Gûco 3 - ÎVUKU RÎA ÛVORO MWARO

Andû a Isiraeli nîmaavootire mûthamaki Ogu

¹ “Nîtwacokire tûkîthiî mwena wa rûgûrû twerekerete vûrûri wa Bashani. Nake mûthamaki Ogu nîwaûkire na athigari ake onthe a mbaara kûrûa natue vakuvî na îtûûra rîa Edirei.

² Nwatî Ngai-Mûnene nîwambîrire atîrî, ‘Ndûkamwîtigîre, nîngûmûvecana kûrî we, andû ake, wana vûrûri wake wonthe. Nawe nîûkaamwîka wata ûrîa wekire Sihoni, mûthamaki wa Amori, ûrîa wathanaga arî Heshiboni.’

³ “Kwoguo Ngai-Mûnene, Ngai wetû nîwarekererie mûthamaki Ogu na andû ake kûrî tue, nîtwamaûragire onthe na gûtirî wanarî ûmwe watigarire.

⁴ Nîtwacokire tûgîtava matûûra make monthe. Matûûra monthe marîa twatavire maarî mîrongo îtandatû (60), gîcunjî kîonthe Kîam Arigobu, kûrîa Ogu, mûthamaki wa Bashani aathanaga.

⁵ Matûûra mama monthe mairigîtwe na nthingo ndaca na igekîrwa ivingo, igacoka ikavingwa na cuuma. Kwarî na icagi nyîngî itaarî mbirigîre na nthingo.

⁶ Nîtwacûkangirie matûûra monthe, na tûkîûraga arûme, aka, na ciana cionthe, wata ûrîa twekire matûûrarî marîa maathagwa nî Sihoni, mûthamaki wa Heshiboni.

⁷ Nîtwatavire ndîthia yonthe na indo cionthe irîa ciarî matûûrarî mau.

⁸ “Kwoguo, nîtwocire vûrûri ûrîa wathagwa nî athamaki aîrî a Aamori, ûrîa warî mwena wa îrathîro wa rûnjî rwa Jorodani, kuuma rûnjîrî rwa Arinoni nginya kîrîma Kîam Herimoni.

⁹ (Andû a Sidoni meetaga kîrîma Kîam Herimoni Sirioni, nao Aamori magagîta Seniri.)

¹⁰ Nîtwatavire mavûrûri monthe ma Ogu, mûthamaki wa Bashani, matûûra monthe marîa maarî kûndû kûrîa kwaraganu, icunjî cia Gileadi na Bashani, na mwena wa îrathîro nginya matûûra ma Saleka na Edirei.

¹¹ “Ogu, mûthamaki wa Bashani nîke wenga watigarîte gatagatîrî ka njiarwa cionthe cia Refaimu. Gîtanda gîake gîatumîtwe na cuuma. Kîarî na ûraca wa mita inya (4) na wariî wa mita igîrî (2), kûringana na kîthimi kîrîa Kîamgîrîrîte. Gîtanda kîu nwa kîonagwa Raba, îtûûra înene rîa Aamori.

Mîvîrîga îrîa yatûûrire mwena wa îrathîro wa Jorodani

¹² “Rîrîa twenyitîre vûrûri ûcio, nînavere andû a mûvîrîga wa Reubeni na wa Gadi vûrûri ûrîa ûrî mwena wa rûgûrû wa Aroeri vakuvî na rûnjî rwa Arinoni, nuthu ya vûrûri ûrîa ûrî irîma wa Gileadi, wa vamwe na matûûra maguo.

¹³ Nakuo Gileadi kûu gwatigarire na Bashani kuonthe, kûrîa kwathagwa nî mûthamaki Ogu, na nîkîo gîcunjî kîonthe Kîam Arigobu, nîkuo naveere nuthu ya andû a mûvîrîga wa Manase.” (Bashani kuonthe gwîtagwa vûrûri wa Refaimu.

¹⁴ Jairi, mûvîcî wa Manase nîwocire gîcunjî kîonthe Kîam Arigobu, nginya mûvakarî wa Ageshuri na mûvakarî wa andû a Maka. Nîwetanirie icunjî icio na rîîtwa rîake ke mwene, Havothu-jairi. Ûguo nîguo gûtwîre gwîtagwa nginya ûmûnthî.)

¹⁵ “Nînaacokire ngîva andû a mbarî ya Makiru, wa mûvîrîga wa Manase vûrûri wa Gileadi.

¹⁶ Nao andû a mûvîrîga wa Reubeni na Gadi, nînamaveere vûrûri ûrîa umîte Gileadi nginya rûnjîrî rwa Arinoni. Mûvaka wao wa mwena wa îveti warî gatagatî ka rûnjî rwa Arinoni. Mûvaka wao wa mwena wa rûgûrû warî rûnjî rwa Jaboku, varîa maavakanîrîte na Aamoni.

¹⁷ Nînaacokire ngîmava werû wa Araba vamwe na ndeere cia rûnjî rwa Jorodani kuuma Îria rîa Galilee nginya Îria rîa Cumbî rîrîa rîrî mwena wa îveti, na nginya nthî ya kîrîma Kîam Pisiga mwena wakîo wa îrathîro.

¹⁸ “Vîndî wa îo, nînaamwathire ngîmwîra atî, ‘Ngai-Mûnene, Ngai wenyu nîamûvete vûrûri ûyû ûrî mwena wa îrathîro ûtuîke wenyu. Andû onthe a mbaara nîmoce indo ciao cia mbaara, macoke mathiî marî mbere ya andû acio engî enyu a Isiraeli.

¹⁹ Nwatî aka enyu, ciana na ndîthia yenyu igaatigwa matûûrarî mau namûveere. (Nîmbicî mûrî na ndîthia nyîngî.)

²⁰ Tethereriani Aisiraeli acio engî nginya matonye vûrûrirî ûrîa Ngai-Mûnene amavete, mwena wa îthûîro wa rûnjî rwa Jorodani, na matûûre kuo na thayû, wata ûrîa Ngai-Mûnene, Ngai wenyu akaamavotithia gûtûûra gûkû na thayû. Mwarîkia gwîka ûguo, nwa mûcoke gûkû vûrûrirî ûyû namûveere.’

²¹ “Nînaacokire ngîatha Joshua ngîmwîra atîrî, ‘We nîwona maûndû monthe marîa Ngai-Mûnene, Ngai waku eka kûrî athamaki acio aîrî: Sihoni na Ogu, na ûguo nîguo ageeka athamaki acio engî onthe a mavûrûri monthe marîa mûkaavîtûkîrîra.

²² Mûtigetigîre athamaki acio, nîûndû Ngai-Mûnene, Ngai wenyu nîakaamûrûîrîra.’

Ngai-Mûnene nîwaregire Musa atonye Kanaani

²³ “Kavinda kau nînakaîre Ngai-Mûnene ngîmwîra,

²⁴ ‘Mwathani, Ngai-Mûnene, we nîwambîrîrîtie kûmonia, nie ndungata yaku ûnene na vinya waku. Nî ngai îrîkû gûkû nthî kana kûu îgûrû îngîvota gwîka ciîko cia vinya na maûndû manene ta mama wîkîte?

²⁵ Ngai-Mûnene, nakûthaitha ûmbîtîkîrie ninge rûnjî rwa Jorodani ngone vûrûri ûcio mwaro ûrî irîma nthaka na irîma cia Lebanoni.’

²⁶ “Nwatî Ngai-Mûnene aarî mûrakaru nînie nîûndû wenyu, na ndangîanthikîrîrie. Kwoguo Ngai-Mûnene nîwambîrire atîrî, ‘Ûguo nî mwîganu! Ndûkambîre ûndû ûyû rîngî!

²⁷ Unûkia ûthiî kîrîmarî Kîam Pisiga îgûrû, ûcoke ûrorie mwena wa îthûîro, wa rûgûrû, wa îveti na wa îrathîro; ûrorie waro na metho maku, nîûndû ndûkaaringa Jorodani ûthiî vûrûrirî ûcio.

²⁸ Atha Joshua na ûmûmîrîrie na ûmwîkîre vinya; nîûndû nîke ûgûtongoria andû aya nginya maringe na megwatîre vûrûri ûcio ûkwona.’

²⁹ “Kwoguo nîtwekarire Kîamndarî kîrîa kîerekanîrîte na îtûûra rîa Bethi-peori.”