Gûco 30 - ÎVUKU RÎA ÛVORO MWARO

Maûndû marîa matûmaga andû macokanîrîre na Ngai-Mûnene na marathimwe

¹ Musa nîwerire andû a Isiraeli atîrî, “Rîrîa maûndû mau monthe narîkia kûmwîra megiî kîrumi na kîrathimo makaamûnyita, na mwîcirie waro ûvoro wamo mûrî mavûrûrirî marîa Ngai-Mûnene Ngai wenyu amûnyaganîtie,

² na mûcokerere Ngai-Mûnene Ngai wenyu, mue na njiarwa cienyu na mûvingie maûndû monthe marîa ngûmwatha ûmûnthî na ngoro yonthe na mwoyo wonthe;

³ Ngai-Mûnene Ngai wenyu nîakaamwîguîra ntha na amûcokanîrîrie vamwe rîngî kuuma mavûrûrirî monthe marîa aamûnyaganirie.

⁴ Wana ethîrwa mûnyaganîtie nginya mîthiia ya nthî, Ngai-Mûnene Ngai wenyu nîakaamûruta kuo na amûcokanîrîrie vamwe.

⁵ Ngai-Mûnene Ngai wenyu nîakaamûcokia vûrûrirî ûrîa warî wa methe menyu nîguo mûwîgwatîre rîngî; nîagaatûma mûthatûkwe mûno na mwîngîve makîria gûkîra methe menyu.

⁶ Ngai-Mûnene, Ngai wenyu nîakaamûva, mue na njiarwa cienyu ngoro îrî na wathîki nîguo mûmwende na ngoro yonthe, na mûthiî na mbere gûtûûra îvinda îraca vûrûrirî ûcio.

⁷ Nake Ngai-Mûnene Ngai wenyu nîagaatûma irumi icio inyite nthû cienyu na andû arîa maamûnyariraga.

⁸ Nîmûgaacoka kwathîkîra Ngai-Mûnene rîngî na kûvingia maathani make monthe marîa ngûmûva ûmûnthî.

⁹ Ngai-Mûnene Ngai wenyu nîagaatûma mûthatûkwe mûno maûndûrû monthe marîa mûkethîrwa mûgîka. Mûthatûkwe cianarî cienyu, ng'omberî cienyu na mîgûndarî yenyu. Ngai-Mûnene nîagaakena akîmûrathima na maûndû maro wata ûrîa akenaga akîrathima methe menyu.

¹⁰ Nwatî nwanginya mûmwathîkagîre na mûvingagie maathani make marîa mandîke îvukuurî rîîrî rîa watho na mûmûcokerere na ngoro yonthe na mwoyo wonthe.”

¹¹ Musa nîwamerire atîrî, “Maathani mama nîramûva ûmûnthî tî maûmû mûno na mûtingîremwa nî kûmathîkîra.

¹² Matirî îgûrû kwa Ngai atî nwa mûrie, nû ûkûthiî kuo nîguo amûretere mo nîguo mûmegue na mûmathîkîre.

¹³ Wana matirî mûringo wa îria atî nwa mûrie, nû ûkûringa îria nîguo amûgîrîre mo nîguo mûmegue na mûmathîkîre.

¹⁴ Maathani mau marî vakuvî mûno namue. Marî tûnyuarî twenyu na ngororî cienyu, kwoguo mavingagieni.

¹⁵ “Taroriani, ûmûnthî nîramwîra mûthuure ûndû ûmwe gatagatî ka ûndû mwaro na ûndû mûcûku: gîkuû na mwoyo.

¹⁶ Ethîrwa nîmûkûvingia maathani ma Ngai-Mûnene Ngai wenyu marîa ngûmûva ûmûnthî na njîra ya kwenda Ngai-Mûnene Ngai wenyu, kûrûmîrîra njîra ciake, kûvingia mawatho make, kûrûmîrîra matuîro make ma ciira na irîra ciake, nîmûgaatûûra na mwongerereke, na Ngai-Mûnene Ngai wenyu nîakaamûrathima mûrî vûrûrirî ûrîa mûgûtonya mûwîgwatîre.

¹⁷ Nwatî mûngîgarûrûka na mûrege kwathîka mûcoke mûgucîrîrue kûgooca ngai cia mîvuanano na gûitungatîra,

¹⁸ nîramwîra ûmûnthî, atî nwanginya mûgaakua. Mûtigaatûûra îvinda îraca kûu vûrûrirî ûrîa mûthiîte kwîgwatîra mûringo wa rûnjî rwa Jorodani.

¹⁹ Nîngwîta îgûrû na nthî ituîke aira ûmûnthî mûkîthuura ûndû ûmwe gatagatî ka maûndû mama namwîra; kîrathimo kana kîrumi, gîkuû kana mwoyo. Thuurani mwoyo nîguo mue na njiarwa cienyu mûtûûre.

²⁰ Mwenda Ngai-Mûnene Ngai wenyu na mwamwathîkîra na mûtuîke evokeku kûrî ke, nî mûgûtûûra vîndî ndaca vûrûrirî ûrîa Ngai-Mûnene Ngai wenyu eerîre methe menyu: Iburahimu Isaka na Jakovu na mwîvîtwa atî nîakaamava.”