Gûco 25 - ÎVUKU RÎA ÛVORO MWARO

¹ “Ethîrwa kûrî na ngarari gatagatîrî ka Aisiraeli aîrî na oîrî mathiî îgootirî nîguo matwithanue, nake mûtwithania ciira atue atî ûmwe tî mwîvia na ûcio wîngî nî mwîvia,

² mûndû ûcio wîvîtie angîgaatuîrwa arivwe, mûtwithania ciira nîakaamwîra amame na îvu na arivwe ivoko. Mwîgana wa ivoko ûkethîrwa ûringanîte na wîvia ûrîa ekîte.

³ Mûndû ûcio ndakaarivwa ivoko makîria ya mîrongo îna; nîûndû kûrivwa makîria ya icio nî gûconorithia mûndû ûcio kûrî andû.

⁴ “Ndûkove ndegwa kanyua rîrîa îravûûra ngano.

Wîra wa mûndû kûrî mûrwang'ina ûrîa ûkuîte

⁵ “Ethîrwa mûndû matûûranîrîte na mûrwang'ina mûgûndarî ûmwe, na mûrwang'ina ûcio akue matagîte kavîcî, mûka ndagîrîrwe nî kûthambua nî mûndû ûtarî wa mûciî. Mûrwang'ina na mûthuuriwe nîke wagîrîrwe nî kûmûthambia.

⁶ Kavîcî ka mbere karîa mûndûmûka ûcio magaaciara nake, gageetanua na mûthuuriwe ûcio wakwire nîguo rîîtwa rîake rîtikariganîre kûrî andû a Isiraeli.

⁷ Mûndûmûrûme ûcio angîrega kûvikia mûka wa mûrwang'ina ûcio wakwire, mûndûmûka ûcio watigirwe nîakaathiî kûrî atongoria a îtûûra vau mwîrîgarî na ameere atîrî, ‘Mûrwang'ina na mûthuuriwa nîaregete kûnthambia nîguo rîîtwa rîake rîtikariganîre kûrî andû a Isiraeli.’

⁸ Atongoria a îtûûra nîmageta mûndû ûcio nîguo mamwarîrie. Mûndû ûcio angîkaarega kûthambia mûka ûcio wa mûrwang'ina,

⁹ mûndûmûka ûcio nîakaaruta mûndû ûcio kîratû kîmwe gîa kûgûrû gwake acoke amûtuîre mata ûthiû mbere ya atongoria a îtûûra na amwîre atîrî, ‘Ûguo nîguo mûndûmûrûme ûrîa ûregete gûciarîra mûrwang'ina ciana ekagwa.’

¹⁰ Vûrûrirî wa Isiraeli kuonthe mûciî wake ûgetagwa, ‘Mûciî wa mûndû ûrîa warutirwe kîratû.’

Mawatho mengî

¹¹ “Arûme aîrî mangîthîrwa makîrûa, na mûka wa mûndûmûrûme ûmwe anyite mûndûmûrûme ûcio wîngî ciîga ciake cia ûciari, agîtigithia mûthuuriwe,

¹² mûndûmûka ûcio nîagaatinua njara îo: ndakeguîrwa ntha.

¹³ “Ndûkethagîrwe wî na indo igîrî cia kûthima ûrito mûvukorî waku, kîmwe kîrito na kîmwe kîvûthû. Tûmagîra ithimi irîa ciagîrîrîte.

¹⁴ Ndûkethagîrwe wî na ithimi igîrî ngûrani, kîmwe kînene na kîmwe kînini.

¹⁵ Tûmagîrani ithimi irîa mbagîrîru na cia ma, nîguo mûtûûre mîaka mîngî vûrûrirî ûrîa Ngai-Mûnene, Ngai wenyu akûmûva.

¹⁶ Ngai-Mûnene, Ngai wenyu nîathûrîte andû onthe arîa matarî evokeku.

Aisiraeli nîmaathirwe maûrage Amaleki

¹⁷ “Taririkanani ûrîa Amaleki maamwîkire rîrîa mwarî rûgendorî mumîte Misiri.

¹⁸ Ririkanani ûrîa maamûtharîkîre mûrî anogu na mûkathira vinya; na matagwîtigîra Ngai, nîmaaûragire arîa onthe maarî vuva.

¹⁹ Kwoguo rîrîa Ngai-Mûnene, Ngai wenyu akaamûva vûrûri ûrîa aamwîrîîre, na amûgitîre kuuma kûrî nthû cienyu irîa ikethîrwa îmûthiûrûrûkîrîtie, nwanginya mûkaaûraga Amaleki onthe mathire viû na mariganîre. Mûtikariganîrwe nî gwîka ûguo!