre makenete. Nwatî nîmakaagarûrûka na magooce ngai ciîngî na maitungatîre. Nîmakaaregana nanie na maune kîrîkanîro kîrîa naarûthire nao.

²¹ Nîmakaanyitwa nî mîthiro mîîngî na mathîna. Nwatî rwîmbo rûrû rûkaainagwa nî andû a Isiraeli rûrî ûira kûrî o, na njiarwa ciao itikaariganîrwa nî ruo. Nie nîmbicî meciria mao wana mbere ya nîmavira vûrûrirî ûrîa nameerîre na mwîvîtwa atî nîngaamava.”

²² Kwoguo Musa nîwandîkire rwîmbo mûthenya wa ûcio na akîrûthomithia andû a Isiraeli.

²³ Nake Ngai-Mûnene nîwacokire akîatha Joshua mûvîcî wa Nuni akîmwîra atîrî, “Gîa na vinya na ûmîrîrie, nîûndû nîwe ûgûtongoria andû a Isiraeli mathiî vûrûrirî ûrîa namerîre na mwîvîtwa atî nîngaamava, na ngethagîrwa nîrî vamwe nawe.”

²⁴ Musa nîwandîkire ciugo cionthe cia watho wa Ngai îvukuurî atagûtigîrîra wanarî kiugo.

²⁵ Arîkia kwandîka, nîwerire Alawi arîa maakuuaga îthandûkû rîa kîrîkanîro Kîam Ngai-Mûnene atîrî,

²⁶ “Ocani îvuku rîîrî rîa Watho na mûriige mwenarî wa îthandûkû rîa kîrîkanîro Kîam Ngai-Mûnene Ngai wenyu nîguo rîkarage vau rîrî ûira kûrî mue.

²⁷ Nîmbicî ûrîa mûmîtie ciongo na mûrî aremi. Ûtûrorî wakwa wonthe namue, mwîthîrîtwe mûkîregana na Ngai-Mûnene na nîmbicî wana nakua, nwa mûkûthiî na mbere na kûmia ciongo makîria.

²⁸ Îtani athuuri onthe a mîvîrîga yenyu na atongoria onthe magomane ava nîguo nîmere ciugo ino, na nîngwîta îgûrû na nthî ituîke aira kûrî o.

²⁹ Nîmbicî narîkia gûkua nîmûgaatuîka andû aganu na mûregane na maûndû marîa naamwathire mwîkage. Mavinda marîa magaaûka nî mûkaanyitwa nî mîthiro, nîûndû mûkethîrwa mûrakarîtie Ngai-Mûnene na njîra ya gwîka maûndû macûku marîa areganîte namo.”

Rwîmbo rwa Musa

³⁰ Musa nîwacokire akina rwîmbo rûrû ruonthe andû onthe a Isiraeli arîa maaûnganîte mathikîrîrîtie.