Gûco 29 - ÎVUKU RÎA ÛVORO MWARO

Ngai-Mûnene nîwarûthire kîrîkanîro na andû a Isiraeli marî vûrûrirî wa Moabu

¹ Mama nîmo maûndû marîa marî kîrîkanîrorî kîrîa Ngai-Mûnene aathire Musa arûthe na andû a Isiraeli marî vûrûrirî wa Moabu, kwongerera marîa Ngai-Mûnene aarûthîte nao marî kîrîmarî gîa Sinai.

² Musa nîwetire andû onthe a Isiraeli vamwe na akîmeera atîrî, “Mue nîmwonire ûrîa Ngai-Mûnene eekire mûthamaki wa Misiri, ndungata ciake, na vûrûri wake wonthe.

³ Nîmwonire mûthiro, ciama, na maûndû ma magegania marîa Ngai-Mûnene eekire Misiri.

⁴ Nwatî nginya ûmûnthî Ngai-Mûnene nîwaregire mûtaûkîrwe nî maûndû marîa mwegwire na mûkîona.

⁵ Nie namûtongoririe werûrî îvinda rîa mîaka mîrongo îna, na mûtianathirîrwa nî nguo kana iratû.

⁶ Mûtiarîa mûgate, kana mûnyue ndivei kana njovi, nwatî Ngai-Mûnene Nîwamûvere maana kuuma îgûrû nîguo mûmenye atî ke, nîke Ngai-Mûnene Ngai wenyu.

⁷ Rîrîa twakinyire gûkû, Sihoni, mûthamaki wa Heshiboni na Ogu, mûthamaki wa Bashani nîmaaûkire kûrûa natue; nwatî nîtwamavootire,

⁸ na tûgîoca vûrûri wao na tûkîûgaîra andû a mîvîrîga ya Reubeni, Gadi na nuthu ya andû a mûvîrîga wa Manase.

⁹ Kwoguo rûmagîrîrani na kinyi maathani make monthe nîguo maûndû monthe marîa mûgekaga mamûthatûkage.

¹⁰ “Ûmûnthî, muonthe mûrûngamîte mbere ya Ngai-Mûnene Ngai wenyu: atongoria a mîvîrîga yenyu, anene, arûme onthe a Isiraeli,

¹¹ aka, ciana, ageni arîa mekaraga kwenyu makîmûtavagîra manjî na magîtemaga mîtî.

¹² Mûrî ava ûmûnthî, nîguo mûrûthe kîrîkanîro na Ngai-Mûnene Ngai wenyu, na mwîtîkîre kûrûmagîrîra maûndû monthe ma kîrîkanîro kîu,

¹³ nîguo amûtue andû ake kîûmbe nake ethîrwe arî Ngai wenyu wata ûrîa eerîre methe menyu; Iburahimu, Isaka na Jakovu.

¹⁴ Tî mue muenga tu Ngai-Mûnene ararûtha kîrîkanîro gîkî namue, vamwe na ûrîa gîkananîtie,

¹⁵ nwatî arakîrûtha natue tuonthe arîa tûrî ava ûmûnthî wana nîûndû wa njiarwa cietû irîa igaaûka.

¹⁶ “Taririkanani ûrîa twatûûraga tûrî vûrûrirî wa Misiri, na maûndû marîa twonaga tûvîtûkîrîrîte mavûrûrirî marîa mengî.

¹⁷ Nîmwonire ngai cia mîvuanano irîa Ngai-Mûnene athûrîte irûthîtwe na mîtî, mathiga, sîlûva na thaavu.

¹⁸ Menyererani gûtikethîrwe na mûndûmûrûme, mûndûmûka, mûciî kana mûvîrîga gatagatîrî kenyu ûmûnthî ûngîtiganîria Ngai-Mûnene Ngai wetû na agatungatîre ngai cia mavûrûri mau. Ûndû ûcio ûngîthîrwa wîkariî ta mûri ûrîa ûtheûkaga mûtî mûrûrû na ûrî ûrogi.

¹⁹ Na gûtikethîrwe kûrî na mûndû gatagatîrî kenyu ûregua kîrîkanîro gîkî mwevîta, nwatî eîre na ngoro atî wana angîrega gûkîvingia, ndangîona ûndû mûcûku. Mûndû ûcio agaatûma muonthe mûverithue, arîa aro wana arîa acûku.

²⁰ Ngai-Mûnene ndakoovera mûndû ta ûcio. Vandû va ûguo, nîakaarakara nî mûndû ûcio na nîakaanyitwa nî irumi cionthe irîa mandîke îvukuurî rîîrî, nginya rîrîa Ngai-Mûnene akaathiria rîîtwa rîake gûkû nthî viû.

²¹ Ngai-Mûnene nîagaatûma mûndû ûcio anyitwe nî maûndû macûku maringanîte na irumi irîa mandîke îvukuurî rîîrî rîa watho.

²² “Njiarwa cienyu irîa igaaûka vuva wenyu, na ageni arîa makaauma mavûrûri ma kûraca nîmakoona na mamenye mînyamaaro na mathîna marîa Ngai-Mûnene aareteere vûrûri wenyu.

²³ Vûrûri wonthe ûkeethîrwa ûkunîkîtwe nî cumbî na ûviriti, na ûtangîvandwa wanarî kîndû gîkamera, nginya nyaki ndîkaamera. Vûrûri wenyu ûkethîrwa wîkariî ta Sodomu na Gomora, Adima na Zeboimu, matûûra marîa Ngai-Mûnene aacûkangirie rîrîa aarakarîte nîmo mûno.

²⁴ Mavûrûri monthe ma nthî nîmakaaûria, ‘Nîndûî gîatûmire Ngai-Mûnene acûkangia vûrûri ûyû? Nîndûî gîatûmire agîe na marakara meengî ûguo?’

²⁵ Nao nîmagaacokerua, ‘aarakarire ûguo nîûndû andû ake nîmaareganire na kîrîkanîro kîrîa Ngai-Mûnene Ngai wa methe mao aarûthire nao rîrîa aamarutire vûrûrirî wa Misiri.

²⁶ Nîmaatungatîre na makîgooca ngai ng'eni irîa Ngai-Mûnene aamakaanîtie.

²⁷ Kwoguo Ngai-Mûnene nîwarakarirue nî andû a vûrûri ûyû, na agîtûma manyitwe nî irumi cionthe irîa mandîke îvukuurî rîîrî.

²⁸ Ngai-Mûnene nîwarakarire mûno nî o, na nîwamarutire vûrûrirî wao na akîmavira vûrûrirî mûgeni, na nîkuo matûûraga nginya ûmûnthî.’

²⁹ “Maûndû ma nthitho nî ma Ngai-Mûnene Ngai wetû, nwatî maûndû marîa aguûranîrîtie nî metû vamwe na njiarwa cietû, nîguo tûtûûre tûvingagia mawatho make monthe tene na tene.”