Gûco 26 - ÎVUKU RÎA ÛVORO MWARO

Matega ma maketha

¹ “Mwarîkia gûkinya vûrûrirî ûrîa Ngai-Mûnene, Ngai wenyu akûmûva rîrî îgai rîenyu, na mûtûûre kuo,

² wa mûndû nîagooca maketha mamwe ma mbere ma indo cionthe irîa akethîrwa akethete vûrûrirî ûrîa Ngai-Mûnene, Ngai wenyu akûmûva, amekîre gîkavurî na amavire varîa Ngai-Mûnene, Ngai wenyu athuurîte va kûgoocagîrwa.

³ Nîagaacoka athiî kûrî mûthînjîri-Ngai ûrîa ûkethîrwa agîtungata îvinda rîu na amwîre atîrî, ‘Ûmûnthî nînetîkîra mbere ya Ngai-Mûnene, Ngai waku, atî nînakinya vûrûrirî ûrîa eerîre methe metû ma tene atî nîagaatûva.’

⁴ “Nake mûthînjîri-Ngai nîagooca gîkavu kîu kuuma kûrî we na akîvire metharî ya kîgongoona ya Ngai-Mûnene Ngai waku.

⁵ Nîûkaauga ûrî mbere ya Ngai-Mûnene Ngai waku atîrî, ‘Vava aarî wa kuuma vûrûri wa Aramu na aatûûraga aûrûraga. Nîwathiîre Misiri na andû a mûciî wake na agîtûûra kuo arî mûgeni. Makîthiî Misiri maarî andû anini, nwatî nîmoongererekire magîtuîka rûrîrî rûnene na rwarî na vinya.

⁶ Andû a Misiri nîmaatûvinyîrîrie, magîtûnyamaria na magîtûrutithia wîra wa ûkombo.

⁷ Nîtwarîrîre Ngai-Mûnene Ngai wa methe metû atûtethie. Ngai-Mûnene nîwatwîguire, na akîona ûrîa twanyamarîkaga, twarutithagua wîra mûrito na nîtwavinyagîrîrua.

⁸ Ngai-Mûnene nîwatûrutire vûrûrirî wa Misiri na vinya na ûvoti wake. Nîwaringire ciama na morirû na agîka maûndû ma gwîkîra andû guoya nyîngî.

⁹ Ngai-Mûnene nîwatûretire vûrûrirî ûyû wîcûrîte îriia na ûûkî.

¹⁰ Kwoguo nînakûrutîra We, Ngai-Mûnene maketha ma mbere ma mûgûnda ûrîa ûmvete.’ “Nîûgaacoka wige gîkavu gîaku vau nthî mbere ya Ngai-Mûnene, Ngai waku na ûmûgooce.

¹¹ Nîûgaakena nîûndû wa indo cionthe mbaro irîa Ngai-Mûnene, Ngai waku akûvete vamwe na andû a mûciî waku. Wanao Alawi na ageni arîa mûtûûranagia nao nîmagaakena.

¹² Wa mîaka îthatû yathira, mûndû wa wonthe gatagatîrî kenyu akarutagîra Alawi, ageni, ciana cia ndigwa na aka a ndigwa gîcunjî gîa îkûmi Kîam maketha kuuma mîgûndarî yenyu, nîguo methagîrwe marî na irio cia kûmegana marî kûu matûûrarî menyu.

¹³ Weka ûguo, nîûgaacoka uuge ûrî mbere ya Ngai-Mûnene, Ngai waku, ‘Nînaruta kîrîa kîtheru kuuma nyomba yakwa na nanengera Alawi, ageni, ciana cia ndigwa na aka a ndigwa, wata ûrîa wambathire mbîke. Ndirî munu rîathani wanarî rîmwe rîa Maathani maku kana ndiganîrwa nîmo.

¹⁴ Ndiarîa gîcunjî gîa îkûmi vîndî îrîa naacakayaga; kana nîkîruta nîrî na gîko, kana nîkîrutîra akuû. Nîmbathîkîrîte ûrîa wonthe Ngai-Mûnene, Ngai wakwa augîte, na ngeeka maûndû monthe marîa ambathîte mbîke.

¹⁵ Ngai-Mûnene, ûrî îgûrû kûu kûtheru ûtûûraga, rathima andû aku, Aisiraeli na vûrûri ûrîa ûtûveete wata ûrîa werîre methe metû na mwîvîtwa, vûrûri wîcûrîte îriia na ûûkî.’

Andû a Ngai-Mûnene kîûmbe

¹⁶ “Ûmûnthî Ngai-Mûnene, Ngai wenyu aramwatha mûvingagie na kinyi mawatho make monthe na irîra ciake, na mûmenyerere mûmavingagie na ngoro yonthe na mwoyo wonthe.

¹⁷ Ûmûnthî nîmweranîra atî Ngai-Mûnene nîke Ngai wenyu, na atî mûkaarûmagîrîra njîra ciake, mûkaavingagia mawatho make monthe, irîra ciake na mwîgucage mûgambo wake.

¹⁸ Nake Ngai-Mûnene nîwauga ûmûnthî, atî mue mûrî andû ake kîûmbe wata ûrîa aamwîrîîre na nîmwagîrîrwe nî kûvingagia maathani make monthe.

¹⁹ Nake nîakaamûtua rûrîrî rûnene gûkîra ndûrîrî cionthe irîa aaûmbire. Nao andû arîa engî onthe nîmakaamûvecaga gîtîîo na nî mûkethîrwa mûrî andû a Ngai-Mûnene, Ngai wenyu kîûmbe.”